Կարմրախտի հիմնական ախտանշանները, հնարավոր հետևանքներն ու բուժումը

Կարմրախտը սուր վարակիչ հիվանդություն է, որն ունի բավական երկար գաղտնի շրջան, իսկ ակնհայտ ախտանշաններն ի հայտ են գալիս վարակվելուց միջինում 20 օր անց:

Կարմրախտի հիմնական ախտանշանները

Վարակումից 2-3 շաբաթ անց կարող է նկատվել.

• ջերմության բարձրացում (ոչ շատ բարձր) և ոչ սաստիկ գլխացավ,
• ֆարինգիտ,
• ծոծրակի ավշային հանգույցների ոչ շատ մեծացում,
• ինչպես նաև կոնյունկտիվիտ:

Կարմրախտի ամենատարածված ախտանշանը կարմիր ցանն է, որը սկզբում ի հայտ է գալիս միայն դեմքի վրա, այնուհետև տարածվում է ամբողջ մարմնով մեկ: Հարկ է նշել, որ նման ցանը քոր գրեթե չի առաջացնում և կարող է մնալ 2-7 օր, որից հետո անհետանում է՝ առանց որևէ հետք թողնելու:

Կարմրախտը վարակիչ հիվանդություն է, սակայն մարդը կարող է վարակվել միայն արդեն իսկ վարակված մեկից կամ վարակակիրից: Ընդ որում՝ մարդը կարող է շրջապատի համար վտանգավոր լինել և դառնալ վարակման պատճառ հիվանդության ախտանշանների ի հայտ գալուց անգամ երկու շաբաթ առաջ, ինչպես նաև հիմնական ախտանշանների անհետանալուց հետո դեռ ևս մեկ շաբաթվա ընթացքում:

Առավել հաճախ այս հիվանդությունն ախտահարում է 2-7 տարեկան երեխաներին, իսկ տարիքի հետ ընկալունակությունն այդ հիվանդության հանդեպ զգալիորեն նվազում է:

Կարմրախտի հնարավոր հետևանքները

Կարմրախտով հիմնականում է հիվանդանում են մանուկ հասակում և այդ տարիքում այն շատ ավելի թեթև ընթացք է ունենում:

Այս հիվանդությունն առավել վտանվավոր է հղի կանանց համար, քանի որ այդ դեպքում մի քանի անգամ բարձրանում է երեխայի մոտ լուրջ բնածին արատների առաջացման հավանականությունը: Հիվանդությունը հատկապես վտնագավոր է լինում հղիության առաջին եռամսյակի ընթացքում:

Կարմրախտի բուժումը

Սովորաբար այս հիվանդության դեպքում որևէ լուրջ դեղորայքային բուժման անհրաժեշտություն չի լինում: Որպես կանոն՝ մասնագետները նշանակում են միայն վիտամինային թերապիա և անկողնային ռեժիմ, սակայն երբեմն հարկավոր է լինում բուժել նաև հիվանդության ախտանշանները:

Որևէ լուրջ բարդության դեպքում, ինչպիսին է մենինգոէնցեֆալիտը, հարկավոր է հիվանդին շտապ հոսպիտալացնել:

Սակայն հարկ է նաև նշել, որ մեկ անգամ կարմրախտով հիվանդանալուց հետո մարդը ձեռք է բերում հետինֆեկցիոն իմունիտետ, որը կայուն է ամբողջ կյանքի ընթացքում:

Նյութի աղբյուրը՝ mamapedia.com.ua