Որոնք են լեղապարկի 5 ամենատարածված հիվանդությունները

Օրվա ընթացքում մարդու լյարդն արտադրում է 1-2 լիտր լեղի, որն անչափ կարևոր է օրգանիզմի համար: Այս նյութն օգնում է յուրացնել ճարպերը, կլանել վիտամինները և այլն: Նույնքան կարևոր է նաև լեղապարկը, որում էլ կուտակվում է լեղին, ուստի այս օրգանի հետ կապված խնդիրների դեպքում հարկավոր է շտապ միջոցներ ձեռնարկել:

Ձեր ուշադրությանն ենք ներկայացնում լեղապարկի 5 ամենատարածված հիվանդությունները.

1.      Լեղածորանների դիսկինեզիա

Լողապարկի ու լեղածորանների մկանների աշխատանքը պետք է լինի հստակ ու համաձայնեցված: Այդ աշխատանքի խանգարման դեպքում առաջանում է դիսկինեզիա, որը կարող է պայմանավորված լինել նյարդային խնդիրներով, վարակներով, որովայնի խոռոչի օրգանների հիվանդություններով, գինեկոլոգիական հիվանդություններով, հորմոնալ խանգարումներով կամ ալերգիաներով: Բացի այդ, նման խնդիր կարող է առաջանալ նաև նստակյաց կենսակերպի և սխալ սննդակարգի դեպքում:

Լեղածորանների դիսկինեզիայի հիմնական ախտանշաններն են աջ կողատակում առաջացող մշտական սուր ցավերը: Երբեմն ցավերը լինում են բութ ու երկարատև: Ցավի նոպաները սովորաբար ի հայտ են գալիս անհանգստությունից հետո, իսկ ավելի հազվադեպ առանց որևէ պատճառի, ինչպես նաև ինտենսիվ ֆիզիկական ծանրաբեռնվածության կամ սննդակարգում արված փոփոխություների դեպքում:

Ցավերից բացի կարող է նկատվել նաև փորկապություն, փորլուծություն, ինչպես նաև սրտխառնոցի և անգամ փսխման նոպաներ:

2.      Լեղաքարային հիվանդություն

Սա դիսկինեզիայի ամենատարածված բարդություններից մեկն է, որի դեպքում մկանների կծկումների խանգարման ու խոլեստերինի մեծ քանակության ազդեցության հետևանքով լեղին քարանում է՝ առաջացնելով քարեր: Եթե այդ քարերն անշարժ են, դրանք ոչ մի խնդիր չեն առաջացնում, սակայն լուրջ խնդիրներ են առաջանում, երբ դրանք սկսում են շարժվել կամ խցանում են լեղածորանը:

Այս հիվանդությունը դրսևորվում է աջ կողատակի կամ որովայնի վերին հատվածի սուր ցավերով, բերանում դառը համի առկայությամբ, սրտխառնոցով ու փսխումով, իսկ լեղածորանների խցանման դեպքում՝ դեղնախտով:

Հիվանդության զարգացմանն է նպաստում սխալ սննդակարգը, ճարպերով ու խոլեստերինով հարուստ սննդամթերքի, ինչպես նաև հացահատիկների ու հացաբուլկեղենի գործածությունը: Բացի այդ, լեղաքարային հիվանդության առաջացման հավանականությունը բարձրանում է ճարպակալման, շաքարային դիաբետի, հոդատապի, միզաքարային հիվանդության, նյութափոխանակության խանգարման, արթրիտի, աթերոսկլերոզի և վիտամին A-ի պակասի դեպքում:

3.      Խոլեցիստիտ (լեղապարկի բորբոքում)

Այս հիվանդությունն առաջանում է լեղաքարային հիվանդության հետրանքով: Եթե քարը կարողացել է անցնել լեղածորանով և հայտնվել տասներկումատնյա աղիքում, ապա նոպաներն անցնում են առանց որևէ միջամտության: Սակայն եթե այն խցանում է լեղածորանը, ապա բորբոքման հավանականությունը բարձր է լինում:

Այս հիվանդության դեպքում հաճախ առաջանում են կտրուկ ուժգին ցավեր ու փսխում, ինչպես նաև բարձրանում է հիվանդի մարմնի ջերմաստիճնը: Նման դեպքերում չի կարելի հիվանդի որովայնին ջերմակ դնել կամ փորձել մաքրել նրա ստամոքսը: Փոխարենը հարկավոր է անմիջապես «շտապօգնություն» զանգահարել:

Հարկավոր է հաշվի առնել, որ խոլեցիստիտի առաջացման պատճառները կարող են լինել ոչ միայն քարերը: Նման խնդրի պատճառ կարող է դառնալ նաև չափից շատ սննդի ընդունումն ու ալկոհոլի գործածությունը:

Քրոնիկական խոլեցիստիտի դեպքում կարող է առաջանալ բութ, մղկտուն ցավ, որն ի հայտ է գալիս սննդի ընդունումից կամ ֆիզիկական ծանրաբեռնվածությունից 1-3 ժամ անց: Բացի այդ, ցավը կարող է տարածվել նաև պարանոցի, ծոծրակի, աջ ուսի և թիակի հատվածում: Հաճախ նկատվում է նաև բերանում դառը կամ մետաղական համի զգացողություն, սրտխառնոց, գխտոց, փորափքանք, փորլուծություն ու փորկապություն, ինչպես նաև դյուրագրգիռություն ու անքնություն:

4.      Լեղապարկի մակաբուծային հիվանդություն

Այս հիվանդությունն առավել հաճախ ի հայտ է գալիս մանուկ հասակում: Հիմնական ախտանշաններն են լեղապարկի ցավը, մարսելախանգարումը, աղիների աշխատանքի խանգարումները, իսկ երբեմն էլ տենդը, դողը, քաշի կորուստն ու մաշկային քորը:

Հիվանդությունը կարելի է ախտորոշել միայն հատուկ անալիզի միջոցով: Լեղապարկի մակաբուծային հիվանդությունը հաճախ հանգեցնում է նաև օրգանում բորբոքային գործընթացների առաջացման, ուստի այս հիվանդությունը հարկավոր է շտապ բուժել:

5.      Ուռուցքներ

Լեղապարկի քաղցկեղը քաղցկեղի ամենատարածված տեսակներից մեկն է: Բարորակ ուռուցքների դեպքում ախտանշանները կարող են նման լինել քրոնիկական խոլեցիստիտի ախտանշաններին կամ կարող են ախտանշաններ առհասարակ չնկատվել:

Հաճախ քաղցկեղն առաջանում է լեղաքարային հիվանդության ֆոնին, ուստի սկզբնական փուլերում կարող է դրսևորվել միայն այդ հիվանդությանը բնորոշ ախտանշաններով: Երբ ի հայտ են գալիս քաղցկեղին բնորոշ ախտանշանները (մշտական ինտենսիվ ցավեր, շոշափվող ուռուցք, դեղնախտ, քաշի նվազում, անեմիա և այլն), լեղապարկի ախտահարումն արդեն բավականին խորացված է լինում:

Օգտակար խորհուրդներ

Լեղապարկի մկանների աշխատանքը կարգավորելու համար բժիշկները խորհուրդ են տալիս.

·        Սնվել օրական 4-5 անգամ, փոքր չափաբաժիններով և ամեն օր նույն ժամերին:

·        Չկրել որովայնը ձգող հագուստ:

·        Չպառկել քնելու սննդի ընդունումից հետո 2 ժամվա ընթացքում:

·        Չկռանալ ֆիզիկական աշխատանք կատարելիս, այլ փոխարենը կքանստել:

·        Անկողնու վերին հատվածը 3-4 սմ-ով վեր բարձրացնել ստորին հատվածից:

·        Հրաժարվել գազավորված ըմպելիքներից, կծու, աղի, քաղցր, մարինացված, տապակած ու ապխտած սննդամթերքից,

·        Կատարել ֆիզիկական վարժություններ, որոնք կապված չեն ծանրություն բարձրացնելու և որովայնի մկանները լարելու հետ:

Բացի այդ, այս հիվանդության բուժման ժամանակ շատ արդյունավետ կարող են լինել նաև հանքային ջրի գործածությունն ու առողջարանային բուժումը: Սակայն հարկ է հիշել, որ առողջարանային բուժումը հակացուցված է լեղապարկում քարերի առկայության դեպքում, իսկ հանքային ջուրը հարկավոր է խմել փոքր ինչ տաքացրած վիճակում (40-45°C): Հանքային ջրով բուժման կուրսը տևում է մեկ ամիս: Այն հարկավոր է խմել ուտելուց կես ժամ առաջ մեկ բաժակ:

Նյութի աղբյուրը՝ econet.ru