Ինչ է ավիտամինոզը և որոնք են դրա առաջացման պատճառներն ու հիմնական ախտանշանները

Ավիտամինոզը հիվանդություն է, որը պայմանավորված է օրգանիզմում անհրաժեշտ վիտամինների պակասով: Որպես կանոն՝ այս հիվանդությունն առավել հաճախ ի հայտ է գալիս գարնանը՝ երկարատև ու ցուրտ ձմեռվանից հետո, քանի որ տարվա ցուրտ եղանակին սնունդy հարուստ չի լինում բավարար քանակությամբ վիտամիններով:

Ավիտամինոզի ախտանշանները

Հիվանդությունը ժամանակին բուժելու և տհաճ հետևանքներից խուսափելու համար հարկավոր է անպայման իմանալ դրա ախտանշանները:

Ավիտամինոզի տարածված ախտանշաններից են քրոնիկական հոգնածությունը, քնկոտությունն ու դյուրագրգիռությունը: Այս ախտանշանները սովորաբար ի հայտ են գալիս գարմանը, ուստի դրանց առկայության դեպքում խորհուրդ է տրվում դիմել բժշկին:

Բացի այդ, այս հիվանդությունը կարող է ունենալ նաև «տեսանելի» ախտանշաններ, որոնց շարքին են դասվում մաշկային ցանն ու բշտիկները, մազերի խամրածությունն ու մազաթափությունը, մաշկի թեփոտվածությունը, եղունգների փխրունությունը, ինչպես նաև շուրթերի եզրերին առաջացած ճաքերը: Նման ախտանշանների դեպքում անհրաժեշտ է անհապաղ խորհրդակցել բժշկի հետ, պարզել դրանց առաջացման պատճառն ու սկսել բուժումը: Նաև խորհուրդ է տրվում հարստացնել սննդակարգը օրգանիզմին անհրաժեշտ միկրոտարրերով ու վիտամիններով հարուստ սննդամթերքով:

Ավիտամինոզի դրսևորումները մաշկի վրա

Ավիտամինոզը կարող է խիստ բացասաբար ազդել մարդու մաշկի և արտաքին տեսքի վրա: Այս հիվանդության դեպքում մաշկը գունատվում է, խամրում, գրգռվում ու բորբոքվում: A, C և E վիտամինների պակասի հետևանքով մաշկի վրա կարող են բշտիկներ ու ցան առաջանալ, ուստի այս տարրերով հարուստ սննդամթերքը կարող է շատ կարևոր լինել:

A, C, E և D վիտամինների դեֆիցիտը կարող է դրսևորվել մաշկի չորությամբ, թեփոտվածությամբ ու ճաքերով: Այս ախտանշանները ոչ միայն արագացնում են ծերացման գործընթացը, այլև կարող են դառնալ առողջական լուրջ խնդիրների առաջացման պատճառ, ուստի հարկավոր է շատ ուշադիր լինել:

B12 վիտամինի դեֆիցիտի դեպքում ակտիվանում է ճարպագեղձերի աշխատանքը, ի հայտ են գալիս բշտիկներ, կարմրություն ու անոթային «աստղիկներ», որոնք կարող են լրջորեն ախտահարել դեմքի մաշկը: Հաճախ ռիբոֆլավինի պակասը դրսևորվում է դեպրեսիաներով, նյարդային խանգարումներով, տեսողության վատացումով ու գաստրիտի սրմամբ:

Վիտամին E-ի պակասը հանգեցնում է մաշկային ձգվածքների առաջացման: Այս դեպքում նման խնդիրներից խուսափելու համար խորհուրդ է տրվում հարստացնել սննդակարգը B6 և E վիտամիններով հարուստ սննդամթերքով:

Ավիտամինոզի դրսևորումները ձեռքերի վրա

Այս հիվանդության դեպքում բնորոշ ախտանշաններ են ի հայտ գալիս նաև ձեռքերի վրա: Սովորաբար նման ախտանշանները պայմանավորված են լինում A, C, E և D վիտամինների դեֆիցիտով: Այս դեպքում նկատվում է.

·        մաշկի չորություն,

·        մաշկի թեփոտվածություն,

·        մաշկային ճաքեր,

·        քոր:

Բացի այդ, ձեռքերի վնասված մաշկը բորբոքվում է և երկար ժամանակ չի ապաքինվում, հաճախ շերտազատվում է, ձեռքերի վրա ի հայտ են գալիս բազմաթիվ կնճիռներ, իսկ եղունգները դառնում են փխրուն ու թույլ:

Նման ախտանշանների դեպքում խորհուրդ է տրվում ընդունել պոլիվիտամիններ, իսկ սննդակարգը հարստացնել վիտամիններով հարուստ սննդամթերքով:

Նյութի աղբյուրը՝ healthinfo.ua