Պարզ քայլեր, որոնք կօգնեն պահպանել առողջությունն ու ժամանակին հայտնաբերել հիվանդությունը. իսրայելցի բժիշկների խորհուրդները

Վերջին ժամանակներում հաճախ են գովազդվում նոր տեխնոլոգիաները, որոնք կօգնեն բուժել ծանր հիվանդներին կամ բարելավել նրանց կյանքի որակը, սակայն քչերն են գիտակցում, որ բուժման այդ մեթոդները հնարավորություն են տալիս օգնել հիվանդին միայն հիվանդության ուշ փուլերում, մինչդեռ բուժման լավագույն միջոցը խնդիրը ժամանակին հայտնաբերելն է:

Վաղ ախտորոշումը թույլ է տալիս ազատվել հիվանդությունից մինչ դրա զարգացումն ու տարածումը: Նման դեպքերում բուժման պարզ պրոցեդուրաները շատ ավելի հասանելի են և կարող են շատ արդյունավետ լինել: Բացի այդ, սա հնարավորություն է տալիս խուսափել հետագայում թանկարժեք պրոցեդուրաներից և չվատնել բազմաթիվ տարիներ բուժման վրա:

Սակայն խնդիրը ժամանակին հայտնաբերելու համար մարդը պետք է տեղեկացված լինի և իմանա այս կամ այն հիվանդության ախտանշանները: Հարկ է հիշել, որ մասնագետին անհրաժեշտ է դիմել ցանկացած կասկածելի ախտանշանի դեպքում և հստակ իմանալ, թե որոնք են արդյունավետ ախտորոշման լավագույն մեթոդները:

Այս ոլորտում մեծ հաջողությունների են հասել իսրայելցի բժիշկները, ուստի ձեր ուշադրությանն ենք ներկայացնում նրանց խորհուրդները, որոնք կօգնեն պահպանել առողջությունն ու ժամանակին հայտնաբերել խնդիրը:

1.      40 տարեկանից հետո և՛ կանայք, և՛ տղամարդիկ պետք է արյան ընդհանուր անալիզ հանձնեն, ինչը կօգնի հայտնաբերել առողջական բազմաթիվ լուրջ խնդիրներ: Օրինակ՝ հեմոգլոբինի ցածր մակարդակի դեպքում բժիշկը պետք է փորձի գտնել նման խանգարման պատճառը, քանի որ այդ ցուցանիշը կարող է նորմայից ցածր լինել աղիներում կամ ստամոքսում արյունահոսությունների, խոցերի և անգամ օնկոլոգիական հիվանդությունների դեպքում:

2.      50 տարեկանից հետո տղամարդիկ պետք է անպայման տարեկան մեկ անգամ բուժզննում անցնել ուրոլոգի մոտ (շագանակագեղձի հետազոտություն) և հանձնեն անալիզ, որը թույլ կտա հայտնաբերել շագանակագեղձի քաղցկեղի մասին վկայող օնկոմարկերները:

3.      40 տարեկանից հետո կանայք երկու տարին մեկ պետք է պրոֆիլակտիկ մամոգրաֆիա անցնեն և տարեկան մեկ անգամ խորհրդակցեն գինեկոլոգի և մամոլոգի հետ: Բացի այդ, հարկավոր է նաև հանձնել պապ քսուքի անալիզ, քանի որ մարդու պապիլոմավիրուսը հաճախ հանգեցնում է արգանդի վզիկի քաղցկեղի:

4.      50 տարեկանից հետո և՛ կանայք, և՛ տղամարդիկ պետք է անպայման տարեկան մեկ անգամ գաստրոսկոպիկ և կոլոնոսկոպիկ հետազոտություն անցնեն: Սա թույլ կտա համոզվել, որ աղիներում պոլիպներ չկան, քանի որ դրանք հաճախ վերափոխվում են՝ վերածվելով քաղցկեղի ուռուցքների: Բացի այդ, խորհուրդ է տրվում նաև հանձնել կղանքի անալիզ, ինչը թույլ կտա ժամանակին հայտնաբերել կոլոռեկտալ քաղցկեղը:

5.      Օնկոլոգիական հիվանդությունների հանդեպ ժառանգական նախատրամադրվածության դեպքում խորհուրդ է տրվում խորհրդակցել գենետիկի հետ, որը կնշի այն անալիզներն ու ստուգումները, որոնք հարկավոր է անցնել:

6.      Բացի այդ, ոչ պակաս կարևոր է նաև տարեկան մեկ անգամ մաշկաբանի հետ խորհրդակցելն ու բուժզննում անցնելը՝ հատկապես մաշկի վրա կասկածելի նորագոյացությունների առկայության դեպքում:

Առհասարակ՝ մասնագետները նշում են, որ անհրաժեշտ է շատ ուշադիր լինել օրգանիզմի տված ախտանշանների հանդեպ: Հարկ է հիշել, որ ցանկացած փոփոխություն (փորկապություն, արտասովոր արյունահոսություններ, խալերի չափի ու ձևի կտրուկ փոփոխություն և այլն) կարող է վկայել առողջական լուրջ խնդրի մասին, ուստի դրանք ոչ մի դեպքում չի կարելի անտեսել ու անուշադրության մատնել:

Նյութի աղբյուրը՝ takprosto.cc