Առողջական ինչ խնդիրներ կարող են առաջանալ սեքսի բացակայության դեպքում

Ուսումնասիրությունները ցույց են տվել, որ սեքսի և մարդու առողջական վիճակի միջև կա ակնհայտ կապ: Մասնագետները վաղուց են պարզել, որ սեքսն օգնում է ազատվել սթրեսից, բարելավում է իմունային համակարգի աշխատանքը, բարելավում է սրտանոթային համակարգի աշխատանքը, մեղմում է ցավն ու նվազեցնում բորբոքումները, ինչպես նաև նվազեցնում է քաղցկեղի որոշ տեսակների առաջացումը: Սակայն իրականում այն շատ ավելի կարևոր է առողջության համար, իսկ սեքսից հրաժարվելը կարող է բազմաթիվ տհաճ հետևանքներ ունենալ:

Էրեկտիլ դիսֆունկցիայի առաջացման հավանականության բարձրացում

Ուսումնասիրությունները ցույց են տվել, որ շաբաթական մեկ անգամից պակաս սեքսով զբաղվող տղամարդկանց մոտ ավելի բարձր է էրեկտիլ դիսֆունկցիայի առաջացման հավանականությունը:

Քաշի կտրուկ փոփոխություն

Երբ մարդը սեռական զուգընկեր է փնտրում, նա ավելի ուշադիր է լինում իր արտաքինի և կազմվածքի հանդեպ: Բացի այդ, քաշի տատանումները կարող են պայմանավորված լինել միայնության հետևանքով առաջացած դեպրեսիայով, որը հաճախ ստիպում է վնասակար սնունդ օգտագործել:

Գրավչության նվազում

Սեքսի բացակայությունը կարող է խիստ բացասաբար ազդել մարդու արտաքինի և գրավչության վրա: Սեքսով զբաղվելու դեպքում մարդու գլխուղեղն արտադրում է դոֆամին ու օքսիտոցին՝ հորմոններ, որոնք մարդուն երջանիկ են դարձնում, իսկ երջանիկ մարդը հաճախ է ժպտում և շատ ավելի գրավիչ է լինում: Այս հորմոնների պակասի դեպքում մարդն ավելի ընկճված է լինում, ինչն ազդում է նաև նրա գրավչության վրա:

Սեռական ցանկության նվազում

Լիբիդոյի նվազումը կարող է պայմանավորված լինել բազմաթիվ գործոններով, որոնց շարքին են դասվում տեստոստերոնի մակարդակի նվազումը, ֆիզիկական ակտիվությունը կամ դրա բացակայությունը, ինչպես նաև որոշ դեղամիջոցների ընդունումը: Սակայն սեռական ցանկության վրա բացասաբար կարող է ազդել նաև սեքսի բացակայությունը:

Հեշտոցի չորություն

Սեռական գրգռման ժամանակ կնոջ օրգանիզմի գեղձերը սկսում են հատուկ քսուք արտադրել, սակայն սեռական ցանկության բացակայության կամ երկար ժամանակ սեքսից հրաժարվելու դեպքում այդ քսուքը բավարար քանակությամբ չի արտադրվում, ինչը կարող է հանգեցնել հեշտոցի չորության:

Մտավոր կարողությունների նվազում

Ուսումնասիրությունները ցույց են տվել, որ պարբերաբար սեքսով զբաղվելու դեպքում գլխուղեղում նոր նեյրոններ են արտադրվում, ինչը բարելավում է կոգնիտիվ ֆունկցիաները և կանխում է հիշողության կորուստը:

Շագանակագեղձի քաղցկեղի առաջացման հավանականության բարձրացում

Հետազոտությունները ցույց են տվել, որ ամսական ավելի քան 20 անգամ սեքսով զբաղվող տղամարդկանց մոտ շագանակագեղձի քաղցկեղի առաջացման հավանականությունը նվազում է 33%-ով:

Քնի հետ կապված խնդիրներ

Այն տղամարդիկ, որոնք սեքսով են զբաղվում շաբաթական 3-4 անգամ, այնուհետև դադարում են սեքսով զբաղվել, կարող են բախվել քնի խանգարումներին: Սա պայմանավորված է սեքսի ժամանակ տղամարդկանց օրգանիզմում արտադրվող այնպիսի քիմիական նյութերով, ինչպիսին են օքսիտոցինը, սերոտոնինը և պրոլակտինը: Օրինակ՝ պրոլակտինը պատասխանատու է սեռական բավարարվածության ու քնկոտության համար, ուստի այս տարրի պակասի դեպքում կարող են ի հայտ գալ քնի հետ կապված խնդիրներ:

Նյութի աղբյուրը՝ medic.ua