Ինչ է արտարգանդային հղիութունը. խնդրի առաջացման պատճառները, ախտանշաններն ու կանխարգելման միջոցները

Արտարգանդային հղիությունը բեղմնավորված ձվաբջջի զարգացումն է արգանդի խոռոչից դուրս: Առավել հաճախ ձվաբջիջը սկսում է զարգանալ ֆալոպյան փողերից որևէ մեկում: Առհասարակ՝ արտարգանդային հղիությունը խիստ վտանգավոր է կնոջ համար, քանի որ ժամանակին չհայտնաբերելու և միջոցներ չձեռնարկելու դեպքում կարող է հանգեցնել փողի պատռվածքի և արյունահոսության:

Արտարգանդային հղիության ախտանշանները

Արտարգանդային հղիության դեպքում ախտանշանները սկսում են ի հայտ գալ հղիության 5-14-րդ շաբաթում: Առավել հաճախ հանդիպող ախտանշաններն են.

·        արյունոտ արտադրությունն ու արյունահոսությունը,

·        որովայնի ստորին հատվածի մղկտուն ցավը,

·        սրտխառնոցն ու փսխումը,

·        թուլությունը,

·        միզելիս առաջացող ցավոտ զգացողությունները (երբեմն),

·        առատ քրտնարտադրությունը,

·        գլխապտույտը,

·        գունատությունը:

Արտարգանդային հղիության պատճառները

Նման խնդիրը որպես կանոն պայմանավորված է լինում արգանդափողերի աշխատանքի խանգարմամբ, ինչի հետևանքով բեղմնավորված ձվաբջիջը չի կարողանում հասնել արգանդ և սկսում է զարգանալ՝ կպչելով փողի պատին: Սակայն սա արտարգանդային հղիության միակ պատճառը չէ, քանի որ նման խանգարման կարող են հանգեցնել նաև.

·        փոքր կոնքի օրգանների բորբոքային հիվանդությունները,

·        նախկինում ունեցած արտարգանդային հղիությունը,

·        արգանդափողերի տարբեր վիրահատությունները,

·        հղիության արհեստական ընդհատումները,

·        կնոջ տարիքը (35 տարեկանից բարձր):

Արտարգանդային հղիության ախտորոշումը

Այս խնդրի ախտանշանները բավական ուշ են ի հայտ գալիս և ժամանակին չհայտնաբերելու դեպքում կարող են լուրջ խնդիրներ առաջանալ: Սա է պատճառը, որ նման հղիությունը հարկավոր է հայտնաբերել հնարավորինս շուտ (4-րդ շաբաթում): Սովորաբար հղությունը կարելի է հաստատել թեստերի և անալիզի միջոցով, սակայն արտարգանդային հղիության դեպքում հարկավոր են նաև հավելյալ հետազոտություններ, որոնց շարքին են դասվում.

·        գինեկոլոգիական հետազոտությունը,

·        արյան անալիզը (խորիոնիկ գոնադոտրոպին հորմոնի հայտնաբերման համար),

·        փոքր կոնքի օրգանների ուլտրաձայնային հետազոտությունը:

Արտարգանդային հղիության ախտոշումից հետո բժիշկն անմիջապես բուժում է նշանակում, որը կարող է լինել ինչպես դեղորայքային, այնպես էլ վիրահատական: Որպես կանոն՝ վաղ փուլերում հղիությունն ընդհատվում է հատուկ դեղամիջոցներով, մինչդեռ ավելի ուշ փուլերում իրականացվում է վիրահատական միջամտություն:

Կանխարգելումը

Արտարգանդային հղիության հավանականությունը նվազեցնելու համար հարկավոր է անպայման հետևել բժիշկների ցուցումներին: Մասնագետների խոսքով՝ նման խնդրին չբախվելու համար հարկավոր է.

·        ժամանակին բուժել փոքր կոնքի օրգանների և սեռական օրգանների հիվանդությունները,

·        հետևել ճիշտ սննդակարգին,

·        ընդունել բեղմնականխիչ դեղահաբեր,

·        խուսափել անկանոն սեռական կապերից,

·        խուսափել ծխախոտից,

·        չընդհատել հղիությունը:

Նյութի աղբյուրը՝ ginekology-md.ru