Որոնք են երեխաների մոտ առաջացող ականջաբորբի տեսակները, ախտանշաններն ու առաջացման պատճառները

Ականջաբորբն ականջի բորբոքումն է: Այս հիվանդությունը կարող է առաջանալ ինչպես մեծահասակների, այնպես էլ երեխաների մոտ: Բժիշկները տարբերում են ականջաբորբի մի քանի տեսակ: Դրանք են.

1.      Արտաքին ականջաբորբ

Այս տեսակն առաջանում է ականջի մեջ որևէ վարակ ընկնելու հետևանքով (օրինակ՝ լողալիս կամ նույնիսկ ականջները մաքրելիս): Նման դեպքերում բարձրանում է մարմնի ջերմաստիճանը, առաջանում է բորբոքային գործընթաց, նկատվում է դող ու ախորժակի կորուստ: Բացի այդ, կարող են առաջանալ բշտիկներ և կարմրածություն: Բուժումը ժամանակին սկսելու դեպքում կարելի է խուսափել տհաճ հետևանքներից:

2.      Միջին ականջաբորբ

Այս տեսակը կարող է պայմանավորված լինել քթըմպանի բորբոքային գործընթացներով, մրսածությամբ կամ գերտաքացմամբ, ինչպես նաև ադենոիդների առկայությամբ: Բացի այդ, միջին ականջաբորբի առաջացման պատճառ կարող է դառնալ երեխային կրծքով սխալ կերակրելը: Առավել հաճախ հիվանդությունը դրսևորվում է գիշերվա ժամերին: Երեխան սկսում է ճչալ, խանգարվում է դեֆեկացին, բարձրանում է մարմնի ջերմաստիճանը, ինչի հետևանքով առաջանում է փսխում: Ընդ որում՝ փոքրիկն անընդհատ ձեռք է տալիս ականջ և շարժում է գլուխը: Նման ախտանշանների դեպքում հարկավոր է շտապ դիմել մասնագետին, այլապես հետագայում կարող են ի հայտ գալ էլ ավելի լուրջ խնդիրներ:

3.      Սուր թարախային միջին ականջաբորբ

Այս դեպքում ցավը մեղմվում է և սկսում է թարախ արտադրվել, ինչը նշանակում է, որ որ թմբկաթաղանթը պատռվել է: Նման ախտանշանների դեպքում հարկավոր է անհապաղ դիմել բժշկին:

4.      Քրոնիկ միջին ականջաբորբ

Քրոնիկ միջին ականջաբորբի առաջացման պատճառ կարող է դառնալ որևէ ախտաբանության հետևանքով օրգանիզմի դիմադրողականության մակարդակի իջեցումը: Այս դեպքում կարող է վատանալ լսողությունը և պարբերաբար թարախ արտադրվել:

Ականջաբորբի բուժումը

Բուժզննման ժամանակ բժիշկը սովորաբար նշանակում է հակաբիոտիկների կուրս: Քրոնիկ ականջաբորբի դեպքում նշանակվում են հակաբիոտիկներ պարունակող կաթիլներ՝ նախատեսված ականջի համար, որոնք ցավազրկում են ու ազատում այտուցներից: Սուր ականջաբորբի ժամանակ մասնագետները նշանակում են քթըմպանի համար նախատեսված անոթները նեղացնող կաթիլներ:

Թարախի բացակայության դեպքում կարելի է օգտագործել տաքացնող կոմպրեսներ (օղի կամ սպիրտի ջրային լուծույթ), որոնք, սակայն, հարկավոր է դնել ականջի շուրջը, այլ ոչ թե դրա վրա: Նման կոմպրեսները կարելի է պահել առնվազն երկու ժամ: Բացի այդ, ականջը կարելի է տաքացնել նաև կապույտ լամպի միջոցով (առավելագույնը 15 րոպե և օրական 3 անգամ): Սակայն, հարկ է հիշել, որ թարախի առկայության դեպքում տաքացնող պրոցեդուրաներն ու կաթիլները հակացուցված են:

Ականջաբորբի կանխարգելումը

·        Հարկավոր է հետևել երեխայի սննդակարգին,

·        Փոքրիկին կրծքով կերակրելիս պետք է ուշադիր լինել և սխալ չկերակրել,

·        Անհրաժեշտ է հետևել երեխայի ականջի վիճակին,

·        Նաև պետք է հետևել ականջի հիգիենային,

·        Ջրային պրոցեդուրաներից հետո անպայման հարկավոր է սրբել փոքրիկի ականջը սրբիչով և լավ չորացնել,

·        Շատ կարևոր է նաև միջանցիկ քամուց խուսափելը,

·        Մրսածության դեպքում բուժումը հարկավոր է ժամանակին սկսել ՝ հետագայում ականջների հետ կապված բարդություններից խուսափելու համար:

Հարկ է հիշել, որ անհրաժեշտ է միշտ ուշադիր լինել և հետևել երեխայի առողջական վիճակին: Ցանկացած հիվանդություն պետք է ամբողջությամբ բուժել՝ հետագայում նմանատիպ հիվանդություններց խուսափելու համար:

Նյութի աղբյուրը՝ medicinaportal.com