15 ախտանշան, որոնք ոչ մի դեպքում չի կարելի անտեսել

Հիվանդությունների և առողջական խնդիրների ի հայտ գալու դեպքում օրգանիզմը միշտ նախազգուշացնում է ախտանշանների միջոցով: Սակայն մարդիկ ոչ միշտ են դրանց պատշաճ ուշադրություն դարձնում, ինչն էլ հանգեցնում է լուրջ հետևանքների: Ձեր ուշադրությանն ենք ներկայացնում ախտանշաններ, որոնք ոչ մի դեպքում չի կարելի անուշադրության մատնել:

1.      Հոգնածություն

Հոգնածությունը բնական երևույթ է քնի պակասի և աշխատանքային ծանր գրաֆիկի դեպքում, սակայն եթե մարդը չի կարողանում ազատվել այս ախտանշանից անգամ լիարժեք հանգստից հետո, ապա խնդիրը շատ ավելի լուրջ է: Հարկ է հիշել, որ հոգնածությունը բավական տարածված ախտանշան է և կարող է վկայել տարբեր հիվանդությունների մասին: Սակայն բժիշկները նշում են, որ նման դեպքում հարկավոր է առաջին հերթին խորհրդակցել ներզատաբանի (էնդոկրինոլոգ) հետ և ստուգել վահանաձև գեղձը:

2.      Առատ քրտնարտադրություն

Մարզումներով կամ շոգ եղանակով պայմանավորված առատ քրտնարտադրությունը վտանգավոր չէ, սակայն մարզումների բացակայության ու օդի ոչ բարձր ջերմաստիճանի դեպքում քրտնարտադրության կտրուկ առատացումն ու շոգի զգացողությունը կարող է վկայել կորոնար (պսակաձև) զարկերակի խցանման մասին: Այս ախտանշանն անտեսելը կարող է հանգեցնել սրտամկանի կաթվածի, ուստի հարկավոր է հնարավորինս շուտ խորհրդակցել սրտաբանի հետ:

3.      Ստամոքսի այրոց

Ստամոքսի այրոցը սովորաբար պայմանավորված է լինում ընդունած սննդամթերքով, սակայն լինում են նաև դեպքեր, երբ կրծքավանդակում տարօրինակ այրոցը վայում է սրտի հետ կապված խնդիրների մասին, ուստի հարկավոր է ավելի ուշադիր լինել և խորհրդակցել սրտաբանի հետ:

4.      Քաշի կորուստ

Առանց դիետաների ու վարժությունների ավելորդ քաշից ազատվելու մասին շատերն են երազում, ուստի զարմանալի չէ, որ մարդիկ հաճախ պատշաճ ուշադրություն չեն դարձնում այս ախտանշանին: Սակայն հարկ է հիշել, որ քաշի կտրուկ ու անբացատրելի կորուստն օնկոլոգիական հիվանդությունների տարածված ախտանշաններից մեկն է, ուստի կարող է շատ վտանգավոր լինել:

5.      Կլման ակտի խանգարումներ

Եթե մարդը դժվարանում է կուլ տալ սնունդը, ապա մասնագետները խորհուրդ են տալիս դիմել գաստրոէնտերոլոգին, քանի որ այս ախտանշանը հաճախ է ի հայտ գալիս կերակրափողի քաղցկեղի դեպքում:

6.      Ցավոտ դաշտան

Ցավոտ դաշտանը բավական տարածված խնդիր է, որից կանայք սովորաբար ազատվում են ցավազրկողների միջոցով: Սա կարող է պայմանավորված լինել օրգանիզմի առանձնահատություններով, սակայն կարող է վկայել նաև այնպիսի լուրջ հիվանդությունների մասին, ինչպիսին են էնդոմետրիոզը, ձվարանների պոլիկիստոզային համախտանիշը և այլն:

7.      Փորկապություն

Սովորաբար փորկապությունը պայմանավորված է լինում սխալ սննդակարգով ու ջրի պակասով, սակայն, այնուամենայնիվ, հարկավոր է ավելի ուշադիր լինել, քանի որ այս ախտանշանը կարող է վկայել նաև շաքարային դիաբետի մասին:

8.      Քնի պակաս

Եթե մարդը քնում է օրական ընդամենը 4-5 ժամ, ապա գլխացավերն ու հոգնածությունը բնական երևույթ են: Սակայն եթե այդ ախտանշաններն ի հայտ են գալիս անգամ լիարժեք հանգստից հետո, ապա հնարավոր է, որ խնդիրը պայմանավորված է քնի օբստրուկտիվ ապնոէով: Այս խնդիրը շատ հաճախ ուղեկցվում է խռմփոցով և կարող է լուրջ հետևանքներ ունենալ, ուստի հարկավոր է անպայման դիմել մասնագետին և միջոցներ ձեռնարկել:

9.      Մաշկի չորություն

Մաշկի ձգվածությունը, թեփոտվածությունն ու քորը կարող են պայմանավորված լինել ինչպես եղանակային անբարենպաստ պայմաններով ու ալերգիկ ռեակցիայով, այնպես էլ վահանաձև գեղձի աշխատանքի խանգարումներով և անգամ աուտոիմունային հիվանդություններով, ուստի երբեք չի կարելի անուշադրության մատնել նման լուրջ ախտանշանը:

10.  Ոտքերի ու ձեռքերի սառնություն

Սա կարող է պայմանավորված լինել ինչպես օդի ցածր ջերմաստիճանով, այնպես էլ Ռեյնոյի համախտանիշով, որի դեպքում տուժում են մատների անոթները:

11.  Եղունգների ձևի ու գույնի փոփոխություն

Առողջական լուրջ խնդիրների մասին կարող են վկայել նաև եղունգների գույնի ու ձևի փոփոխությունները: Օրինակ՝ հարկ է հիշել, որ կորացած եղունգները վկայում են անեմիայի (սակավարյունություն) մասին, մինչդեռ եղունգների գույնի փոփոխությունը խոսում է երիկամների հետ կապված խնդիրների մասին, իսկ հաստացումը պայմանավորված է լինում սրտի և թոքերի հետ կապված խնդիրներով, ինչի հետևանքով հյուսվածքները չեն ստանում բավարար քանակությամբ թթվածին:

12.  Գունատություն

Նման ախտանշանի դեպքում խորհուրդ է տրվում անպայման արյան անալիզ հանձնել և ստուգել հեմոգլոբինի մակարդակը: Բանն այն է, որ գունատությունը երկաթդեֆիցիտային անեմիայի հիմնական ախտանշաններից մեկն է: Սակայն, բարեբախտաբար, այս հիվանդությունից կարելի է հեշտությամբ ազատվել ճիշտ սննդակարգի և երկաթի հավելումների միջոցով:

13.  Ձեռագրի փոփոխություն

Ձեռագրի փոփոխությունը կարող է պայմանավորված լինել ձեռքերի դողով, որն էլ կարող է վկայել առողջական տարբեր խնդիրների (այդ թվում նաև Պարկինսոնի հիվանդության) մասին:

14.  Գլխապտույտներ

Երկար ժամանակ նույն դիրքով նստած լինելուց հետո կտրուկ կանգնելու կամ պարզապես ուղղվելու դեպքում հաճախ է գլխապտույտ առաջանում, ինչը վտանգավոր չէ: Սակայն եթե այս խնդիրն ի հայտ է գալիս չափազանց հաճախ, ապա հարկավոր է ավելի զգույշ լինել, քանի որ սա նույնպաս կարող է պայմանավորված լինել անեմիայով:

15.  Ոտքերի ջղաձգումներ

Ջղաձգումները սովորաբար պայմանավորված են լինում չափազանց մեծ ծանրաբեռնվածությամբ և դադարում են անհանգստացնել ծանրաբեռնվածությունը փոքր-ինչ նվազեցնելու դեպքում: Սակայն եթե դրանք առաջանում են անգամ պարզապես աստիճաններով բարձրանալիս, ապա հարկավոր է խորհրդակցել բժշկի հետ, քանի որ այս ախտանշանը կարող է վկայել ստորին վերջույթների զարկերակներում թրոմբների առաջացման մասին:

Նյութի աղբյուրը՝ lifehacker.ru