Սերմնաժայթքման խանգարումների տեսակներն ու առաջացման պատճառները

Ինչպես գրում է urolog.am-ը, սերմնաժայթքման խանգարումները տղամարդու սեռական ֆունկցիայի խանգարումներից են, միաժամանակ՝ տղամարդկանց չբերության կարևոր պատճառներից մեկը: Լինում են մի քանի տեսակ.

Անէակուլացիա (սերմի լրիվ բացակայություն)

Երբ սերմը չի անցնում սերմնաբշտերից և շագանակագեղձից դեպի միզուկ: Այս վիճակը կարող է կապված լինել ողնաշարի վնասվածքների, պարկինսոնյան հիվանդության, պատանեկան շաքարախտի, որոշ դեղամիջոցների, (հակագերճնշումային, հակադեպրեսանտների) և ալկոհոլի չարաշահման հետ:

Անօրգազմիա (օրգազմի բացակայություն)

Այս վիճակը կարող է հասցնել անէակուլացիայի: Այս երկու վիճակները սերտորեն փոխկապված են: Պատճառները մեծամասամբ հոգեբանական են:

Ուշացած սերմնաժայթքում

Սա այն վիճակն է, երբ անհրաժեշտ է էրեկտիլ առնանդամին ավելորդ ստիմուլացիա` սերմնաժայթքում և օրգազմ ունենալու համար: Այս դեպքում հանդիպում է նաև անօրգազմիան (օրգազմի բացակայություն): Լինում է ողնաշարի ոչ լրիվ ախտահարումների, առնանդամի նյարդի վնասումների, նաև դեղորայքային կողմնակի ազդեցությունների հետևանքով:

Ետընթաց սերմնաժայթքում

Այսինքն, սա այն վիճակն է, երբ սերմը հոսում է դեպի միզապարկ, և տղամարդը սերմնաժայթքում չի ունենում: Սա կարող է ուղեկցվել օրգազմի զգացողության նվազմամբ: Պատճառներն են՝ ողնաշարի վնասվածքները, պատանեկան շաքարախտը, հաստ և ուղիղ աղիքի վիրահատությունները, միզուկի խցանումները, շագանակագեղձի վիրահատությունները, դեղորայքային կողմնակի ազդեցությունները:

Ասթենիկ սերմնաժայթքում

Սա թուլացած, ընդհատվող սերմնաժայթքումն է. հիմնական պատճառները միզուկի նեղացումներն են:

Վաղաժամ սերմնաժայթքում

Սա սերմնաժայթքումը զսպելու անկարողությունն է՝ կարճատև պենետրացիայից հետո: Այս երևույթը կարող է պատահել առանց սեռական հարաբերության, այսինքն՝ նույնիսկ երբեմն տեսողական գրգռման հետևանքով: Կարող է լինել օրգանական կամ հոգեկան պատճառներով, ժառանգական կամ ձեռքբերովի, զուգընկերոջից կախյալ, կամ՝ ոչ: Հատկապես ուշադրության արժանի է միզասեռական բորբոքումների հետևանքով առաջացած վաղաժամ սերմնաժայթքումը:

Ցավոտ սերմնաժայթքում

Սա մեծամասամբ ձեռքբերովի հիվանդություն է և կարող է առաջացնել սեռական ֆունկցիայի տարբեր աստիճանի խանգարումներ: Պատճառներն են՝ սերմնածորանի խցանումները, պրոստատիտը, միզուկի բորբոքումները և հոգեբանական գործոնները:

Վերոնշյալ հիվանդությունների ախտորոշման համար անհրաժեշտ է մանրազնին վերհուշ հավաքել, կատարել մի շարք լաբորատոր քննություններ: Բուժման համար կիրառվում է պատճառագիտական, ախտանշային, գործիքային և դեղորայքային բուժում: Սերմնաժայթքման խանգարումների բուժումն ապահովում է տղամարդու սեռական և վերարտադրողական ֆունկցիաները, հետևաբար՝ տղամարդու ու ընտանիքի առողջության գրավականն է: