5 ախտանշան, որոնք վկայում են օրգանիզմում հանքանյութերի և վիտամինների դեֆիցիտի մասին

Առողջական ցանկացած խնդրի դեպքում օրգանիզմն անմիջապես արձագանքում է՝ հուշելով դրանց առկայության մասին ախտանշանների միջոցով: Այն արձագանքում է նաև վիտամինների ու հանքանյութերի դեֆիցիտի դեպքում, քանի որ այդ կարևոր տարրերի պակասը կարող է լուրջ խնդիրներ առաջացնել:

Ներկայում շատ տարածված են տարատեսակ դիետաները, որոնք սխալ կենսակերպի հետ հատեղելու դեպքում կարող են հանքանյութերի ու վիտմինների լուրջ դեֆիցիտ առաջացնել: Հարկ է հիշել, որ այս տարրերը կենսական նշանակություն ունեն օրգանիզմի համար, ուստի հարկավոր է միշտ հետևել օրգանիզմում դրանց մակարդակին:

Ձեր ուշադրությանն ենք ներկայացնում 5 ախտանշան, որոնք կարող են պայմանավոևված լինել վիտամինների դեֆիցիտով:

·        Ճաքեր բերանի անկյուններում

Այս ախտանշանը վկայում է երկաթի, ցինկի, ինչպես նաև В3, В2 և В12 վիտամինների պակասի մասին: Այն հաճախ ի հայտ է գալիս բուսակերների մոտ, քանի որ օրգանիզմը չի ստանում բավարար քանակությամբ երկաթ ու ցինկ:

Այս խնդրից ազատվելու համար հարկավոր է պարզապես հարստացնել սննդակարգը թռչնամսով, սաղմոնով, թունա ձկով, հավկիթով, ոստրեներով ու կակղամորթներով: Շատ օգտակար կարող են լինել նաև գետնանուշը, ոսպն ու լոբազգիները:

Հարկ է հիշել, որ երկաթը շատ ավելի լավ է յուրացվում վիտամին C-ի հետ ընդունելու դեպքում, որն օգնում է նաև պայքարել վարակների դեմ: Սա է պատճառը, որ նշված սննդամթերքի հետ մեկտեղ հարկավոր է օգտագործել նաև այնպիսի բանջարեղեն, ինչպիսին են բրոկոլին, կարմիր պղպեղ և ծաղկակաղամբը:

·        Բշտիկանման նորագոյացություններ ձեռքերի ու ազդրերի վրա

Նման նորագոյացություններն ի հայտ են գալիս A և D վիտամինների և օգտակար ճարպաթթուների պակասի հետևանքով: Այս դեպքում հարկավոր է նվազեցնել տրանսճարպերի գործածությունն ու օգտագործել օգտակար ճարպերով հարուստ սննդամթերք: Խորհուրդ է տրվում հարստացնել սննդակարգը սաղմոնով, սարդիններով, հունական ընկույզով ու նուշով:

Բացի այդ, վիտամին A-ի դեֆիցիտից ազատվելու համար հարկավոր է օգտագործել նաև կանաչեղեն ու բանջարեղեն (գազար, քաղցր կարտոֆիլ, կարմիր պղպեղ և այլն):

·        Մազաթափություն ու կարմիր ցան դեմքի մաշկին

Նման խնդիրները վկայում են, որ օրգանիմն ունի բիոտինի (վիտամին B7) կարիք: Օրգանիզմը կուտակում է յուղի մեջ լուծվող վիտամինների պաշարները (А, D, Е, К), մինչդեռ B խմբի վիտամինների պաշարները հարկավոր է պարբերաբար լրացնել: Այս դեպքում խորհուրդ է տրվում սննդակարգում ներառել սաղմոն, ավոկադո, սնկեր, ծաղկակաղամբ, սոյա, ընկուզեղեն, ազնվամորի, բանան և հավկիթ:

·        Վերջույթների թմրածություն ու ծակծկոց

Թմրածությունն ու ծակծկոցը վկայում են B9, В6, В12 վիտամինների պակասի մասին: Այս խնդիրն անմիջականորեն կապված է պերիֆերիկ նյարդերի հետ, որոնց վերջավորությունները շատ մոտ են մաշկին: Նշված ախտանշանները կարող են ուղեկցվել անհանգստությամբ, դեպրեսիաներով, հոգնածությամբ ու հորմոնալ դիսբալանսով:

Այս խնդիրներից ազատվելու համար հարկավոր է հնարավորինս շատ սպանախ, ծնեբեկ, ճակնդեղ, լոբի ու թուրինջ օգտագործել: Բացի այդ, շատ օգտակար կլինեն նաև հավկիթը, ծովամթերքն ու թռչնամիսը:

·        Սրունքների ու ազդրերի ջղաձգումներ

Ջղաձգումները պայմանավորված են լինում մագնեզիումի, կալցիումի և կալիումի պակասով: Նման ախտանշան կարող է ի հայտ գալ ֆիզիկական ծանրաբեռնվածությունից հետո, քանի որ առատ քրտնարտադրության հետ մեկտեղ օրգանիզմը կորցնում է օգտակար հանքանյութերը:

Այս տարրերի դեֆիցիտից ազատվելու համար հարկավոր է սննդակարգում ներառել բանան, նուշ, պնդուկ, բրոկոլի և սպանախ:

Նյութի աղբյուրը՝ med2.ru