Որոնք են տարեց մարդկանց մոտ գլխապտույտի առաջացման հիմնական պատճառները

Տարեց մարդու համար գլխապտույտը լուրջ խնդիր է: Ընկնելու վախից նրանք հաճախ նույնիսկ նախընտրում են մնալ տանը: Սակայն այս խնդրից կարելի է ազատվել՝ գլխապտույտի իրական պատճառը պարզելու դեպքում:

Գոյություն ունի տարեց հասակում առաջացող գլխապտույտի մի քանի տեսակ: Դրանց շարքին են դասվում.

Բարորակ դիրքային պարոքսիզմալ գլխապտույտ

Գլխապտույտի այս տեսակը պայմանավորված է նրանով, որ վեստիբուլյար անալիզատորի մի հատվածում գտնվող միկրոսկոպիկ բյուրեղիկները հայտնվում են մեկ այլ հատվածում՝ առաջացնելով գլխապտույտ գլխի դիրքը փոխելիս:

Ի տարբերությունը երիտասարդ ու միջին տարիքի մարդկանց, տարեցների մոտ բարորակ դիրքային պարոքսիզմալ գլխապտույտն արտահայտվում է միայն անկայունության զգացումով և քայլելիս հավասարակշռության կորստով:

Հիվանդության բուժման համար գոյություն ունի մի պրոցեդուրա, որի ընթացքում բժիշկը հատուկ շարժումների միջոցով բյուրեղիկները վերադարձնում է նախկին դիրքին:

Մենյերի հիվանդություն

Սա ներքին ականջի քրոնիկական հիվանդություն է, որը հանգեցնում է դրա խոռոչում հեղուկի քանակի ավելացման, նոպայանման գլխապտույտների և լսողության աստիճանաբար թուլացման:

Այս հիվանդության դեպքում գլխապտույտները նոպայանման են լինում: Ընդ որում՝ դրանց հաճախականությունը նվազում է լոսողության վատացման հետ մեկտեղ:

Այս խնդիրը հիմնականում բուժվում է դեղամիջոցներով: Եթե դրանք չեն օգնում կիրառվում է լաբիրինթէկտոմիա, որի ժամանակ հեռացվում կամ «անջատվում» է ներքին ականջի ախտահարված անդաստակային ապարատը:

Վեստիբուլյար նեյրոնիտ

Հիվանդության առաջացման պատճառ է դառնում բորբոքային գործընթացը, որի դեպքում ախտահարվում է անդաստակային նյարդը:

Վեստիբուլյար նեյրոնիտը դրսևորվում է գլխապտույտի մեկանգամյա նոպայով, որի ինտենսիվությունն ավելանում է դիրքի փոփոխությունից և նվազում անշարժ մնալու դեպքում:

Հիվանդության սուր շրջանում կիրառվում է սիմպտոմատիկ թերապիա, իսկ վերականգնողական շրջանում՝ անդաստակային ապարատը մարզող հատուկ վարժություններ:

Անդաստակային միգրեն

Համաձայն մի տեսության՝ միգրենի նոպաների ժամանակ գլխուղեղի կեղևի նեյրոնների ակտիվության փոփոխությունը կարող է հասնել գլխուղեղի այն հատվածին, որտեղ գտնվում են հավասարակշռության զգացման համար պատասխանատու կենտրոնները:

Մյուս տեսության համաձայն՝ միգրենի ժամանակ գլխուղեղի բնի այն հատվածներում, որոնք կապված են անդաստակային համակարգի հետ, արտազատվում են կենսաբանական ակտիվ նյութեր, ինչի հետևանքով էլ առաջանում է գլխապտույտ:

Այս դեպքում գլխապտույտը կարող է նույնիսկ չուղեկցվել գլխացավով: Բուժումն իրականացվում է հակադեպրեսանտներով, հակաէպիլեպտիկ դեղերով ու բետա-ադրենաբլոկատորներով:

Կենտրոնական գլխապտույտ

Նման գլխապտույտների պատճառ կարող է դառնալ գլխուղեղի կաթվածի կամ տրանզիտորային իշեմիկ գրոհի հետևանքով գլխուղեղի անդաստակային կենտրոնների արյան մատակարարման խանգարումը:

Խնդիրը դրսևորվում է գլխապտույտի նոպայով կամ կտրուկ առաջացած անկայունության զգացումով, որոնք սովորաբար ուղեկցվում են այլ նյարդաբանական խանգարումներով, թուլությամբ, խոսքի խանգարումներով, պատկերի երկակիությամբ:

Կենտրոնական գլխապտույտը բուժվում է այնպես, ինչպես գլխուղեղի կաթվածը կամ տրանզիտորային իշեմիկ գրոհը:

Նյութի աղբյուրը՝ aif.ru