Ինչո՞վ է խոլերան տարբերվում մյուս աղիքային վարակներից. վարակի աղբյուրը, ախտանշաններն ու կանխարգելումը

Խոլերան սուր, աղիքային վարակիչ հիվանդություն է, բնորոշ յուրօրինակ էնտերիտով և գաստրոէնտերիտով, ընդհանուր ինտոքսիկացիայով, ջրաաղային փոխանակության խանգարումով, օրգանիզմի ջրազրկումով, սիրտ-անոթային համակարգի գործունեության սրնթաց անկումով:

Մյուս աղիքային վարակներից տարբերվում է՝

1. կլինիկական ծանր ընթացքով

2. բարձր մահացությամբ 

3. համեմատաբար կարճ ժամանակաընթացքում զանգվածային բնույթ կրելու հատկությամբ

Վարակի աղբյուր է հանդիսանում հիվանդ մարդը կամ վարակակիրը, որոնք արտազատում են արտաքին միջավայր մեծ քանակությամբ խոլերայի հարուցիչներ:

Մարդը վարակվում է վարակված ջրի և սննդամթերքի օգտագործման հետևանքով, ինչպես նաև կեղտոտ ձեռքերի միջոցով: Վարակի տարածման գործում մեծ դեր ունեն ճանճերը: 

Տարբերակում են ջրային, սննդային և խառը բռնկումներ: Խառը բռնկումներն ավելի հաճախ են հանդիպում։ 

Վարակի գաղտնի շրջանը տևում է 1-5 օր (հաճախ 1-2 օր): Հիվանդությունը սկսվում է սուր, հանկարծակի սկսվող լուծով՝ առավելապես գիշերային և առավոտյան ժամերին: Խոլերայի ժամանակ փսխումն ի հայտ է գալիս լուծից հետո: Լուծը և փսխումը սովորաբար անցավ են, սակայն երբեմն դիտվում են ցավեր որովայնի շրջանում: Կախված հիվանդության ծանրության աստիճանից՝ լուծը (նմանվում է եփած բրնձաջրի) և փսխումը կարող են կրկնվել 2-20 անգամ օրվա ընթացքում: Հիվանդը գանգատվում է չհագեցող ծարավի զգացումից, վերին և ստորին վերջույթների մկանների տանջող ցավերից, որը կարող է ուղեկցվել ցնցումներով, ձայնի խռպոտությամբ, մարմնի ջերմաստիճանի անկումով՝ մինչև 34,5-35°C:

Նկատվում է զարկերակային ճնշման անկում, պուլսը թույլ լեցունությամբ, հաճախացած: Դիմագծերը սրված են, մաշկային ծածկույթները սառն են, նկատվում է ընդհանուր կապտություն, մաշկի ձգվածության (տուրգոր) անկում, ձեռքերը հիշեցնում են լվացարարի ձեռքեր: Հիվանդության ծանր ձևերը, որոնք ընթանում են խիստ ջրազրկումով (բուժման բացակայության դեպքում) կարող են ավարտվել մահով:

Բուժումը սկսելիս առաջին հերթին պետք է վերականգնել օրգանիզմի ջրաաղային հավասարակշռությունը: Բուժումն անհրաժեշտ է սկսել հիվանդության վաղ շրջանում (անմիջապես), հապաղումը կարող է ճակատագրական լինել հիվանդի համար:
Կանխարգելիչ միջոցառումները՝ խոլերայով հիվանդի հայտնաբերման (կասկածի) ժամանակ անհրաժեշտ է անմիջապես մեկուսացնել նրան հայտնաբերման վայրում՝ արգելելով շփումը հիվանդի հետ:

Անհրաժեշտ է պահպանել անձնական հիգիենայի կանոնները՝

- օգտագործել ջուր միայն անվտանգ աղբյուրներից

- մանրակրկիտ լվանալ միրգը և բանջարեղենը հոսող ջրի տակ

- օգտագործել համապատասխան ջերմային մշակման ենթարկված սննդամթերք

- լողալ միայն թույլատրելի վայրերում

- լվանալ ձեռքերն օճառով սնունդ ընդունելուց առաջ 

- պահպանել սննդամթերքը ճանճերից

- աղեստամոքսային համակարգի խանգարումների առաջին իսկ ախտանշանների ի հայտ գալու դեպքում անհապաղ դիմել բժիշկի