Որոնք են գլխացավի առաջացման ամենազարմանալի պատճառները

Գլխացավը խնդիր է, որի առաջացման պատճառ կարող է դառնալ նույնիսկ մեծ քանակությամբ սենդվիչ ուտելը, քնի պակասը կամ տաք ցնցուղը: Սովորաբար նման խնդրի դեպքում մարդիկ անմիջապես ցավազրկող դեղամիջոց են ընդունում, սակայն հարկ է հիշել, որ առաջին հերթին անհրաժեշտ է գտնել դրա առաջացման պատճառը: Շատ հնարավոր է, որ դա կօգնի նվազեցնել անհանգստացնող գլխացավերի հաճախականությունը կամ առհասարակ մեկընդմիշտ ազատվել դրանցից:

Հայտնի բրիտանացի նյարդաբան Ջայլս Էլրինգտոնի կարծիքով՝ գլխացավի բոլոր տեսակներն ունեն միևնույն կենսաբանական բացատրությունը: Նրա խոսքով՝ սա բացատրվում է գլխուղեղի անոթներում շատ զգայուն ընկալիչների վրա գործադրվող ազդեցությամբ: Մասնագետը նաև նշում է, որ չնայած տարածված կարծիքին, գլխացավը ոչ միշտ է վկայում գլխուղեղի ուռուցքի մասին և օնկոլոգիական հիվանդությունը հայտնաբերվում է միգրենից տառապող մարդկանց 1%-ից էլ քչի մոտ:

Բժիշկ Էլրինգտոնը նշել է գլխացավերի առաջացման մի քանի պատճառ, որոնց մասին շատերն անգամ գլխի չեն ընկնում: Դրանցից են.

Գեղեցկության սրահներ այցելելը. նման հաստատություններում մասնագետները հաճախորդի վարսերը լվանալիս հաճախ նրանց գլուխը սխալ դիրքով են պահում, ինչը խթանում է նյարդերից մեկը՝ դառնալով գլխացավի առաջացման պատճառ: Ընդ որում՝ ցավը կարող է ի հայտ գալ 1-2 օր անց: Նման խնդիր կարող է առաջանալ նաև այն մարդկանց մոտ, որոնք սիրում են զրուցել հեռախոսով՝ լսափողն ուսով ականջին սեղմած:

Հազը. հազը կարող է արդեն իսկ առկա գլխացավն էլ ավելի ուժգին դարձնել: Բոլոր գլխացավերի 1%-ը պայմանավորված է լինում հազով, որը բարձրացնում է ճնշումը գլխուղեղում: Սովորաբար դա ուղեկցվում է պարանոցի ցավով, հավասարակշռության ու տեսողության հետ կապված խնդիրներով, ինչպես նաև անքնությամբ:

Վազքուղով (մարզասարք) մարզվելը. նման մարզումների հետևանքով գլխի ու պարանոցի արյունատար անոթներն ուռչում են, ինչը նպաստում է ճնշման բարձրացմանը: Առավել հաճախ գլխացավերն առաջանում են միգրեններից տառապող մարդկանց մոտ:

Գլխացավի հնարավոր պատճառների շարքին են դասվում նաև տաք ցնցուղը (ջերմաստիճանի կտրուկ փոփոխություն), չափազանց ձիգ սանրվածքները, խոզապուխտով սենդվիչները (պարունակում են թիրամին ու կոնսերվանտներ, որոնք ուժեղացնում են արյան հոսքը դեպի գլխուղեղ), քնի պակասը, շոգ եղանակը և նույնիսկ սեքսը (այս դեպքում գլխացավի առաջացմանն է նպաստում օրգազմը):

Նյութի աղբյուրը՝ trental.ru