Ջղաձգումների առաջացման հիմնական պատճառներն ու դրանցից ազատվելու 7 պարզ միջոց

15:25 • 24.03.18

Մկանային ջղաձգումները շատ տարածված ու տհաճ խնդիր են և դրսևորվում են մկանի կտրուկ կծկումով: Ընդ որում՝ այս կծկումները կարող են տևել ինչպես մի քանի վայրկյան, այնպես է մի քանի րոպե:

Առավել հաճախ ջղաձգվում են սրունքի մկանները, ինչը կարող է պայմանավորված լինել օրգանիզմի ջրազրկումով, սխալ սննդակարգով, գերծանրաբեռնվածությամբ ու սթրեսներով:

Անկախ ջղաձգման առաջացման պատճառից՝ հարկավոր է անպայման ազատվել այդ խնդրից: Ձեր ուշադրությանն ենք ներկայացնում մի քանի խորհուրդ, որոնք կօգնեն մեղմել ցավն ու խուսափել ջղաձգումներից:

1. Ձգել սրունքի մկանները սրբիչի միջոցով

Սրբիչ գլանաձև փաթաթել, նստել հատակին, այնուհետև դնել փաթաթած սրբիչը ոտնաթաթի տակ և ձգել ետ: Միևնույն ժամանակ հարկավոր է ոտքով այն հետ հրել և չծալել ծնկները, որպեսզի մկանները ձգվեն:

2. Օգտագործել բնական կտորներից կարված և հարմարավետ անկողնային սպիտակեղեն ու ծածկոց

Սպիտակեղենն ու անկողնային պարագաները պետք է լինեն հարմարավետ և պատրաստված բնական կտորներից, որպեսզի ոտքերն անհարմար դիրքով չլինեն ու չսառեն, քանի որ դա նույնպես կարող է դառնալ ջղաձգումների առաջացման պատճառ: Բացի այդ, ոտքերը չպետք է ծածկված լինեն չափազանց ծանր ու տաք ծածկոցով:

3. Հեծանիվ վարել

Հեծանվով զբոսանքը կարող է հիանալի վարժություն լինել ոտքերի համար: Այս գործընթացը ձգում է ոտքերի մկանները և օգնում է կանխարգելել ջղաձգումները:

4. Կանգնել ու ձգվել

Այս պարզ գործողությունը սրունքի մկանների ջղաձգումից ազատվելու լավագույն միջոցներից մեկն է: Պարզապես հարկավոր է կանգնել, հենվել ամբողջ մարմնով ախտահարված ոտքին՝ միևնույն ժամանակ մի փոքր ծալելով ծունկը:

5. Ավելի շատ հեղուկ օգտագործել

Օրվա ընթացքում բավարար քանակությամբ հեղուկ չօգտագործելու դեպքում օրգանիզմը ջրազրկվում է և ի հայտ է գալիս էլեկտրոլիտների դիսբալանս: Արդյունքում հաճախ են անհանգստացնում նաև ջղաձգումները, ուստի այս խնդրից ազատվելու համար հարկավոր է օրվա ընթացքում բավարար քանակությամբ ջուր խմել և խոնավեցնել օրգանիզմը: Ընդ որում՝ լավագույն տարբերակը հասարակ մաքուր ջուրն է:

6. Վիտամիններ օգտագործել

Ջղաձգումները կարող են պայմանավորված լինել նաև որոշ կարևոր տարրերի պակասով, ուստի խորհուրդ է տրվում հետևել նաև սննդակարգին: Այս դեպքում ցավը մեղմելու և ջղաձգումներից ազատվելու համար լավագույն հանքանյութերը կալիումն ու մագնեզիումն են, իսկ այդ տարրերի մակարդակն օրգանիզմում բարձրացնելու համար հարկավոր է սննդակարգում ներառել դրանցով հարուստ մթերք (օրիանակ՝ բանան, խաղող, ծիրան, նարինջ, կաղամբ և այլն):

7. Քնելուց առաջ երեք րոպե ձգել ու մարզել ոտքերը

Քնելուց առաջ ընդամենը մի քանի րոպե ոտքերը մարզելը կօգնի խուսափել ջղաձգումներից կամ գոնե կմեղմի դրանց դրսևորումները:

Նյութի աղբյուրը՝ budetezdorovy.ru