Բրոնխաբորբի(բրոնխիտ) առաջացման պատճառները, ախտանշաններն ու կանխարգելման միջոցները

Բրոնխաբորբը (բրոնխիտ) բրոնխների բորբոքային հիվանդություն է, որը կարող է լինել սուր կամ քրոնիկական:

Բորնխաբորբի առաջացման պատճառները

Սուր բրոնխաբորբի առաջացման պատճառները կարող են լինել ինչպես վիրուսներն ու բակտերիաները, այնպես էլ մրսածությունը, փոշոտ օդը կամ օդում գտնվող թունավոր նյութերը: Եթե հազը չի դադարում տարեկան երեք ամիս և ի հայտ է գալիս երկու տարի շարունակ, ապա հիվանդությունը դարձել է քրոնիկական:

Սուր բրոնխաբորբը, որպես կանոն, ուղեկցում է սուր շնչառական վարակիչ հիվանդություններին:

Հիվանդության ախտանշանները

Բրոնխաբորբի գլխավոր ախտանշանը հազն է՝ չոր (առանց խորխի) կամ թաց (խորխարտադրությամբ): Խորխի առկայությունը շատ կարևոր է, քանի որ թաց հազի դեպքում մանրէները դուրս են գալիս խորխի հետ, իսկ բրոնխները մաքրվում են: Չոր հազի դեպքում խորխը չափազանց թանձր է և դուրս չի գալիս կամ այն առհասարակ չկա:

Շնչափողի լորձաթաղանթի բորբոքային հիվանդությամբ՝ տրախեիտով ուղեկցվող բրոնխաբորբի դեպքում հազը լինում է խռպոտ և կոպիտ:

Բացի այդ, բրոնխաբորբի ախտանշանների շարքին կարող են դասվել նաև հարբուխը, մարմնի բարձր ջերմաստիճանը և կոկորդում տհաճ զգացողությունը:

Բրոնխաբորբի բուժումը

Այս հիվանդության դեպքում հարկավոր է անպայման դիմել բժշկին: Մինչ մասնագետի գալը հիվանդը պետք է անպայման պառկի անկողնում և հնարավորինս շատ հեղուկ օգտագործի: Նա կարող է խմել ինչպես պարզապես եռացրած գոլ ջուր, այնպես էլ մորսեր կամ հակաբորբոքային ու խորխաբեր բույսերի թուրմեր: Շատ օգտակար կլինեն նաև մանանեխի սպեղանիներն ու ինհալացիաները (սոդայով կամ եղևնու յուղով):

Հարկ է հիշել, որ դողորայքային բուժումը պետք է նշանակի միայն բժիշկը: Բրոնխաբերբի դեպքում հիմնականում նշանակվում են խորխաբեր միջոցներ՝ ինչպես բուսական, այնպես էլ դեղորայքային:

Բրոնխաբորբը ոչ մի դեպքում չի կարելի անուշադրության մատնել, իսկ դրա բուժումը պետք է լիարժեք լինի, որպեսզի սուր բրոնխաբորբը չվերածվի քրոնիկականի: Բացի այդ, հարկավոր է անպայման հանձնել խորխի անալիզ՝ պարզելու համար, թե որն է հիվանդության հարուցիչը: Որոշ դեպքերում նշանակվում է հակաբիոտիկ, որը կազդի միկրոօրգանիզմների հենց այդ տեսակի վրա:

Որպես կանոն բժիշկները նշանակում են նաև վիտամինաթերապիա (С, А, В խմբի վիտամիններ): Բրոնխաբորբի դեպքում ցանկալի է հրաժարվել ծխախոտից (գոնե հիվանդության ժամանակ): Շատ արդյունավետ կարող է լինել նաև ֆիզիոթերապիան, մերսումը և բուժական մարմնամարզությունը:

Քրոնիկական բրոնխաբորբի դեպքում բրոնխների լորձաթաղանթն անընդհատ բորբոքվում է, իսկ մրսածության, ծխախոտի չարաշահման ու աշխատանքի անբարենպաստ պայմանների հետևանքով հիվանդությունը պարբերաբար սրվում է:

Քրոնիկ բրոնխաբորբի դեպքում բուժումը կարող է բավականին երկարատև լինել, քանի որ այն հարկավոր է սկսել սկզբնական փուլերում և շարունակել մինչև ախտանշանների անհետանալը:

Բրոնխաբորբի կանխարգելումը

Բրոնխաբորբից խուսափելու համար հարկավոր է առաջին հերթին կոփել մարմինը և ազատվել հիվանդության առաջացմանը նպաստող գործոններից: Անհրաժեշտ է հրաժարվել ծխախոտից և փոխել աշխատանքի վայրը, եթե այնտեղի պայմանները վնասակար են առողջության համար: Բացի այդ, հարկավոր է հետևել բերանի խոռոչի հիգիենային ու առողջական վիճակին և խուսափել մրսածությունից:

Նյութի աղբյուրը՝ medikforum.ru