2 պարզ մեթոդ հաճախասրտության (տախիկարդիա) ախտանշաններից ազատվելու համար

17:20 • 26.03.18

Հաճախասրտությունը կամ տախիկարդիան սրտամկանի կծկումների հաճախականության ավելացումն է: Սա բավական տարածված խնդիր է, սակայն հիվանդին ոչ միշտ է հաջողվում անմիջապես ազատվել նոպայից:

Ձեր ուշադրությանն ենք ներկայացնում երկու արդյունավետ միջոց, որոնք կօգնեն կարգավորել սրտի զարկերի հաճախականությունն առանց դեղորայքի:

Առաջին մեթոդը. սառեցում

Այս միջոցի արդյունավետությունը պայմանավորված է նրանով, որ ջերմաստիճանի կտրուկ նվազման դեպքում նյարդային համակարգը ստիպված է արագ հարմարվել նոր պայմաններին և «հրամայում» է նվազեցնել սրտամկանի կծկումների հաճախականությունը:

Նման արդյունքի հասնելու ամենապարզ միջոցը դեմքը հովացնելն է: Պարզապես հարկավոր է որևէ լայն ու խորը տարայի մեջ սառը ջուր լցնել, այնուհետև դեմքն ընկղմել այդ ջրի մեջ և պահել մի քանի վայրկյան: Հնարավորության դեպքում կարելի է նաև ջրին մի քանի կտոր սառույց ավելացնել: Եթե տարայի օգտագործման հնարավորություն չկա, ապա կարելի է պարզապես լվանալ դեմքը սառը ջրով կամ շփել սառույցի կտորներով (հատկապես քունքերի հատվածը):

Երկրորդ մեթոդը. լարել մկանները

Սրտի կծկումների հաճախականության համար պատասխանատու է թափառող նյարդը, իսկ այս պրոցեդուրան կօգնի ազդել այդ նյարդի վրա: Հարկավոր է խորը շունչ քաշել և լարել որովայնի մկանները: Այնուհետև անհրաժեշտ է փակել աչքերն ու բերանը և մատներով սեղմել քիթը՝ միևնույն ժամանակ փորձելով շնչել և լարելով որովայնի մկանները: Հարկ է հիշել, որ ֆիզիկական ծանրաբեռնվածության կամ անհանգստության ֆոնին սրտի զարկերի հաճախականության ավելացումը բնական երևույթ է՝ ի տարբերություն հաճախասրտության, որը նմանատիպ որևէ գործոնով պայմանավորված չէ:

Առհասարակ՝ եթե տախիկարդիայի առաջացմանը նպաստող որևէ պատճառ չկա, իսկ այն ուղեկցվում է կրծքավանդակի ցավով կամ շնչահեղձության զգացումով, ապա հարկավոր է անհապաղ դիմել բժշկին, քանի որ դա կարող է խիստ վտանգավոր լինել:

Նյութի աղբյուրը՝ headinsider.net