Ինչ առողջական խնդիրների մասին կարող է վկայել բերանի խոռոչի չորությունը

21:19 • 26.03.18

Բերանի խոռոչի չորությունը պայմանավորված է լինում թքի ոչ բավարար քանակությամբ: Նման խնդիր կարող է առաջանալ թքագեղձերի աշխատանքի խանգարման դեպքում, ինչպես նաև որոշ հիվանդությունների դեպքում: Քրոնիկական չորության դեպքում հիվանդը դժվարանում է խոսել, ծամել, կուլ տալ և անգամ չի զգում սննդի համը, ինչը կարող է խիստ բացասաբար ազդել կյանքի որակի վրա:

Նման խնդիր առաջացման դեպքում նկատվում է.

· բերանի խոռոչում չորության ու «կպչունության» զգացում,

· ծարավի զգացում,

· բերանի խոռոչի լորձաթաղանթի վրա գրգռված հատվածներ,

· ճաքեր շուրթերի վրա և բերանի անկյուններում,

· կոկորդում չորության զգացում,

· բերանի խոռոչի (հատկապես լեզվի) այրոց կամ քոր,

· լեզվի կարմրածություն, չորություն ու անհարթություն,

· ձայնի խռպոտություն,

· կոկորդի ցավ,

· քթի լորձաթաղանթի չորացում

· բերանի խոռոչի տհաճ հոտ:

Այս խնդրի առաջացմանը կարող է նպաստել ինչպես որոշ դեղամիջոցների ընդունումը, այնպես էլ տարբեր հիվանդությունների առկայությունը: Բերանի խոռոչի չորությամբ ուղեկցվող հիվանդությունների շարքին են դասվում Ալցհեյմերի հիվանդությունը, շաքարային դիաբետը, սակավարյունությունը (անեմիա), մուկովիսցիդոզը, ռևմատոիդ արթրիտը, զարկերակային գերճնշումը, Պարկինսոնի հիվանդությունը, գլխուղեղի կաթվածը, էպիդեմիկ պարօտիտը, ինչպես նաև ՄԻԱՎ/ՁԻԱՀ-ը:

Հարկ է հիշել, որ բերանի խոռոչի չորությունը կարող է պայմանավորված լինել բավական լուրջ խնդիրներով, ուստի այս ախտանշանը ոչ մի դեպքում չի կարելի անտեսել ու անուշադրության մատնել, քանի որ հետևանքները կարող են շատ ավելի լուրջ լինել:

Բացի այդ, ոչ մի դեպքում չի կարելի զբաղվել ինքնաբուժությամբ, քանի որ միայն որակավորված մասնագետը կարող է հստակ ախտորոշել խնդրի առաջացման պատճառը և նշանակել անհրաժեշտ բուժումը:

Նյութի աղբյուրը՝ healthinfo.ua