Ինչ փոփոխություններ են տեղի ունենում կնոջ օրգանիզմում դաշտանային ցիկլի տարբեր փուլերում

Դաշտանային ցիկլն ազդում է կնոջ պահվածքի, արտաքինի, նախասիրությունների և անգամ մտքերի վրա, ուստի նա պետք է հստակ իմանա, թե ինչպես է պետք պլանավորել ամիսը՝ հորմոնալ փոփոխություններից օգուտ ստանալու և խնդիրներից հնարավորինս խուսափելու համար:

Առաջին օրերը դաշտանից հետո

Դաշտանից հետո սկսվում է կնոջ համար ամենաարդյունավետ, ակտիվ ու էներգիայով լի ժամանակահատվածը, ուստի հարկավոր է բոլոր կարևոր իրադարձություններն ու գործերը պլանավորել առաջիկա 10 օրվա ընթացքում:

Հարկ է հիշել, որ այնպիսի պրոցեդուրաները, ինչպիսին մազահեռացումն է, հարկավոր է անցկացնել դաշտանից հետո 3-5-րդ օրերին: Բանն այն է, որ այդ օրերին օրգանիզմում բարձրանում է էստրոգենի մակարդակը, ինչի շնորհիվ կինն ավելի ցավադիմացկուն է դառնում:

Բացի այդ, անհրաժեշտ է հաշվի առնել, որ էստրոգենի մակարդակի բարձրացման պատճառով արյան մեջ բարձրանում է նաև գլյուկոզայի մակարդակը, ինչը նշանակում է, որ սխալ սնվելը կարող է հանգեցնել թուլության: Այս ընթացքում հարկավոր է լիարժեք նախաճաշել ու ճաշել, ինչը թույլ կտա ավելի քիչ ուտել երեկոյան ժամերին և խուսափել քաշի ավելացումից:

Ձվազատումից առաջ ու հետո

Ձվազատման ժամանակ փոխվում է ճարպերի փոխանակման գործընթացը, ուստի օրգանիզմն ունենում մեծ քանակությամբ սննդարար նյութերի կարիք: Այս ընթացքում հարկավոր է նախապատվությունը տալ բուսական ծագման ճարպերին և հրաժարվել արագ յուրացվող ածխաջրերից:

Ձվազատումից հետո կանայք բախվում են մեկ այլ խնդրի՝ օրգանիզմը սկսում է ավելի շատ պրոգեստերոն արտադրել: Այս ընթացքում զգալիորեն նվազում է դիմացկունությունը, կտրուկ փոփոխվում է տրամադրությունը և ի հայտ է գալիս անընդհատ սնվելու ցանկություն: Սա է պատճառը, որ անհրաժեշտ է ձեռքի տակ միշտ որևէ համեղ ու օգտակար սնունդ ունենալ (օրինակ՝ միրգ կամ ընկուզեղեն):

Նախադաշտանային համախտանիշ (ПМС)

Դաշտանից առաջ (7-9 օր) կարող է ի հայտ գալ անտեղի զայրույթ, դյուրագրգիռություն ու մշտական անհանգստություն, ինչը պայմանավորված է սերոտոնինի՝ երջանկության հորմոնի ոչ բավարար քանակությամբ:

Այս դեպքում հարկավոր է նախապատվությունը տալ տրիպտոֆանով հարուստ սննդամթերքին, քանի որ այս ամինաթթուն նպաստում է սերոտոնինի արտադրությանը:

Այս շրջանում կանայք հաճախ ճնշված են լինում, դառնում են անտարբեր ու անուշադիր, ի հայտ են գալիս առողջական խնդիրներ: Այս ամենը պայմանավորված է լինում հորմոնալ փոփոխություններով, ինչն էլ հանգեցնում է նման տհաճ հետևանքների:

Բացի այդ, այս ընթացքում հեղուկը սկսում է կուտակվել օրգանիզմում, ուստի կարող է նկատվել նաև քաշի չնչին ավելացում, ինչը չպետք է անհանգստացնի, քանի որ մի քանի օր անց քաշը կրկին կկարգավորվի:

Դաշտան

Դաշտանի օրերին հարկավոր է անպայման օգտագործել երկաթով հարուստ սննդամթերք: Հարկ է հիշել, որ մարզումների ժամանակ հեմոգլոբինի ցածր մակարդակը կարող է խիստ վնասակար լինել օրգանիզմի համար, ուստի հարկավոր է խուսափել գերծանրաբեռնվածությունից:

Առհասարակ՝ այս դեպքում ամեն ինչ կախված է օրգանիզմի առանձնահատկություններից: Ոմանց մոտ դաշտանի օրերին ոչ մի տհաճ զգացողություն ի հայտ չի գալիս, իսկ ոմանք էլ ստիպված են լինում մոռանալ մարզումների մասին: Նման դեպքերում մասնագետները խորհուրդ են տալիս կա՛մ հրաժարվել մարզումներից, կա՛մ նախապատվությունը տալ յոգային կամ պիլատեսին:

Նյութի աղբյուրը՝ icanworkout.me