7 մթերք, որոնք կօգնեն նվազեցնել քաղցկեղի առաջացման հավանականությունը

13:14 • 27.03.18

Քաղցկեղի առաջացման հավանականությունը նվազեցնելու համար հարկավոր է սննդակարգում ներառել չարորակ բջիջների աճն արգելակող մթերք: Գիտնականները նշել են 7 հասանելի սննդամթերք, որոնք հիանալի միջոց են քաղցկեղի դեմ պայքարելու համար

1. Լոլիկ

Լոլիկը պարունակում է օրգանիզմը պաշտպանող մի կարևոր նյութ՝ լիկոպին, որն օժտված է հզոր հակաքաղցկեղային ազդեցությամբ: Սակայն մասնագետները խորհուրդ են տալիս օգտագործել լոլիկը ջերմային մշակման ենթարկելուց հետո՝ շոգեխաշած, ջեռոցում պատրաստված կամ ապուրի տեսքով: Բանն այն է, որ ջերմային մշակման ենթարկվելուց հետո լիկոպինի պարունակությունը լոլիկում մի քանի անգամ ավելանում է: Մասնագետները նշում են, որ ամեն օր լոլիկ օգտագործելու դեպքում կարելի է նվազեցնել շագանակագեղձի քաղցկեղի առաջացման հավանականությունը 20%-ով:

2. Լոբազգիներ

Տարիքի հետ բարձրանում է վերարտադրողական համակարգի օրգանների քաղցկեղի առաջացման հավանականությունը, ինչը պայմանավորված է դաշտանադադարի ժամանակ հորմոնալ փոփոխություններով: Սա է պատճառը, որ քաղցկեղի առաջացման հավանականությունը նվազեցնելու համար հարկավոր է առաջին հերթին օգտագործել հորմոնալ դիսբալանսը կարգավորող սննդամթերք: Կանանց համար նման մթերք կարող են լինել լոբազգիները, որոնք պարունակում են ֆիտոէստրոգեն: Քաղցկեղից խուսափելու համար անհրաժեշտ է շաբաթական երեք անգամ սննդակարգում լոբազգիներ օգտագործել:

3. Կանաչ թեյ

Հակաքաղցկեղային ազդեցությամբ օժտված է նաև կանաչ թեյը, որը պարունակում է մի շարք հակաօքսիդանտներ, պոլիֆենոլներ, ռեսվերատրոլ ու կվերցիտին՝ նյութեր, որոնք պաշտպանում են բջիջները վնասվածքներից: Քաղցկեղի կանխարգելման համար խորհուրդ է տրվում օրական առնվազն 3 բաժակ կանաչ թեյ խմել:

4. Ձիթապտղի յուղ

Գիտնականները պարզել են, որ միջերկրածովյան դիետային հետևող կանանց մոտ ավելի հազվադեպ է առաջանում կրծքագեղձի քաղցկեղ: Ուսումնասիրությունները ցույց են տվել, որ նման պաշտպանիչ ազդեցությունը պայմանավորված է ձիթապտղի յուղի մեջ պարունակվող օլեինաթթվով, որը ոչ միայն ճնշում է քաղցկեղածին բջիջների աճը, այլև բարձրացնում է բուժման ընթացքում օգտագործված դեղորայքի արդյունավետությունը: Օրական 15-25 մլ սառը մզվածքի ձիթապտղի յուղ օգտագործելը կօգնի նվազեցնել կրծքագեղձի և ձվարանների քաղցկեղի առաջացման հավանականությունը 60%-ով:

5. Ճակնդեղ

Աղիների քաղցկեղի կանխարգելման համար հարկավոր է օրական 5 բաժին (յուրաքանչյուրը 100-150 գրամ) բուսական մանրաթելերով հարուստ մրգեր ու բանջարեղեն ուտել: Հատկապես առոջարար է ճակնդեղը, որը մաքրում է աղիները տոքսիններից և բարելավում է աղիների աշխատանքը: Ընդ որում՝ ճակնդեղը կարելի է օգտագործել ինչես հում վիճակում, այնպես էլ ջերմային մշակումից հետո: Նմանատիպ ազդեցությամբ են օժտված նաև կանաչ սոխը, մաղադանոսն ու հազարը:

6. Սխտոր

Ուսումնասիրությունները ցույց են տվել, որ սխտորը պաշտպանում է ստամոքսի և աղիների քաղցկեղից: Իր բաղադրության մեջ պարունակվող կծու միացությունների շնորհիվ այն խթանում է իմունային համակարգի բջիջների աշխատանքը, որոնք պատասխանատու են քաղցկեղի դեմ պայքարելու համար: Բացի այդ, այն մաքրում է օրգանիզմը տոքսիններից, ինչպես նաև ակտիվացնում է արյան սպիտակ բջիջների աշխատանքը, որոնք կլանում ու ոչնչացնում են չարորակ բջիջները: Քաղցկեղից պաշտպանվելու համար բժիշկները խորհուրդ են տալիս շաբաթական առնվազն 5 պճեղ սխտոր ուտել:

7. Կաղամբ

Կրծքագեղձի քաղցկեղի կանխարգելման համար օգտակար են կաղամբի բոլոր տեսակները: Կաղամբը պարունակում է ինդոլներ, որոնք պաշտպանում են բջիջներն ազատ ռադիկալների վնասակար ազդեցությունից, ուստի մասնագետները խորհուրդ են տալիս ներառել կաղամբի տարբեր տեսակներն ամենօրյա սննդակարգում:

Նյութի աղբյուրը՝ liza.ua