Որոնք են ծերունական թուլամտության մասին վկայող առաջին ախտանշանները

Ծերունական թուլամտությունը բավական տարածված հիվանդություն է, սակայն մասնագետները նշում են, որ այս վտանգավոր խնդրի հետագա զարգացումը կարելի է արգելակել կամ գոնե դանդաղեցնել առաջին իսկ ախտանշանների դեպքում բժշկին դիմելու դեպքում:

Սակայն խնդիրն այն է, որ շատերը պատշաճ ուշադրություն չեն դարձնում դեմենցիայի մասին վկայող ախտանշանների առկայությանն ու պահվածի և ինքնազգացողության փոփոխություններին՝ համարելով, որ դրանք պայմանավորված են մարդու տարիքով:

Հարկ է հիշել, որ զարգացող դեմենցիան կարող է հանգեցնել առաջին խմբի հաշմանդամության, երբ մարդը չի կարողանում գոյատևել առանց որևէ մեկի օգնության: Սա է պատճառը, որ հարկավոր է շատ ավելի ուշադիր լինել տարեց մարդկանց պահվածքի և ինքնազգացողության հանդեպ:

Ձեր ուշադրությանն ենք ներկայացնում ծերունական թուլամտության մասին վկայող առաջին ախտանշանները, որոնց դեպքում անհրաժեշտ է անպայման խորհրդակցել բժշկի հետ: Հարկ է հիշել, որ միայն վաղ փուլերում հիվանդությունը հայտնաբերելու դեպքում է հնարավոր արգելակել կամ դանդաղեցնել դրա հետագա զարգացումը:

Դեմենցիայի մասին են վկայում.

1.      հիշողության հետ կապված խնդիրները, որոնց դեպքում մարդը չի հիշում վերջերս տեղի ունեցած դեպքերը, սակայն կարող է հստակ պատմել իր երիտասարդության մասին,

2.      մտավոր կարողությունների վատացումը, ինչը կարելի է նկատել՝ խնդրելով մարդուն լուծել որևէ տրամաբանական խնդիր,

3.      հարազատների և հասակակիցների հետ ընկերական շփումից խուսափելը,

4.      ինքնուրույն որևէ գործ անելու անկարողությունը՝ չնայած ֆիզիկապես առողջ լինելուն,

5.      սեփական արտաքինի հանդեպ անտարբերությունը՝ չնայած, որ նախկինում մարդը բավական երկար ժամանակ էր տրամադրում սանրվածքին, մատնահարդարմանը, դիմահարդարմանը, հագուկապին և այլն,

6.      երկար տարիների սիրելի հոբիի հանդեպ անտարբերությունը,

7.      ժամանակի ու տարածության մեջ ճիշտ կողմնորոշվելու անկարողությունը, ինչի հետևանքով մարդը կարող է պարզապես մոլորվել և չկարողանալ վերադառնալ տուն առանց որևէ մեկի օգնության,

8.      չափազանց դյուրագրգիռությունն ու անգամ ագրեսիվ պահվածքը,

9.      հետապնդման զառանցանքն (мания преследования) ու գողության, ստի և համընդհանուր դավադրության մեջ հարազատներին անտեղի մեղադրելը:

Հարկ է հիշել, որ ծերունական թուլամտությունը կարող է բավական արագ զարգանալ, ուստի անգամ 1-2 ախտանշանի առկայության դեպքում հարկավոր է անհապաղ խորհրդակցել բժշկի հետ և անհրաժեշտ բուժզննումն անցնել, ինչը թույլ կտա ժամանակին միջոցներ ձեռնարկել և կանխել հիվանդության հետագա զարգացումը:

Նյութի աղբյուրը՝ med2.ru