10 պարզ խորհուրդ, որոնք կօգնեն պահպանել առողջությունը

Մարդու առողջությունը մեծ մասամբ կախված է հենց իրենից, ուստի հարկավոր է ավելի ուշադիր լինել և վարել առողջ կենսակերպ:

Ձեր ուշադրությանն ենք ներկայացնում 10 պարզ խորհուրդ, որոնց հետևելը կօգնի պահպանել առողջությունը:

1.      Լինել ֆիզիկապես ակտիվ

Ֆիզիկական ակտիվությունը ոչ միայն բարելավում է ինքնազգացողությունը, այլև շատ օգտակար է առողջության համար: Մասնագետները հորդորում են հնարավորինս քիչ նստած մնալ և օրական առնվազն 30 րոպե տրամադրել ֆիզիկական ակտիվությանը (վազք, զբոսանք, պարեր, մաքրություն և այլն): Ընդ որում՝ երեխաներն ու դեռահասները պետք է ֆիզիկական ակտիվությանը տրամադրեն օրական առնվազն 1 ժամ:

2.      Օգտագործել առողջարար սնունդ

Ավելորդ քաշը լուրջ խնդիր է, որը բարձրացնում է սրտանոթային հիվանդությունների, շաքարային դիաբետի և անգամ քաղցկեղի որոշ տեսակների առաջացման հավանականությունը, ուստի մասնագետները հորդորում են ազատվել հնարավորինս շուտ ավելորդ կիլոգրամներից: Նման խնդիրներից խուսափելու համար հարկավոր է առաջին հերթին ճիշտ սնվել: Մասնագետները խորհուրդ են տալիս հարստացնել սննդակարգը մրգերով, բանջարեղենով, ամբողջական հացահատիկով ու լոբազգիներով: Միևնույն ժամանակ խորհուրդ է տրվում նվազեցնել աղի (առավելագույնը 5 գրամ), շաքարի (առավելագույնը 25 գրամ) և ճարպերի գործածությունը:

3.      Հրաժարվել ծխախոտից

Ծխախոտի չարաշահումն ամբողջ աշխարհում ոչ վարակիչ հիվանդությունների առաջացման ու վաղաժամ մահվան հիմնական պատճառներից մեկն է: Մասնագետները նշում են, որ ծխախոտից հրաժարվելուց ընդամենը մեկ տարի անց մարդու մոտ սրտանոթային հիվանդությունների առաջացման հավանականությունը նվազում է երկու անգամ, ուստի այս վատ սովորությունից հրաժարվելն ամենաճիշտ որոշումը կլինի:  Ընդ որում՝ հարկ է հիշել, որ առողջության համար խիստ վնասակար են նաև էլեկտրոնային ծխախոտները և նարգիլեն (կալյան):

4.      Խուսափել ալկոհոլի գործածությունից

Ալկոհոլի չարաշահումը խիստ բացասաբար է ազդում առողջության վրա և շատ վտանգավոր է ստանոթային համակարգի համար, քանի որ առաջանում է զարկերակային գերճնշում ու բարձրացնում է գլխուղեղի կաթվածի առաջացման հավանականությունը: Բացի այդ, ալկոհոլը նպաստում է քաղցկեղի մի շարք տեսակների, ինչպես նաև լյարդի ցիռոզի, հեպատիտի և պանկրեատիտի առաջացմանը:

Հարկ է հիշել, որ գոյություն չունի ալկոհոլի անվտանգ չափաբաժին, քանի որ անգամ չնչին քանակությամբ օգտագործելու դեպքում այն բացասաբար է ազդում օրգանիզմի վրա: Բացի այդ, և՛ ալկոհոլը, և՛ ծխախոտն առաջացնում են կախվածությունը, ուստի այդ վատ սովորություններից հարկավոր է հնարաժարվել հնարավորինս շուտ:

5.      Պատվաստվել

Պատվաստումները շատ կարևոր են, քանի որ դրանք պաշտպանում են մարդուն մի շարք վտանգավոր հիվանդություններից, ուստի ոչ մի դեպքում չի կարելի հրաժարվել դրանցից:

6.      Հետևել սեռական կյանքի անվտանգությանը

Գոյություն ունեն բազմաթիվ վտանգավոր հիվանդություններ, որոնք փոխանցվում են սեռական ճանապարով, ուստի նման խնդիրներից խուսափելու համար մասնագետները հորդորում են հետևել սեռական կյանքի անվտանգությանը և խուսափել անկանոն սեռական կապերից:

7.      Հետևել անձնական հիգիենային

Շատ կարևոր է նաև անձնական հիգիենան, ուստի հարկավոր է հետևել մազերի, բերանի խոռոչի և առհասարակ ամբողջ մարմնի հիգիենային՝ հիվանդություններից խուսափելու համար: Բայց այդ, շատ կարևոր է նաև հագուստի և կենցաղային իրերի մաքրությունը, քանի որ դրանք նույնպես կարող են դառնալ մանրէների տարածման ու ախտահարման պատճառ:

8.      Հետևել ճանապարհային անվտանգության կանոններին

Անվտագության գոտու գործածությունը զգալիորեն նվազեցնում վնասվածքների և մահվան հավանականությունը միջադեպերի ժամանակ, ուստի պետք չէ անտեսել ամրագոտին: Բացի այդ, ոչ մի դեպքում չի կարելի մեքենան վարել ոչ սթափ վիճակում, ճանապարհին բջջային հեռախոս օգտագործել ու գերազանցել թույլատրելի արագությունը:

9.      Խուսափել սթրեսներից

Սթրեսը խիստ բացասաբար է ազդում օրգանիզմի վրա, ուստի հարկավոր է խուսափել սթրեսային իրավիճակներից և անհրաժեշտության դեպքում դիմել ընկերների, ընտանիքի անդամների և անգամ մասնագետների օգնությանը:

10.  Կարգավորել քունը

Առողջական խնդիրներից խուսափելու և լիարժեք հանգստանալու համար մարդը պետք է քնի օրական 7-8 ժամ, ուստի հարկավոր է սովորել միշտ պառկել քնելու և արթնանալ նույն ժամերին:

Նյութի աղբյուրը՝ healthinfo.ua