Ապրիլի 11-ը Պարկինսոնի հիվանդության դեմ պայքարի միջազգային օրն է. 4 փաստ Պարկինսոնի հիվանդության մասին

14:21 • 11.04.18

Ապրիլի 11-ը Պարկինսոնի հիվանդության դեմ պայքարի միջազգային օրն է: Երկու հարյուր տարի առաջ անգլիացի բժիշկ Ջեյմս Պարկինսոնն առաջինը նկարագրեց այս հիվանդության ախտանշանները, որը հետագայում կոչվեց Պարկինսոնի հիվանդություն: Չնայած, որ այս հիվանդությունն ուսումնասիրվում է երկար տարիներ, այն մինչ օրս համարվում է անբուժելի հիվանդություն: Ինչպես նշել է Պարկինսոնը՝ սա քրոնիկական զարգացող հիվանդություն է, որն ախտահարում է կենտրոնական նյարդային համակարգը:

Պարկինսոնի հիվանդության դեպքում խանգարվում է գլխուղեղի աշխատանքը և ոչնչանում են դոֆամինի արտադրության համար պատասխանատու հատվածների նեյրոնները: Դոֆամինն ուրախության ու հաճույքի համար պատասխանատու հորմոն է, որը նաև կարգավորում է շարժումները, որոշումներ կայացնելու, սովորելու և մտապահելու գործընթացները:

Ձեր ուշադրությանն ենք ներկայացնում 4 հետաքրքիր փաստ Պարկինսոնի հիվանդության մասին

1. Տարածվածությամբ երկրորդ նեյրոդեգեներատիվ հիվանդությունն է

Ամենատարածված նեյրոդեգեներատիվ հիվանդությունն Ալցհեյմերի հիվանդությունն է, որին հաջորդում է Պարկինսոնի հիվանդությունը: Վիճակագրական տվյալներով՝ աշխարհում այս հիվանդությունից տառապում է 7-10 միլիոն մարդ՝ այդ թվում նաև բազմաթիվ հայտնի անձինք:

2. Պարկինսոնի հիվանդությունը «երիտասարդացող» հիվանդություն է

Այս հիվանդությունը համարվել է «մեծահասակների հիվանդություն», քանի որ ախտանշանները սովորաբար ի հայտ էին գալիս 60 տարեկանից հետո, սակայն վերջին տարիներին այն ավել ու ավելի հաճախ է ախտորոշվում 40 տարեկան և անգամ ավելի երիտասարդ մարդկանց մոտ:

3. Ախտանշանները կարող են «կուտակվել» տասնամյակների ընթացքում

Հիվանդության վառ ախտանշանն է մի ձեռքի դողը հանգստի վիճակում: Հաջորդ փուլում սկսում են դողալ նաև մյուս ձեռքն ու գլուխը: Ավելի ուշ փուլերում հիվանդությունը դրսևորվում է կոպերի և/կամ ստորին ծնոտի ու լեզվի դողով:

Հիվանդության վաղ փուլերին բնորոշ է առատ թքարտադրությունն ու քրտնարտադրությունը: Հիվանդները նաև հաճախ գանգատվում են հաճախամիզությունից, աղեստամոքսային տրակտի հետ կապված խնդիրներից, մկանային ցավերից ու հոդացավերից, քնած ժամանակ ոտքերն ու ձեռքերը թափահարելուց, հավասարակշռությունը պահպանելու հետ կապված խնդիրներից, հիշողության վատացումից ու մտքերը ճիշտ արտահայտելու հետ կապված խնդիրներից: Բացի այդ, հիվանդության վաղ փուլերի մասին վկայող շատ կարևոր ախտանշան է հոտառության թուլացումը կամ բացակայությունը:

4. Հնարավոր չէ բուժվել, սակայն կարելի է շարունակել աշխատել

Պարկինսոնի հիվանդությունը հնարավոր չէ բուժել, քանի որ վնասված նեյրոնները չեն վերականգնվում, իսկ կլինիկական ախտանշաններն ի հայտ են գալիս այն ժամանակ, երբ ոչնչանում են գլխուղեղի՝ շարժման ֆունկցիաների համար պատասխանատու հատվածի նեյրոնների ավելի քան 60%-ը: Սակայն դեղորայքի ընդունումն ու պարբերաբար բուժզննում անցնելը կօգնեն բարելավել հիվանդի կյանքի որակն ու երկարացնել կյանքը: Ոչ շատ լուրջ դեպքերում հիվանդներին հաջողվում է պահպանել աշխատունակությունը, ինչը թույլ է տալիս նրանց կատարել աշխատանք, որը կապված չէ ֆիզիկական ծանրաբեռնվածության ու կոորդինացված շարժումների հետ:

Նյութի աղբյուրը՝ med2.ru