Որոնք են ձվարանների քաղցկեղի հիմնական ախտանշանները

Ձվարանների քաղցկեղն անվանվում է «լուռ մարդասպան», քանի որ այն ընթանում է գրեթե առանց ախտանշանների և մեծ մասամբ ախտորոշվում է միայն վերջին փուլում: Մասնագետները վստահեցնում են, որ հիվանդությունը վաղ փուլերում հայտնաբերելու դեպքում 35 տարեկանից բարձր հիվանդի կյանքի տևողությունը կարող է լինել 5-7 տարի:

Այս հիվանդությունը շատ վտանգավոր է, քանի որ բարձր է դրա կրկնման հավանականությունը: Սա է պատճառը, որ կինը պետք է շատ ուշադիր լինի և տարեկան երկու անգամ ուլտրաձայնային հետազոտության միջոցով ստուգի  ձվարանների առողջությունը: Սա հատկապես կարևոր է, եթե նրա մոտ հարազատներից որևէ մեկը երբևէ տառապել է ձվարանների քաղցկեղից:

Հարկ է հիշել, որ հիվանդության առաջին ախտանշանները գրեթե չեն տարբերվում կոլիտի ախտանշաններից: Բացի այդ, քաղցկեղի այս տեսակն ավելի հաճախ հանդիպում է 30 տարեկանից բարձր կանանց մոտ:

Ձվարանների քաղցկեղի առանձնահատկություններից մեկն այն է, որ այն գրեթե չի դրսևորվում վաղ փուլերում, իսկ ախտանշանները շատ նման են այլ հիվանդությունների ախտանշաններին:

Ձվարանների քաղցկեղի ախտանշանները

·        Փորափքանք, որը կրում է մշտական բնույթ կամ ի հայտ է գալիս պարբերաբար:

·        Ցավոտ զգացողություններ որովայնում, փորլուծություն կամ փորկապություն:

·        Կոնքի հատվածի մշտական ցավ, որը համարվում է հիվանդության գլխավոր ախտանշաններից մեկը:

·        Տհաճ ու ցավոտ զգացողություններ, որոնք ի հայտ են գալիս մեջքի ստորին հատվածում:

·        Միզարձակության գործընթացի վերահսկողության մասնակի կամ ամբողջական կորուստ, ցավով ու այրոցով ուղեկցվող միզարձակություն:

·        Քաշի կտրուկ կորուստ՝ առանց որևէ պատճառի:

·        Քրոնիկական հոգնածության զգացողություն:

·        Ցավոտ զգացողություններ սեռական ակտի ժամանակ:

Նշված ախտանշաններից անգամ մեկի ի հայտ գալու դեպքում հարկավոր է անհապաղ դիմել մասնագետին, անցնել բուժզննում և ստուգել ձվարանների առողջությունն ուլտրաձայնային հետազոտության միջոցով:

Հարկ է հիշել, որ հիվանդությունը կանխարգելելը շատ ավելի հեշտ է, քան այն բուժելը, իսկ սեփական առողջության նկատմամբ ցուցաբերած հոգատարությունն ու ժամանակին բուժզննում անցնելը կօգնեն խուսափել առողջական լուրջ խնդիրներից:

Նյութի աղբյուրը՝ lady-journal.info