7 «դասական» ախտանշան, որոնք վկայում են օնկոլոգիական հիվանդությունների վաղ փուլերի մասին

Քաղցկեղը համարվում է ամենավտանգավոր հիվանդություններից մեկը, սակայն խնդիրն այն է, որ հիվանդները սովորաբար դիմում են մասնագետին, երբ հիվանդությունը գտնվում է 3-րդ կամ 4-րդ փուլերում: Սա է պատճառը, որ բժիշկները հորդորում են ավելի ուշադիր լինել առողջական վիճակի հանդեպ և անուշադրության չմատնել օրգանիզմի տված ազդանշանները:

Փորձը ցույց է տվել, որ քաղցկեղը կանխարգելելն ու վաղ փուլերում բուժելը շատ ավելի հեշտ է, քան հետագայում դրա հետևանքով առաջացած բարդությունների դեմ պայքարելը, ուստի հիվանդության ախտանշաններն իմանալը շատ կարևոր է: Ուռուցքաբանները նշել են ամենատարածված ախտանշանները, որոնք կարող են վկայել քաղցկեղի մասին:

1.      Փոփոխություններ շնչառական համակարգի աշխատանքում

Քաղցկեղի դեպքում կարող են ի հայտ գալ շնչառական համակարգի հետ կապված այնպիսի ախտանշաններ, ինչպիսին են երկարատև հազը, որը պայմանավորված չէ մրսածությամբ, բրոնխաբորբով կամ ալերգիայով, ինչպես նաև ձայնի խռպոտությունը: Բացի այդ, շատ վտանգավոր ախտանշան կարող է լինել նաև հևոցը: Նման ախտանշանները, որպես կանոն, պայմանավորված են լինում թոքերի, կոկորդի կամ ըմպանի քաղցկեղով:

2.      Արյան հետքեր

Արյան հետքերը (կղանքի մեջ, մեզի մեջ, հեշտոցային արտադրության մեջ, հազալիս և այլն) վկայում են լուրջ խնդիրների մասին: Հարկ է հիշել, որ այս ախտանշանը կարող է կապված լինել աղիների, ստամոքսի, թոքերի, արգանդի, միզապարկի և այլ օրգանների ախտահարման մասին, ուստի այն ոչ մի դեպքում չի կարելի անուշադրության մատնել:

3.      Չապաքինվող վնասվածքներ

Եթե մաշկային վնասվածքներն ու վերքերը չեն ապաքինվում ավելի քան երեք շաբաթ, ապա հարկավոր է անպայման խորհրդակցել բժշկի հետ: Սա կարող է պայմանավորված լինել ինչպես շաքարային դիաբետով, այնպես էլ օնկոլոգիական հիվանդություններով, ուստի հարկավոր է շատ ուշադիր լինել: Հարկ է հիշել, որ այս դեպքում քաղցկեղի բջիջներն առաջանում են մաշկի ամենախորը շերտերից, ուստի քսուքներն ու արտաքին օգտագործման համար նախատեսված դեղամիջոցներն անարդյունավետ կլինեն:

4.      Խալեր

Նոր խալերի առաջացումը, ինչպես նաև հին խալերի չափի, ձևի կամ գույնի փոփոխությունը լուրջ ախտանշան է, որի առկայության դեպքում հարկավոր է անպայման խորհրդակցել բժշկի հետ: Մաշկի քաղցկեղի ամենաագրեսիվ տեսակներից մեկը մելանոման է, որը սովորաբար առաջանում է խալերի փոփոխության հետևանքով:

5.      Պնդացումներ

Տեսանելի պնդացումները կամ շոշափելիս նկատվող փոփոխությունները մարմնի ցանկացած հատվածում լուրջ ախտանշաններ են, որոնք ոչ մի դեպքում չի կարելի անտեսել: Նման խնդրի դեպքում հարկավոր է անհապաղ խորհրդակցել բժշկի հետ և բուժզննում անցնել:  

6.      Արտաթորանքի հետ կապված փոփոխություններ

Միզարտադրության կամ դեֆեկացիայի ակտի հետ կապված փոփոխությունները կարող են լինել աղիների և միզապարկի քաղցկեղի ախտանշան, ուստի նման փոփոխությունների դեպքում հարկավոր է անպայման դիմել մասնագետին:

7.      Քաշի կորուստ

Քաշի անբացատրելի կորուստը, որը պայմանավորված չէ սննդակարգում կամ կենսակերպում արված որևէ փոփոխությամբ, սթրեսով կամ դիետաներով, նույնպես կարող է վկայել քաղցկեղի մասին: Ընդ որում՝ այս ախտանշանը կարող է ի հայտ գալ քաղցկեղի ցանկացած տեսակի դեպքում:

Սակայն հարկ է նշել, որ այս ախտանշանները ոչ միշտ են վկայում օնկոլոգիական հիվանդությունների մասին, ուստի պետք չէ անմիջապես խուճապի մատնվել: Նման դեպքերում առաջին հերթին հարկավոր է բուժզննում անցնել, քանի որ խնդիրը կարող է պայմանավորված լինել նաև այլ հիվանդություններով:

Բացի այդ, ոչ մի դեպքում չի կարելի զբաղվել ինքնաբուժությամբ, քանի որ դա կարող է էլ ավելի վատացնել վիճակը և դառնալ լուրջ բարդությունների պատճառ: Հարկ է հիշել, որ միայն փորձառու մասնագետը կարող է ճիշտ ախտորոշել հիվանդությունն ու նշանակել անհրաժեշտ բուժումը:

Նյութի աղբյուրը՝ medikforum.ru