Ինչ է բլեֆարոսպազմը, որոնք են դրա առաջացման պատճառները և ինչպես կարելի է մեղմել այն

Բլեֆարոսպազմը կամ կոպի թրթռոցը բավական տհաճ խնդիր է, որին կարող է բախվել յուրաքանչյուրը: Մարդիկ, որպես կանոն, անուշադրության են մատնում այս խնդիրը, մինչդեռ մասնագետները նշում են, որ այն կարող է լինել բավական լուրջ ախտանշան:

Բլեֆարոսպազմի դեպքում կոպի մկանները սկսում են անկանոն կծկվել, ինչը կարող է պայմանավորված լինել անհանգստությամբ, սթրեսով կամ մի շարք այլ խնդիրներով: Ձեր ուշադրությանն ենք ներկայացնում այն հիմնական գործոնները, որոնք կարող են դառնալ բլեֆարոսպազմի առաջացման պատճառ:

·        Սթրես ու անհանգստություն

Ուժգին հոգեբանական ճնշման դեպքում մարդու նյարդերը սկսում են այլ կերպ աշխատել և օրգանիզմն ավելի լարված ու «զգույշ» է լինում: Հարկ է հիշել, որ սթրեսը վտանգի մասին վկայող նախազգուշացում է և հենց սա է պատճառը, որ նման դեպքերում նյարդերը և մկանները լարված են լինում (հատկապես՝ դեմքի նյուդերը և գլխի մկանները), ինչն էլ դառնում է բլեֆարոսպազմի առաջացման պատճառ:

·        Համակարգչի առջև երկար նստելու սովորություն

Նման կծկումներ կարող են առաջանալ նաև այն դեպքում, երբ մարդը երկար ժամանակ ուշադիր նայում է որևէ բանին կամ փորձում է աշխատել առանց ակնոցի:

·        Մեծ քանակությամբ կոֆեինի և ալկոհոլի գործածություն

Զարմանալի չէ, որ ալկոհոլային ըմպելիքներն ու կոֆեինը նույնպես կարող են դառնալ բլեֆարոսպազմի առաջացման պատճառ, քանի որ և՛ ալկոհոլը, և՛ սուրճը նեյրոններն ակտիվազնող հզոր միջոց են, որոնք նպաստում են նյարդերի գերլարվածությանը: Սա է պատճառը, որ նման ըմպելիքները հանգեցնում է կոպի մկանների սպազմների առաջացման:

·        Աչքի հոգնածություն ու չորություն

Բլեֆարոսպազմը կարող է պայմանավորված լինել նաև աչքի չորությամբ կամ հոգնածությամբ, որի դեպքում կոպը սկսում է ավելի ակտիվ կերպով աշխատել, որպեսզի հավասարաչափ տարածի արցունքը: Աչքի չորությունը բավական տարածված խնդիր է և կարող է պայմանավորված լինել համակարգչի առջև երկար ժամանակ անցկացնելով կամ բջջային հեռախոսի էկրանին երկար նայելով, ուստի այս խնդրից խուսափելու համար հարկավոր է հնարավորինս քիչ ժամանակ անցկացնել նման սարքերի առջև:

Առհասարակ՝ բլեֆարոսպազմը շատ լուրջ խնդիր չէ, սակայն հարկավոր է շատ ուշադիր լինել, եթե նման ջղաձգումները շարունակվում են մեկ շաբաթից ավել: Եթե սպազմները շարունակում են անհանգստացնել բավական երկար ժամանակ և միևնույն ժամանակ ուղեկցվում են կոպի այտուցվածությամբ, ինչի հետևանքով հիվանդը չի կարողանում փակել կամ բացել աչքը, ապա հարկավոր է անպայման դիմել ակնաբույժին: Բանն այն է, որ սա կարող է լինել որևէ դեղամիջոցի հետևանքով առաջացած կողմնակի բարդություն կամ վկայել նեյրոնների հետ կապված խնդիրների մասին, ինչը շատ վտանգավոր է:

Ինչպես մեղմել բլեֆարոսպազմը

Բլեֆարոսպազմի դեպքում հարկավոր է փակել աչքը և թրջել կոպերն ու դեմքը ջրով: Դեմքը ջրի մեջ ընկղմած անհրաժեշտ է պահել մի քանի վայրկյան, ինչը կօգնի ազատվել լարվածությունից ու թուլացնել մկանները:

Բլեֆարոսպազմը, որպես կանոն, համարվում է սթրեսի մասին վկայող ախտանշան, ուստի դրանից ազատվելու համար անհրաժեշտ է առաջին հերթին սովորել խուսափել սթրեսից կամ մեղմել այն:

Բացի այդ, խորհուրդ է տրվում կարգավորել քունր, խուսափել կոֆեինի չարաշահումից և թույլ չտալ, որ աչքը չորանա: Եթե աշխատանքի բերումով մարդը ստիպված է լինում բավական երկար ժամանակ անցկացնել համակարգչի առջև, ապա նա պետք է անպայման արհեստական արցունք կամ աչքերի խոնավությունը պահպանող մեկ այլ միջոց օգտագործի: Բացի այդ, նման դեպքերում խորհուրդ է տրվում հաճախ թարթել, ինչը կօգնի պահպանել աչքի խոնավությունը:

Նյութի աղբյուրը՝ awarenessremedies.com