6 արտասովոր ախտանշան, որոնք վկայում են սրտի հիվանդությունների մասին

Մարդիկ ոչ միշտ են ուշադրություն դարձնում օրգանիզմի տված ախտանշաններին, մինչդեռ այն նախազգուշացնում է ցանկացած խնդրի դեպքում: Օրգանիզմն ազդանշաններ է ուղարկում նաև սրտի հիվանդությունների ժամանակ, իսկ դրանք համարվում են աշխարհում մարդկանց մահացության հիմնական պատճառը: Սա է պատճառը, որ հարկավոր է ավելի ուշադիր լինել և թույլ չտալ, որ հիվանդությունը չափազանց խորանա:

Գոյություն ունեն ախտանշաններ, որոնք վկայում են սրտի հիվանդությունների մասին: Դրանց շարքին են դասվում.

·        կրծքավանդակում նկատվող տհաճ զգացողությունները,

·        սրտխառնոցը, մարսելախանգարումը, ստամոքսի այրոցն ու ցավը,

·        գլխապտույտը կամ թուլությունը,

·        կոկորդի կամ ծնոտի ցավը,

·        ցավը, որը տարածվում է նաև ձեռքի հատվածում,

·        սրտի զարկերի հաճախականության անկանոնությունը,

·        չբուժվող հազը:

Բոլոր այս ախտանշանները հուշում են, որ ժամանակն է ուշադրություն դարձնել սրտամկանի առողջության վրա և խորհրդակցել բժշկի հետ: Սակայն կան սրտամկանի առողջության վատացման մասին վկայող մի շարք այլ արտասովոր ախտանշաններ, որոնք մարդիկ շատ հաճախ անտեսում են: Դրանք արտաքին դրսևորումներ են, որոնք մարդը կարող է տեսնել անզեն աչքով և որոնք օգնում են հայտնաբերել խնդիրները վաղ փուլերում:

1.      Ծալքեր ականջաբլթակի հատվածում

Ավելի քան 40 տարբեր ուսումնասիրություն ցույց է տվել, որ կա ակնհայտ կապ ականջաբլթակների հատվածում առաջացող ծալքերի և աթերոսկլերոզի առաջացման հավանականության բարձրացման միջև, իսկ աթերոսկլերոզը լուրջ հիվանդություն է, որի դեպքում զարկերակների ներսում վտանգավոր վահանիկներ են կուտակվում:

2.      Դեղնավուն ճարպային նորագոյացություններ

Դեղնավուն ճարպային նորագոյացությունները, որոնք գիտականորեն կոչվում են քսանտոմներ, սովորաբար առաջանում են արմունկների, ծնկների, նստատեղի և կոպերի հատվածում:Նման նորագոյացություններ առաջանում են այն մարդկանց մոտ, որոնց օրգանիզմում խոլեստերինի մակարդակն այնքան բարձր է լինում, որ այն սկսում  կուտակվել անգամ մաշկի տակ: Ցավոք, նման ճարպային կուտակումներ են առաջանում նաև զարկերակներում, ինչը կարող է հանգեցնել լուրջ խնդիրների:

3.      Կլորավուն կամ հաստացած եղունգներ

Եղունգների դեֆորմացիան նույնպես վկայում է սրտի հետ կապված խնդիրների մասին: Բանն այն է, որ նման խնդիրների դեպքում թթվածնով հարուստ արյունը չի հասնում մատներին, ինչի հետևանքով էլ առաջանում է եղունգների հյուսվածքների գերաճ ու դեֆորմացիա:

4.      Աչքի եղջերաթաղանթի շուրջն առաջացած շրջանակ

Սա կորոնար անբավարարության մասին վկայող ախտանշան է, որի դեպքում եղջերաթաղանթի շուրջ սկսում են ճարպային կուտակումներ առաջանալ և ի հայտ է գալիս մոխրագույն շրջանակ: Այն բավական տարածված խնդիր է և ի հայտ է գալիս 40-ից բարձր մարդկանց 45%-ի մոտ և 60 տարեկանից բարձր մարդկանց 70%-ի մոտ: Սակայն հարկ է նշել, որ այն չի առաջացնում տեսողական որևէ խնդիր:

5.      Բորբոքված լնդեր ու շարժվող ատամներ

Մարդու բերանի խոռոչում կան ինչպես օգտակար, այնպես էլ վնասակար բակտերիաներ, որոնք կարող են հայտնվել արյան մեջ և առաջացնել անոթների բորբոքումներ, ինչն էլ խիստ վնասակար է սրտանոթային համակարգի համար:

6.      Շուրթերի կապտավուն երանգ

Եթե շուրթերի կապտավուն երանգը պայմանավորած չէ օդի ցածր ջերմաստիճանով կամ բարձրությամբ, ապա այն վկայում է սրտի հետ կապված խնդիրների մասին: Սա պայմանավորված է լինում արյան հոսքի խանգարմամբ, ուստի կարող է լուրջ խնդիր դառնալ անուշադրության մատնելու դեպքում:

Նյութի աղբյուրը՝ interesno.cc