Ինչ է հերպեսը և ինչ բարդություններ կարող են առաջանալ այն ժամանակին չբուժելու դեպքում

Մարդկանց մեծ մասի համար հերպեսը պարզապես մրսածության ժամանակ շուրթի վրա առաջացող մանր բշտիկներ են, սակայն քչերը գիտեն, որ իրականում այն լուրջ վարակիչ հիվանդություն է: Հերպեսն առաջանում է ոչ միայն շուրթերին, այլ նաև հաճախ ախտահարում է արտաքին սեռական օրգանները: Ընդ որում՝ սեռական հերպեսի խնդիրն այսօր շատ տարածված է ու արդիական:

Այս հիվանդությունը գրավում է մասնագետների ուշադրությունը, քանի որ բացասաբար է ազդում ինչպես կանանց, այնպես էլ տղամարդկանց վերարտադրողական համակարգի առողջության վրա:

Հերպեսը վարակիչ հիվանդություն է, ուստի հարկավոր է ոչ միայն բուժել արդեն իսկ ի հայտ եկած խնդիրը, այլև ձեռնարկել կանխարգելիչ միջոցներ: Սա այն հիվանդությունն է, որը սեռական ճանապարհով մի զուգընկերոջից մյուսին է փոխանցվում, իսկ հղիանալու դեպքում նաև կնոջից երեխային: Հիվանդության կանխարգելումը շատ մեծ նշանակություն ունի, քանի որ կօգնի ոչ միայն խուսափել նման խնդիրներից, այլև բարելավել հիվանդի կյանքի որակը:

Հարկ է հիշել, որ վաղ հասակից սեռական կյանք վարելը, անկանոն սեռական կապերը, սեռավարակների ոչ ճիշտ բուժումն ու ինքնաբուժությունը կարող են էլ ավելի վատացնել հիվանդի վիճակը: Շատ մեծ նշանակություն ունի նաև տեղեկացվածությունը, ուստի մարդիկ պետք է իմանան, թե ինչ հիվանդություն է հերպեսը և ինչպիսի հետևանքներ կարող է առաջացնել:

Մարդկանց օրգանիզմում կան բազմաթիվ վիրուսներ, սակայն մինչ հիվանդության ախտանշանների ի հայտ գալը դրանցից ազատվելը պարտադիր չէ, քանի որ առողջ օրգանիզմն արտադրում է անհրաժեշտ հակամարմինները: Սա վերաբերում է նաև հերպեսին, ուստի անհանգստանալու կարիք չկա:

Հարկավոր է հաշվի առնել, որ ինչպես կանանց ու տղամարդկանց, այնպես էլ երեխաների մոտ հերպեսը (այդ թվում նաև սեռական հերպեսը) կարող է ի հայտ գալ միայն թուլացած իմունիտետի ֆոնին: Սա է պատճառը, որ սա ընդհանուր խնդիր է ինչպես գինեկոլոգների ու ուրոլոգների, այնպես էլ մանկաբույժների, թերապևտների և իմունոլոգների համար:

Հերպեսի բուժումը

Հարկ է հիշել, որ հերպեսի վիրուսը շատ խորամանկ վիրուս է: Այն կարող է «փախչել» ու «սառչել»՝ սպասելով գործելու համար ամենահարմար պահին: Սա է պատճառը, որ հերպեսի բուժմանը հարկավոր է ամենայն լրջությամբ մոտենալ:

Ներկայում հերպոսի բուժման մեթոդները բաժանվում են երկու մեծ խմբի, որոնցից առաջինը կիրառվում է, երբ հերպեսն ի հայտ է գալիս միայն մեկ անգամ, իսկ երկրորդը, երբ հերպեսի ռեցիդիվները տեղի են ունենում տարեկան 6 անգամից ավել: Բուժման տվյալ մեթոդները հատկապես կարևոր են հղիություն պլանավորող կանանց համար: Այս դեպքում զույգը պետք է նաև ուրոլոգիական բուժզննում անցնի և անհրաժեշտության դեպքում սկսի բուժումը, քանի որ միայն այդ կերպ է հնարավոր խուսափել երեխայի վարակումից, հղիության ընդհատումից և վաղաժամ ծննդաբերությունից:

Նյութի աղբյուրը՝ aif.ru