Քաղցկեղի մասին վկայող վաղ ախտանշաններ, որոնք ոչ մի դեպքում չի կարելի անուշադրության մատնել

Քաղցկեղը ներկայում ամենատարածված ու վտանգավոր հիվանդություններից մեկն է, որը տարեկան միլիոնավոր մարդկանց կյանք է խլում: Սա է պատճառը, որ մասնագետները հորդորում են ավելի ուշադիր լինել առողջության հանդեպ և պարբերաբար բուժզննում անցնել՝ խնդիրները ժամանակին հայտնաբերելու համար:

Բժիշկների խոսքով՝ հիվանդությունը կանխարգելելն ու վաղ փուլերում բուժելը շատ ավելի հեշտ է, քան հետագայում դրա պատճառով ի հայտ եկած բարդությունների դեմ պայքարելը, ուստի հիվանդությունների ախտանշաններն իմանալը շատ մեծ նշանակություն ունի:

Քաղցկեղի դեպքում հիվանդության վաղ ախտորոշումը բավական դժվար է, քանի որ այս հիվանդության գրեթե բոլոր տեսակները զարգանում են առանց ախտանշանների և մարդը նկատում է խնդիրը զարգացման երկրորդ կամ երրորդ փուլերում, երբ այն զգալիորեն խորացած է լինում:

Սակայն մասնագետները նշում են, որ կան մի շարք ախտանշաններ, որոնք կարող են պայմանավորված լինել քաղցկեղով, ուստի դրանց առկայության դեպքում հարկավոր է անհապաղ բուժզննում անցնել: Նման վտանգավոր ախտանշանների շարքին են դասվում.

·        թուլությունը, քնկոտությունն ու հոգնածության զգացումը,

·        ախորժակի կորուստն ու քաշի անբացատրելի նվազումը,

·        մարմնի ջերմաստիճանի աննշան բարձրացումը (37-37,5°C), որը մի քանի օր շարունակ չի հաջողվում իջեցնել:

·        աղիների աշխատանքի խանգարումը,

·        հաճախակի անհանգստացնող գլխացավերը,

·        կլման ակտի խանգարումներն ու տհաճ զգացողությունները,

·        դժվարացած շնչառությունը,

·        խալերի կոշտացումն ու դրանց գույնի, ձևի կամ չափի փոփոխությունը,

·        նոր խալերի առաջացումը,

·        մաշկի քորը,

·        տեսողության կտրուկ կորուստը,

·        մարմնի այս կամ այն հատվածում առաջացած անբացատրելի ցավոտ զգացողությունները:

Այս ախտանշանները, բնականաբար, կարող են պայմանավորված լինել նաև այլ խնդիրներով, ուստի խուճապի մատնվելու կարիք չկա, սակայն, այնուամենայնիվ, խորհուրդ է տրվում դրանց առկայության դեպքում դիմել բժշկին:

Բացի այդ, մասնագետները խորհուրդ են տալիս տարեկան 1-2 անգամ պրոֆիլակտիկ բուժզննում անցնել՝ անգամ ախտանշանների բացակայության դեպքում: Հատկապես ուշադիր պետք է լինել աղիների, կրծքագեղձերի, շագանակագեղձի, թոքերի և լյարդի առողջության հանդեպ, քանի որ չարորակ նորագոյացություններն առավել հաճախ ախտահարում են հենց այս օրգանները:

Նաև ուռուցքաբանները խորհուրդ են տալիս կանանց ամեն օր ինքնուրույն զննել կրծքագեղձերը և ցանկացած փոփոխության կամ արտասովոր ախտանշանի դեպքում դիմել բժշկին: Նույնը վերաբերում է նաև մաշկի բուժզննմանը, քանի որ մելանոման՝ մաշկի քաղցկեղը հաճախ հայտնաբերվում է ուշ փուլերում, երբ բուժումն արդեն բավական արդյունավետ չի լինում:

Նյութի աղբյուրը՝ med2.ru