Որոնք են ջղաձգումների առաջացման հիմնական պատճառները և բուժմանն ու կանխարգելման ամենապարզ միջոցները

Ձղաձգումը մկանի կտրուկ կծկումն է, որը կարող է տևել 10 վայրկյանից մինչև 15 րոպե: Սա բավական ցավոտ ու տհաճ խնդիր է: Ընդ որում՝ առավել հաճախ ջղաձգվում է սրունքի մկանը, ինչը պայմանավորված է նրանով, որ այն խիստ ծանրաբեռնված է լինում և գտնվում է սրտամկանից ու կենտրոնական անոթներից բավական հեռու:

Ջղաձգումների առաջացման պատճառները

Ջղաձգումները կարող են պայմանավորված լինել ինչպես ֆիզիկական ծանրաբեռնվածությամբ, այնպես էլ լինել որոշ լուրջ հիվանդությունների ախտանշան: Ջղաձգումներով դրսևորվող հիվանդությունների շարքին են դասվում այնպիսի վտանգավոր ախտաբանությունները, ինչպիսին են երակների վարիկոզ լայնացումը, երիկամային անբավարարությունը, Պարկինսոնի հիվանդությունը, լյարդի ցիռոզը, տարատեսակ ուռուցքները, ցրված սկլերոզը, հարթաթաթությունը և այլն: Սա է պատճառը, որ եթե սպազմներն ի հայտ են գալիս ամսական 2-3 անգամից հաճախ և կապված չեն ֆիզիկական ծանրաբեռնվածության հետ, ապա հարկավոր է անպայման դիմել բժշկին:

Եթե ջղաձգումները պայմանավորված են ֆիզիկական ակտիվությամբ, ապա մասնագիտական օգնության անհրաժեշտություն չկա: Առավել հաճախ նման խանգարման պատճառ է դառնում մի շարք կարևոր միկրոտարրերի պակասը (օրինակ՝կալցիումի ու մագնեզիումի), ինչպես նաև ծանրաբեռնվածության հետևանքով օրգանիզմում կաթնաթթվի կուտակումն ու մկանային տոնուսի բարձրացումը:

Ջղաձգումների կանխարգելումը

Էլեկտրոլիտների դեֆիցիտի պատճառը լինում է քրտնարտադրության հետևանքով հեղուկի կորուստը, ուստի մկանային կծկումները կարգավորելու համար հարկավոր է վերականգնել օրգանիզմում կալցիումի, մագնեզիումի ու կալիումի մակարդակները: Նման դեպքերում մասնագետները խորհուրդ են տալիս կարգավորել սննդակարգը, սակայն հաճախ մարդիկ նախընտրում են ստանալ անհրաժեշտ տարրերը կենսաբանական ակտիվ սննդային հավելումների կամ վիտամինային համալիրների միջոցով:

Նաև հարկ է հիշել, որ եթե խնդիրը պայմանավորված է հարթաթաթությամբ, ապա հարկավոր է օգտագործել հատուկ օրթոպեդիկ ներդիրներ (գոնե մարզվելու ընթացքում) և լինել ավելի ուշադիր:

Ինչպես մեղմել ջղաձգման հետևանքով առաջացած ցավը

Որպես կանոն մկանային սպազմները տեղի են ունենում գիշերը, ինչը պայմնավորված է նրանով, որ այդ ժամանակ մարդու հորիզոնական դիրքն ու զարկերակային ճնշման իջեցումը նպաստում են ոտքերում արյան շրջանատության վատացմանը: Նման դեպքերում հարկավոր է ոտնաթաթը ձգել, մի քանի անգամ ծալել ոտքը և լավ մերսել ջղաձգված մկանը:

Բացի այդ, արյան հոսքի արագացման համար կարելի է նաև տաքացնող քսուքներ օգտագործել, որոնք կօգնեն ավելի արագ մեղմել ցավը:

Նյութի աղբյուրը՝ healthinfo.ua