Կրծքի ցավերի առաջացման ամենատարածված պատճառներն ու ցավը մեղմելու եղանակները

Կրծքի ցավերը կարող են դառնալ լուրջ անհանգստության պատճառ: Նման ցավի ի հայտ գալու դեպքում կանայք, որպես կանոն, առաջին հերթին մտածում են քաղցկեղի մասին, սակայն իրականում այն կարող է պայմանավորված լինել այլ խնդիրներով: Սովորաբար կրծքի ցավի պատճառ են դառնում ֆիզիոլոգիական հորմոնալ փոփոխությունները կամ հիվանդությունները, որոնք լուրջ վտանգ չեն ներկայացնում:

Չնայած տարածված կարծիքին՝ կրծքագեղձի քաղցկեղը ոչ միշտ է դրսևորվում ցավով, իսկ սկզբնական փուլերում այն առհասարակ զարգանում է առանց որևէ ախտանշանի՝ հայտնաբերվելով պրոֆիլակտիկ բուժզննման ընթացքում, ուստի նման ցավերի ի հայտ գալու դեպքում անմիջապես խուճապի մատնվելու պատճառ չկա:

Ձեր ուշադրությանն ենք ներկայացնում 6 պատճառ, որոնցով կարող է պատմանավորված լինել կրծքի ցավը:

1.      Կրծքագեղձի ֆիբրոզ-կիստոզ փոփոխություններ

Կրծքագեղձի ֆիբրոզ-կիստոզ փոփոխությունները բարորակ բնույթի են լինում և դրսևորվում են շոշափելիս նկատվող պնդացումներով: Նման նորագոյացությունները պայմանավորված են լինում հորմոնալ փոփոխություններով: Դրանք կարող են դրսևորվել դաշտանից առաջ կամ դաշտանի ընթացքում ի հայտ եկող աննշան ցավոտ զգացողություններով: Մասնագետների խոսքով՝ ֆիբրոզ-կիստոզ փոփոխությունները հաճախ ի հայտ են գալիս վերարտադրողական տարիքի կամ հորմոնալ թերապիա անցնող կանանց մոտ:

2.      Անհարմար կրծկալի գործածություն

Կրծքի չափին չհամապատասխանող կրծկալ կրելը նույնպես կարող է դառնալ ցավի առաջացման պատճառ, սակայն այս խնդրից կարելի է հեշտությամբ ազատվել՝ պարզապես համապատասխան կրծկալ կրելով: Բացի այդ, մարզվող կանայք հաճախ մոռանում են հատուկ սպորտային կրծկալների մասին, ինչը նույնպես կարող է տհաճ հետևանքներ ունենալ, ուստի մասնագետները հորդորում են մարզվելիս ճիշտ կրծկալ կրել:

3.      Որոշ դեղամիջոցների ընդունում

Կրծքի ցավը կարող է լինել նաև որոշ դեղամիջոցների ընդունման հետևանքով առաջացած կողմնակի ազդեցություն, ուստի հարկավոր է ավելի ուշադիր լինել և խուճապի չմատնվել: Նման կողմնակի բարդություններ կարող են առաջացնել հորմոնալ դեղամիջոցները, բեղմնականխիչ դեղամիջոցները (այս դեղամիջոցները երբեմն կարող են նաև մեղմել ցավը) և հակադեպրեսանտները:

4.      Մաստիտ (կրծքագեղձաբորբ)

Մաստիտը կրծքագեղձի ինֆեկցիոն հիվանդություն է: Առավել հաճախ մաստիտից տառապում են երեխային կրծքով կերակրող կանայք, սակայն այս խնդրին կարող է բախվել յուրաքանչյուր կին: Այս հիվանդությանը բնորոշ դրսևորումներից են կարմրածությունը, ջերմաստիճանի տեղային բարձրացումը, կրծքագեղձի այտուցվածությունը, տենդը, մարմնի ցավն ու ընդհանուր թուլությունը:

5.      Կրծքագեղձի վիրահատություններ

Կրծքագեղձի վիրահատություններից հետո կանայք հաճախ ուշադրություն չեն դարձնում առաջացած սպիին, մինչդեռ այն նույնպես կարող է դառնալ ցավոտ զգացողությունների առաջացման պատճառ՝ անգամ լիարժեք ապաքինումից հետո:

6.      Մեծ կուրծք

Մեծ կուրծք ունեցող կանանց մոտ հաճախ բարդություններ են առաջանում քնի հարմար դիրք ընտրելիս, ինչպես նաև մարզվելիս: Սակայն այս խնդրից նույնպես կարելի է հեշտությամբ ազատվել համապատասխան կրծկալ կրելով: Ընդ որում՝ որոշ դեպքերում մեծ կուրծք ունեցող կանանց խորհուրդ է տրվում կրծկալ կրել անգամ քնելիս, ինչը կօգնի զգալիորեն մեղմել տհաճ զգացողությունները և կարգավորել քունը:

Երբ է հարկավոր դիմել բժշկին

Կրծքի ցավերը ոչ միշտ են պայմանավորված լինում առողջական լուրջ խնդիրներով և, որպես կանոն, խուճապի մատնվելու պատճառ չի լինում: Սակայն լինում են դեպքեր, երբ ցավը վկայում է լուրջ խանգարման մասին, որն անտեսելը կարող է մի շարք բարդությունների առաջացման պատճառ դառնալ: Սա է պատճառը, որ հարկավոր է շատ ուշադիր լինել և անմիջապես դիմել բժշկին, եթե.

·        ցավը չափազանց ուժգին է,

·        տհաճ զգացողությունները պայմանավորված չեն դաշտանային ցիկլով,

·        ցավը մշտական է և չի մեղմվում,

·        այն ուղեկցվում է նաև այլ ախտանշաններով (օրինակ՝ պտուկներից նկատվող արտադրությամբ):

Հարկ է հիշել, որ գոյություն ունի կրծքի ցավի երկու տեսակ՝ ցիկլային և ոչ ցիկլային: Ցիկլային ցավը պայմանավորված է լինում դաշտանային ցիկլով: Այս դեպքում տհաճ զգացողությունները, որպես կանոն, ի հայտ են գալիս երկու կրծքագեղձերում և անհանգստացնում են դաշտանային ցիկլից առաջ: Ոչ ցիկլային ցավը պայմանավորված չի լինում դաշտանային ցիկլով, լինում է սուր ու այրող և սովորաբար ի հայտ է գալիս միայն մի գեղձի հատվածում:

Ինչպես մեղմել կրծքի ցավը

Կրծքի ցավի դեպքում ոչ միշտ է լինում լուրջ բուժման անհրաժեշտություն, սակայն կանայք կարող են ինքնուրույն փոքր-ինչ մեղմել ցավը: Նման դեպքերում խորհուրդ է տրվում.

·        կրծքին սառը կամ տաք կոմպրեսներ դնել,

·        սննդակարգից ժամանակավորապես բացառել սուրճը, թեյն ու կոֆեին պարունակող այլ մթերքը և հետևել ինքնազգացողության փոփոխություններին,

·        սահմանափակել ճարպերի գործածությունն ու ուտել ավելի շատ բանջարեղեն, մրգեր ու ամբողջահատիկ մթերք,

·        փոխել անհարմար կրծկալը,

·        օգտագործել ցավազրկող միջոցներ (օրինակ՝ ասպիրին կամ իբուպրոֆեն), սակայն միայն նախապես բժշկի հետ խորհրդակցելուց հետո,

·        խորհրդակցել բժշկի հետ որոշ հավելումների օգտագործման անհրաժեշտության շուրջ (օրինակ՝ մագնեզիում կամ վիտամին E):

Նյութի աղբյուրը՝ the-challenger.ru