Ինչ ատիպիկ ախտանշաններով կարող է դրսևորվել թոքերի քաղցկեղը

Առողջապահության համաշխարհային կազմակերպության տվյալներով՝ ամեն տարի աշխարհում մի քանի միլիոն մարդ է մահանում օնկոլոգիական հիվանդությունների հետևանքով: Ընդ որում՝ ամենատարածվածն այս հիվանդություններից համարվում է թոքերի քաղցկեղը:

Մասնագետները հաճախ են նշում, որ վաղաժամ ախտորոշումը զգալիորեն բարձրացնում է բարեհաջող բուժման հավանականությունը, սակայն, որպես կանոն, հիվանդները դիմում են բժշկին հիվանդության 2-րդ, 3-րդ կամ 4-րդ փուլերում, երբ այն արդեն չափազանց խորացած է լինում:

Մասնագետները ներկայացրել են թոքերի քաղցկեղի մասին վկայող մի շարք ատիպիկ ախտանշաններ, որոնք իմանալը կօգնի ժամանակին հայտնաբերել հիվանդությունը:

Ինչպես և օնկոլոգիական հիվանդությունների մեծ մասը՝ թոքերի քաղցկեղը զարգացման սկզբնական շրջանում կարող է չդրսևորվել որևէ ախտանշանով, սակայն որոշ ժամանակ անց, երբ ուռուցքը բավականաչափ մեծանա, ի հայտ կգան նաև դրա առկայության մասին վկայող ախտանշանները:

Ուռուցքաբաններն ուսումնասիրել են մի քանի հազար հիվանդի բժշկական տվյալները և պարզել, թե որ ախտանշաններն են ամենից հաճախ ստիպում մարդկանց դիմել բժշկին: Ընդ որում՝ ուսումնասիրությունը ցույց է տվել, որ այս հիվանդության դեպքում ի հայտ են գալիս որոշ ախտանշաններ, որոնք մարդիկ հաճախ են անտեսում:

Թոքերի քաղցկեղի մասին վկայող ախտանշաններն են.

·        դեմքի ու պարանոցի այտուցվածությունը, որն ի հայտ է գալիս առանց որևէ պատճառի (օրինակ՝ եթե մարդը չի օգտագործել մեծ քանակությամբ ջուր ու աղի սնունդ, իսկ այտուցներն, այնուամենայնիվ, ի հայտ են գալիս, ապա հարկավոր է բուժզննում անցնել),

·        ձեռքերի մատների ծայրերի մեծացումը,

·        ցավոտ զգացողությունները ոսկորներում (ընդ որում՝ այս ախտանշանը կարող է ի հայտ գալ ինչպես հիվանդության վաղ փուլերում, այնպես էլ մետաստազների տարածվելուց հետո),

·        օրգանիզմում կալցիումի չափազանց մեծ քանակությունը, որը կարող է առաջացնել քնկոտություն,

·        հոգնածության զգացումը, որը չի անցնում անգամ լիարժեք հանստից հետո:

Առհասարակ՝ մասնագետները խորհուրդ են տալիս շատ ուշադիր լինել և չանտեսել ինքնազգացողության կամ արտաքին տեսքի անգամ ամենաչնչին փոփոխությունները, քանի որ դրանք կարող են պայմանավորված լինել առողջական լուրջ խնդիրներով:

Նյութի աղբյուրը՝ med2.ru