Ինչպես է մարդու օրգանիզմն արձագանքում սթրեսին. 8 տհաճ ախտանշան

Սթրեսը բավական լուրջ ու տարածված խնդիր է, որը մարդիկ հաճախ անտեսում են: Սակայն այն անուշադրության մատնելը կարող է բավական տհաճ հետևանքներ ունենալ, քանի որ սթրեսային իրավիճակները խիստ բացասաբար են անդրադառնում օրգանիզմի վրա:

Վերլուծելով մի շարք հետազոտությունների արդյունքները՝ գիտնականներն առանձնացրել են օրգանիզմի 8 ամենատհաճ ռեակցիաները, որոնք լինում են սթրեսի դեպքում:

1.      Կապակցված մտածելու և խոսելու անկարողություն

Գիտնականները պարզել են, որ արյան մեջ սթրեսի հորմոնի մակարդակի բարձրացումը կարող է բացասաբար ազդել գլխուղեղի այն հատվածների վրա, որոնք պատասխանատու են վերլուծական ունակությունների և քննադատական մտածողության համար: Այս դեպքում մարդը կարող է դժվարանալ անգամ իր մտքերը ձևակերպել:

2.      «Արջի հիվանդություն»

Սթրեսի ժամանակ աղիները դատարկելու ցանկությունը պայմանավորված է լինում ադենենոկորտիկոտրոպ հորմոնի ազդեցությամբ, որն առաջացնում է բարակ աղիքի դիսկենեզիա:

3.      Մաշկային խնդիրներ

Սթրեսը կարող է դրսևորվել նաև որոշ մաշկային խնդիրներով, որոնց շարքին են դասվում առատ քրտնարտադրությունը, ատոպիկ դերմատիտը և մաշկային քորը:

4.      Մրսածության ախտանշաններ

Սթրեսային հորմոնները թուլացնում են իմունային համակարգը, ինչի հետևանքով կարող են ի հայտ գալ մրսածությանը հատուկ ախտանշաններ (օրինակ՝ քթի փակվածություն, հազ, մարմնի ցավ և այլն):

5.      Մազաթափություն

Որքան երկար ժամանակ է մարդը գտնվում սթրեսային վիճակում, այնքան ավելի վատ վիճակում են հայտնվում նրա մազարմատները: Սակայն անգամ սթրեսից ազատվելու դեպքում մազերն անմիջապես չեն վերականգնվում, իսկ մազաթափությունը շարունակվում է դեռ որոշ ժամանակ:

6.      Լսողության հետ կապված խնդիրներ

Սթրեսի ժամանակ մարդիկ հաճախ գանգատվում են ականջներում լսվող աղմուկից: Բացի այդ, հաճախ փոխվում է նաև աղմուկի հանդեպ զգայունությունը, ինչի հետևանքով աղմուկն ու ձայները նյարդայնացնող են լինում:

7.      Վերքերի դանդաղ ապաքինում

Իմունային համակարգի թուլացման հետևանքով սթրեսի ժամանակ անգամ ամենափոքր վնասվածքները շատ ավելի դանդաղ են ապաքինվում:

8.      Որովայնի ցավեր

Սթրեսի հորմոնները բացասաբար են ազդում աղեստամոքսային տրակտի վրա, ինչի հետևանքով հաճախ առաջանում է ծանրության զգացողություն, փորափքանք և անգամ ցավեր, որոնք երբեմն չեն մեղմվում նույնիսկ դեղորայքի ընդունումից հետո:

Նյութի աղբյուրը՝ med2.ru