Բերանի խոռոչի տհաճ հոտի առաջացման պատճառներն ու խնդրից ազատվելու եղանակները

Բերանի խոռոչի տհաճ հոտը կարող է խիստ բացասաբար ազդել մարդու կյանքի որակի վրա՝ դառնալով առօրյա շփմանը խոչընդոտող լուրջ խնդիր: Հաճախ մարդն ինքը չի նկատում խնդիրը, ինչի հետևանով էլ ոչ միշտ է փորձում պարզել դրա առաջացման պատճառն ու ազատվել դրանից: Բացի այդ, անգամ խնդիրը նկատելու դեպքում մարդիկ հաճախ փորձում են քողարկել այն՝ առանց հաշվի առնելու, որ սա կարող է պայմանավորված լինել առողջական շատ ավելի լուրջ խնդրով, որն անտեսելը կարող է վտանգավոր լինել:

Բերանի խոռոչի տհաճ հոտի պատճառները

Տհաճ հոտը կարող է առաջին հերթին պայմանավորված լինել բերանի խոռոչի հիվանդություններով (կարիես, ստոմատիտ, պարօդոնտիտ և այլն) և լնդերի բորբոքմամբ, ուստի նախ հարկավոր է դիմել ատամնաբույժին, բուժզննում անցնել և անհրաժեշտության դեպքում բուժման կուրս անցնել:

Սակայն հարկավոր է շատ ուշադիր լինել, քանի որ երբեմն այս տհաճ խնդիրը վկայում է լուրջ հիվանդությունների մասին, ուստի միայն ատամնաբույժին դիմելը կարող է անարդյունավետ լինել: Տհաճ հոտը կարող է պայմանավորված լինել մարսողական համակարգի, աղեստամոքսային տրակտի, երիկամների ու լյարդի հիվանդություններով, ինչը նշանակում է, որ խնդիրն անտեսելը կարող է մի շարք տհաճ հետևանքներ ունենալ: Այս դեպքում բերանի խոռոչի տհաճ հոտի առաջացման պատճառը պարզելու համար հարկավոր է անպայման համալիր բուժզննում անցնել:

Նման ախտանշանով կարող են դրսևորվել նաև շնչառական ուղիների հիվանդությունները (օրինակ՝ սուր վարակիչ շնչառական հիվանդությունները, նշիկաբորբը և այլն): Այս դեպքում նույնպես հարկավոր է խորհրդակցել բժշկի հետ և բուժել հիմնական հիվանդությունը, ինչը կօգնի ազատվել նաև բնորոշ ախտանշաններից:

Բացի այդ, հարկ է հիշել, որ այս խնդիրը հաճախ է հանդիպում ծխախոտն ու ալկոհոլը չարաշահող մարդկանց մոտ: Սա պայմանավորված է լինում նրանով, որ նիկոտինն ու նիկոտինային խեժը կուտակվում են բերանի խոռոչում և ակտիվ կերպով բազմացող բակտերիաների հետ մեկտեղ դառնում խիստ տհաճ հոտի առաջացման պատճառ:

Ինչպես ազատվել բերանի խոռոչի տհաճ հոտից

Հաճախ տհաճ հոտից ազատվելու համար բավական է լինում պարզապես պատշաճ կերպով հետևել բերանի խոռոչի հիգիենային, սակայն եթե տհաճ հոտը պայմանավորված է որևէ այլ խնդրով, ապա հարկավոր է առաջին հերթին ազատվել հենց դրանից:

Սակայն լինում են դեպքեր, երբ տհաճ հոտն ի հայտ է գալիս առողջ և վատ սովորություններ չունեցող մարդու մոտ: Նման դեպքերում խնդրից ազատվելու համար մասնագետները խորհուրդ են տալիս.

·        ավելի ուշադիր լինել բերանի խոռոչի հիգիենայի հանդեպ (մաքրել ատամները սնվելուց հետո, օգտագործել հատուկ թել և խուսափել վատ սովորություններից),

·        օգտագործել բերանի խոռոչի ողողման համար նախատեսված հատուկ լուծույթներ, որոնք պարունակում են ցինկ ու քլորի երկօքսիդ, ինչի շնորհիվ մաքրում են բերանի խոռոչն ու ազատում տհաճ հոտից,

·        առավոտյան ու երեկոյան օգտագործել հատուկ ատամի մածուկ, որն օժտված կլինի հակասեպտիկ ու բուժիչ հատկություններով,

·        մաքրել ոչ միայն ատամները, այլև դրանց միջև եղած հատվածները, ինչպես նաև լեզուն, այտերը և առհասարակ բորանի խոռոչն ամբողջությամբ,

·        հաճախակի մաքրել ատամները ատամի մածուկով, ինչը կօգնի նվազեցնել բերանի խոռոչում վնասակար բակտերիաների քանակությունն ու ազատվել տհաճ հոտից,

·        օրվա ընթացքում բավարար քանակությամբ (առնվազն երկու լիտր) ջուր խմել, ինչը կօգնի կանխել բերանի խոռոչի չորացումն ու կկանխի բակտերիաների բազմացումը:

Այս պարզ հնարքները կօգնեն ազատվել բերանի խոռոչի տհաճ հոտից, սակայն եթե խնդիրը պայմանավորված է որևէ հիվանդությամբ, ապա դրանք անարդյունավետ կլինեն: Նման դեպքերում տհաճ հոտից ազատվելու համար հարկավոր է առաջին հերթին ազատվել դրա առաջացման պատճառից, ուստի անհրաժեշտ է խորհրդակցել բժշկի հետ, բուժզննում անցնել և հետևել մասնագետի բոլոր ցուցումներին:

Նյութի աղբյուրը՝ med2.ru