Ախտանշաններ, որոնք կարող են պայմանավորված լինել աղիների քաղցկեղով

Հաստ աղիքի քաղցկեղն ամենավտանգավոր հիվանդություններից մեկն է, որը վերջին տարիներին ավելի ու ավելի հաճախ է ախտորոշվում մինչև 50 տարեկան մարդկանց մոտ: Հիվանդության նման տարածվածությունն ու «երիտասարդացումը» լուրջ խնդիր է, ուստի մասնագետները պարբերաբար հիշեցնում են դրա ախտանշաններն իմանալու կարևորության մասին:

Քաղցկեղի այս տեսակը կարող է բավական երկար ժամանակ աննկատ մնալ, քանի որ շատերը պարզապես չեն նկատում դրա ախտանշանները կամ վերագրում են դրանք առողջական այլ խնդիրներին: Սա կարող է շատ վտանգավոր լինել, քանի որ այդ դեպքում հիվանդությունը խորանում է, իսկ բարեհաջող բուժման հավանականությունը՝ նվազում:

Նման խնդիրներից խուսափելու համար հարկավոր է անպայման պարբերաբար բուժզննում անցնել և սովորել տարբերել քաղցկեղի ախտանշանները, ուստի ձեր ուշադրությանն ենք ներկայացնում աղիների քաղցկեղի մասին վկայող 5 ախտանշան, որոնք ոչ մի դեպքում չի կարելի անուշադրության մատնել:

1.      Հոգնածության զգացում

Հոգնածության զգացումը կոլոռեկտալ քաղցկեղի մասին վկայող ամենատարածված ախտանշաններից մեկն է, որը մարդիկ հաճախ անտեսում են: Այս հիվանդությունից տառապողները հաճախ են գանգատվում հյուծվածությունից ու թուլությունից, ինչը պայմանավորված է լինում նրանով, որ օրգանիզմում սկսում են նվազել արյան կարմիր բջիջների ու երկաթի մակարդակները: Արդյունքում՝ զարգանում է երկաթդեֆիցիտային սակավարյունություն (անեմիա), որն էլ դրսևորվում է հոգնածության զգացումով ու շնչառության դժվարացմամբ:

2.      Հաստ աղիքի արյունահոսություն

Սա այն ախտանշաններից է, որոնք հիվանդները հաճախ վերագրում են այլ հիվանդություններին: Բանն այն է, որ ռեկտալ արյունահոսությամբ կարող են դրսևորվել նաև այնպիսի խնդիրները, ինչպիսին են թութքն ու ճաքերը: Սակայն հարկ է հիշել, որ արյունահոսությունը կարող է պայմանավորված լինել նաև քաղցկեղով, ուստի նման ախտանշանի դեպքում հարկավոր է անհապաղ խորհրդակցել բժշկի հետ:

3.      Արյան հետքեր կղանքի մեջ

Այս դեպքում արյունը կարող է փոխել արտաթորանքի գույնը՝ դարձնելով այն ավելի մուգ և անգամ սև: Սա շատ վտանգավոր ախտանշան է, որի առկայության դեպքում հարկավոր է անհապաղ դիմել բժշկին՝ լուրջ հետևանքներից խուսափելու համար:

4.      Փոփոխություններ՝ կապված աղիների աշխատանքի հետ

Ուռուցքը կարող է ազդել նաև աղիների աշխատանքի վրա և փոխել արտաթորանքի ձևը, գույնը և այլն: Նման դեպքերում հաճախ ի հայտ են գալիս այնպիսի ախտանշաններ, ինչպիսին են փորկապությունը, փորլուծությունը, աղիների ամբողջությամբ դատարկված չլինելու զգացողությունը և այլն: Եթե նման ախտանշաններից չի հաջողվում ազատվել ավելի քան մեկ շաբաթ, ապա հարկավոր է դիմել մասնագետին:

5.      Որովայնի ցավեր

Կոլոռեկտալ քաղցկեղը կարող է դրսևորվել նաև որովայնի ցավերով, սպազմներով, սրտխառնոցով ու փսխումով: Այս դեպքում հարկավոր է շատ ուշադիր լինել, քանի որ նման ախտանշանները կարող են վկայել ուռուցքի տարածման և այլ օրգանների ախտահարման մասին:

Ցավոք՝ զարգացման վաղ փուլերում կոլոռեկտալ քաղցկեղը կարող է ոչ մի կերպ չդրսևորվել, ուստի հիվանդությունը ժամանակին հայտնաբերելու և հետագա զարգացումը կանխելու համար հարկավոր է պարբերաբար բուժզննում անցնել և չանտեսել այս կամ այն ախտանշանը: Հարկ է հիշել, որ հիվանդությունը կանխարգելելն ու վաղ փուլերում բուժելը շատ ավելի հեշտ է ու արդյունավետ, քան հետագայում նաև դրա հետևանքով ի հայտ եկած բարդությունների դեմ պայքարելը, ուստի անհրաժեշտ է ավելի ուշադի լինել և հոգ տանել առողջության մասին:

Նյութի աղբյուրը՝ med2.ru