Որոնք են էնդոմետրիումի քաղցկեղի ախտանշանները, բուժման մեթոդներն ու հիվանդության առաջացմանը նպաստող ռիսկային գործոնները

Սեռական հորմոնների դիսբալանսը կարող է դառնալ կնոջ օրգանիզմում լուրջ խանգարումների առաջացման պատճառ՝ հանգեցնելով մի շատ վտանգավոր հիվանդությունների: Նման հիվանդությունների շարքին է դասվում էնդոմետրիումի քաղցկեղը, որն արգանդի լորձաթաղանթում առաջացած չարորակ նորագոյացությունն է:

Էնդոմետրիումի քաղցկեղը կանանց սեռական օրգանների առավել տարածված չարորակ հիվանդությունն է, որը, բարեբախտաբար, մեծ մասամբ հայտնաբերվում է զարգացման վաղ փուլերում, ինչը մեծացնում է բարեհաջող բուժման հավանականությունը:

Էնդոմետրիումի քաղցկեղի ախտանշանները

Ի տարբերություն շատ այլ նորագոյացությունների՝ էնդոմետրիումի քաղցկեղը բավական շուտ է դրսևորվում: Հիվանդության ամենատարածված ախտանշանը հեշտոցային արյունահոսություններն են, որոնք պայմանավորված չեն դաշտանային ցիկլով: Ընդ որում՝ այս հիվանդությունը հաճախ ախտորոշվում է դաշտանադադարից հետո:

Հարկ է հիշել, որ դաշտանադադարից հետո հեշտոցային ցանկացած արյունահոսություն որպես կանոն պայմանավորված է լինում լուրջ խնդիրներով, ուստի հարկավոր է անհապաղ բուժզննում անցնել:

Սակայն արյունահոսությունն էնդոմետրիումի քաղցկեղի մասին վկայող միակ ախտանշանը չէ: Այս հիվանդության դեպքում կարող են նկատվել այնպիսի ախտանշաններ, ինչպիսին են.

·         Թափանցիկ կամ սպիտակավուն հեշտոցային արտադրությունը,

·         Դաշտանի տևողության երկարացումը,

·         Առատ արյունահոսությունը,

·         Կոնքի հատվածի ցավերը,

·         Ցավը սեռական ակտի ժամանակ:

Մասնագետները նշում են, որ այս ախտանշանները ոչ միշտ են պայմանավորված լինում էնդոմետրիումի քաղցկեղով, ուստի խուճապի մատնվել պետք չէ, սակայն, այնուամենայնիվ, դրանց առկայության դեպքում հարկավոր է անպայման խորհրդակցել բժշկի հետ և անհրաժեշտության դեպքում բուժզննում անցնել:

էնդոմետրիումի քաղցկեղի առաջացմանը նպաստող ռիսկային գործոնները

Գոյություն ունեն որոշակի ռիսկային գործոններ, որոնք էլ ավելի են բարձրացնում հիվանդության առաջացման հավանականությունը, ուստի մասնագետները խորհուրդ են տալիս հնարավորինս ազատվել դրանցից՝ լուրջ խնդիրներից խուսափելու համար: Այդ ռիսկային գործոնների շարքին են դասվում.

·         կնոջ տարիքը (50 տարեկանից բարձր),

·         արյան մեջ էստրոգենի բարձր մակարդակը,

·         հղիության բացակայությունը (անամնեզում),

·         դաշտանադադարի ուշացումը,

·         վաղ սեռահասունությունը (մինչև 12 տարին լրանալը),

·         ճարպակալումը,

·         հորմոնային թերապիան (կրծքագեղձի քաղցկեղի բուժման կամ կանխարգելման համար),

·         շաքարային դիաբետը,

·         զարկերակային գերճնշումը:

Էնդոմետրիումի քաղցկեղի բուժումը

Զարգացման վաղ փուլերում էնդոմետրիումի քաղցկեղի բուժման միակ արդյունավետ միջոցն արգանդի վիրահատական հեռացումն է, սակայն որոշ դեպքերում լինում է նաև վերարտադրողական համակարգի մյուս օրգանների (ձվարաններ, արգանդափողեր, արգանդի վզիկ) հեռացման անհրաժեշտություն:

Բացի այդ, հաճախ էնդոմետրիումի քաղցկեղի դեպքում կիրառվում է նաև քիմիաթերապիա և ճառագայթային թերապիա: Ընդ որում՝ բուժման այս մեթոդները սովորաբար կիրառվում են վիրահատական բուժման հետ մեկտեղ:

Կարելի է կիրառել նաև հորմոնալ թերապիա, սակայն այս դեպքում հարկավոր է հաշվի առնել, որ բուժման այս մեթոդը հաճախ բավական արդյունավետ չի լինում:

Նյութի աղբյուրը՝ fabiosa.ru