Առողջական ինչ խնդիրների մասին կարող է վկայել քաշի անբացատրելի կորուստը

Ավելորդ քաշից ազատվելու մասին շատերն են երազում, սակայն մասնագետներն ընդգծում են, որ քաշի կտրուկ ու անբացատրելի նվազման դեպքում առաջին հերթին հարկավոր է բուժզննում անցնել, այլ ոչ թե ուրախանալ, քանի որ նման փոփոխությունը կարող է լինել շատ վտանգավոր հիվանդությունների ախտանշան:

Այս դեպքում քաշի կորուստը կարող է պայմանավորված լինել որևէ հիվանդությամբ, որն արդեն սկսել է զարգանալ, սակայն դեռ չի դրսևորվում այլ ակնհայտ ախտանշաններով, ինչը խիստ վտանգավոր է և կարող է լուրջ հետևանքներ ունենալ: Նման խնդիրներից խուսափելու համար մասնագետները ներկայացրել են առողջական այն խնդիրները, որոնք կարող են դրսևորվել քաշի կորստով:

1.      Հոգեկան խանգարումներ

Քաշի կորուստը կարող է պայմանավորված լինել հոգեկան խանգարումներով, ուստի այն ոչ մի դեպքում չի կարելի անտեսել: Ընդ որում՝ առավել վտանգավոր կարող է լինել նյարդային անորեքսիան, որի դեպքում մարդը հրաժարվում է սննդից: Շատերը կարծում են, որ անորեքսիայից տառապողը կարող է հեշտությամբ վերահսկողության տակ պահել իր սննդակարգը, մինչդեռ իրականում դա այդպես չէ: Այս հիվանդության դեպքում հարկավոր է անհապաղ դիմել բժշկին, քանի որ այն շատ վտանգավոր է կարող է լուրջ հետևանքներ ունենալ:

Մարդը կարող է հրաժարվել սննդից նաև խորը դեպրեսիայի ժամանակ, ինչպես նաև շիզոֆրենիայի դեպքում, ինչը պայմանավորված է նրանով, որ շիզոֆրենիայից տառապողներն այլ կերպ են ընկալում համերն ու բույրերը: Նման դեպքերում կարող են ի հայտ գալ նաև որոշ կենցաղային խնդիրներ, որոնք նույնպես կարող են բացասաբար ազդել քաշի ու սննդակարգի վրա (օրինակ՝ սնունդ պատրաստելու անկարողությունը):

2.      Աղիների բորբոքային հիվանդություններ

Քաշի նվազման պատճառ կարող են դառնալ նաև աղիների բորբոքային հիվանդությունները (մասնավորապես՝ Կրոնի հիվանդությունն ու ոչ սպեցիֆիկ խոցային կոլիտը): Այս հիվանդություններին բնորոշ ախտանշան է փորլուծությունը, ինչի պատճառով հիվանդները հաճախ խուսափում են սննդից: Խնդիրն այն է, որ նման հիվանդությունների ֆոնին աղիներում արագանում են այն գործընթացները, որոնք հանգեցնում են խոցերի, աբսցեսների և խուղակների (свищ) առաջացման: Դրանք կարող են դառնալ աղիների պատերի պատռվածքի պատճառ՝ բարձրացնելով արյան վարակման հավանականությունը:

3.      Հիպերթիրեոզ

Վահանաձև գեղձի գերակտիվությունը հանգեցնում է նյութափոխանակության արագացման, ինչի հետևանքով հիվանդի մոտ կարող է նկատվել քաշի անբացատրելի կորուստ: Նյութափոխության համակարգի նման արագ աշխատանքը կարող է դառնալ օրգանիզմի հյուծման պատճառ, ինչն էլ կհանգեցնի կենսական նշանակություն ունեցող օրգանների աշխատանքի խանգարման ու մի շարք լուրջ բարդությունների առաջացման:

4.      Քաղցկեղ

Քաշի անբացատրելի կորուստը հաճախ դառնում է օնկոլոգիական հիվանդությունների մասին վկայող առաջին ախտանշանը, որը նկատվում է հիվանդների 40%-ի մոտ: Բացի քաշի ու ախորժակի կորստից հիվանդների մոտ հաճախ նկատվում են նաև սրտխառնոց ու փսխում, փորկապություն, համի զգացողության կորուստ, ինչպես նաև կլման ախտի խանգարումներ և խնդիրներ՝ կապված սնունդը ծամելու հետ:

5.      ՄԻԱՎ

ՄԻԱՎ-ի դեպքում հիվանդի օրգանիզմը նորմալ չի յուրացնում սննդարար նյութերը, ինչի հետևանքով էլ քաշը նվազում է: Քաշի չափազանց կտրուկ կորուստ կարող է պայմանավորված լինել նրանով, որ ՄԻԱՎ-ն ուղեկցվում է նաև մեկ այլ վարակով: Մասնագետների խոսքով՝ ՄԻԱՎ-ի դեպքում քաշի կորուստը կարող է խանգարել իմունային համակարգին պայքարել վիրուսի դեմ, ուստի հիվանդները պետք է անպայման բավարար քանակությամբ սպիտակուց օգտագործեն, ինչը կօգնի պահպանել մկանային զանգվածը:

Նյութի աղբյուրը՝ medikforum.ru