5 խորհուրդ, որոնք կօգնեն պահպանել թոքերի առողջությունը

Թոքերի այնպիսի լուրջ հիվանդությունները, ինչպիսին են ասթման ու էմֆիզեման, բավական տարածված են ծխողների և էկոլոգիական անբարենպաստ պայմաններում ապրողների շրջանում: Սակայն մասնագետները նշում են, որ ծխախոտի չարաշահումն ու էկոլոգիական անբարենպաստ պայմանները թոքերի առողջությունը վտանգող միակ ռիսկային գործոնները չեն, քանի որ շատ մեծ նշանակություն են ունենում նաև մարդու կենսակերպն ու սովորությունները:

Թոքերի ախտահարումը կարող է շատ վտանգավոր լինել, ուստի հարկավոր է ավելի ուշադիր լինել: Ձեր ուշադրությանն ենք ներկայացնում 5 խորհուրդ, որոնք կօգնեն պահպանել թոքերի առողջությունն ու խուսափել շնչառական համակարգի լուրջ հիվանդություններից:

·        Հրաժարվել ծխախոտից

Սա թոքերի առողջության պահպանման առաջին ու ամենակարևոր նախապայմանն է, քանի որ ծխախոտի չարաշահումը զգալիորեն բարձրացնում է վտանգավոր հիվանդությունների (այդ թվում նաև թոքերի քաղցկեղի) առաջացման հավանականությունը: Ընդ որում՝ ռիսկային խմբում են հայտնվում ոչ միայն ծխող մարդիկ, այլև նրանց մտերիմները, քանի որ «պասիվ ծխողների» առողջությունը նույնպես վտանգված է լինում:

·        Լինել ֆիզիկապես ակտիվ

Ֆիզիկական ակտիվությունը չի դարձնի թոքերն ավելի ուժեղ, սակայն կստիպի, որ դրանք լիարժեք աշխատեն: Պարբերաբար ֆիզիկական վարժություններ կատարելը «կսովորեցնի» թոքերին ճիշտ աշխատել, ինչը հատկապես կարևոր է շնչառական համակարգի քրոնիկական հիվանդություններից տառապողների համար: Մասնագետները նշում են, որ թոքերի առողջությունը պահպանելու համար բավական է շաբաթական երեք անգամ մարզվել: Այս գրաֆիկին հետևելու դեպքում մարդը սովորում է ճիշտ շնչել, ինչի արդյունքում բոլոր օրգաններն ու համակարգերն ավելի շատ թթվածին են ստանում և ավելի լավ են աշխատում:

·        Խուսափել վարակներից

Թոքերի վարակները շատ վտանգավոր են՝ հատկապես տարեցների և թոքերի քրոնիկական հիվանդություններից տառապողների համար: Վարակները նպաստում են քրոնիկ հիվանդությունների սրմանն ու վտանգավոր բարդությունների առաջացմանը, ուստի հարկավոր է գոնե պարզ միջոցներ ձեռնարկել՝ վարակներից պաշտպանվելու համար: Պարզապես անհրաժեշտ է հետևել անձնական հիգիենային, հաճախ լվանալ ձեռքերը գոլ ջրով ու օճառով, ինչպես նաև խուսափել վարակակիրների հետ շփումից: Նաև հարկ է հիշել, որ իմունային համակարգի ճիշտ աշխատանքի համար հարկավոր է օրվա ընթացքում շատ ջուր խմել և օգտագործել միայն օգտակար սննդամթերք: Բացի այդ, պետք չէ մոռանալ պատվաստումների մասին, քանի որ կան վարակներ, որոնցից կարելի է պաշտպանվել պարզապես պատվաստվելով:

·        Սովորել խորը շնչել

Խորը շնչառությունն անչափ կարևոր է թոքերի և առհասարակ ամբողջ օրգանիզմի առողջության պահպանման համար, քանի որ ստացած թթվածնի քանակությունից է կախված ինչպես շնչառական համակարգի, այնպես էլ մյուս բոլոր համակարգերի առողջական վիճակը: Հարկ է հիշել, որ լիարժեք թթվածնային փոխանակության համար հարկավոր է սովորել խորը շնչել, իսկ դրա համար մասնագետները խորհուրդ են տալիս կատարել շնչառական վարժություններ:

·        Հոգատար լինել առողջության հանդեպ

Առողջական լուրջ խնդիրներից խուսափելու համար հարկավոր է ավելի ուշադիր լինել և սովորել նկատել օրգանիզմի տված ազդանշանները: Հարկ է հիշել, որ ցանկացած հիվանդության դեպքում օրգանիզմը միշտ նախազգուշացնում է ախտանշանների միջոցով, ուստի շնչառության հետ կապված խնդիրների, հազի, խորխի առկայության և ցավի դեպքում հարկավոր է անպայման բուժզննում անցնել՝ հետագա բարդություններից խուսափելու համար:

Նյութի աղբյուրը՝ med2.ru