Ինչ խնդիրների մասին է վկայում քրտինքի տհաճ հոտը և ինչպես կարելի է ազատվել դրանից

Առատ քրտնարտադրությունը բավական տհաճ խնդիր է, որի դեմ մարդիկ պայքարում են տարատեսակ հակաքրտինքային միջոցների օգնությամբ: Սակայն այդ միջոցները պարունակում են բազմաթիվ վտանգավոր քիմիական տարրեր, որոնք կարող են դառնալ առողջական լուրջ խնդիրների առաջացման պատճառ:

Այնուամենայնիվ՝ քչերը գիտեն, որ կան քրտնարտադրության ու քրտինքի տհաճ հոտի դեմ պայքարի բնական միջոցներ, որոնք նույնքան արդյունավետ են, սակայն շատ ավելի անվնաս, քանի որ չեն պարունակում որևէ վտանգավոր բաղադրիչ և չեն առաջացնում կողմնակի բարդություններ: Ձեր ուշադրությանն ենք ներկայացնում այդ բնական միջոցներից մի քանիսը:

Եփուկներ ու թուրմեր

Քրտինքի տհաճ հոտի դեմ պայքարի շատ արդյունավետ միջոց են դեղաբույսերը, սակայն այս դեպքում հարկավոր է ընտրել այն բույսերը, որոնք օժտված են մաշկը չորացնող հատկությամբ (օրինակ՝ կաղնի կամ վաղենակ): Ձեզ ենք ներկայացնում երկու արդյունավետ բաղադրատոմս, որոնք կօգնեն ազատվել տհաճ հոտից ու առատ քրտնարտադրությունից:

·        1 ճաշի գդալ կաղնու կեղևին ավելացնել 1 բաժակ եռման ջուր, 15 րոպե եփել թույլ կրակի վրա, այնուհետև թրմել մինչև հեղուկը սառչի և օգտագործել այն մաշկը շփելու համար: Այս բույսի թուրմը կօգնի ազատվել նաև ոտքերի առատ քրտնարտադրությունից: Սակայն այս դեպքում հարկավոր է 3 ճաշի գդալ կաղնու կեղևին ավելացնել 1 լիտր եռման ջուր, 1 ժամ թրմել, այնուհետև քամել և ոտքերը դնել այդ թուրմի մեջ՝ թողնելով 15-20 րոպե:

·        2 ճաշի գդալ վաղենակի չորացրած ծաղիկները 1 ժամ թրմել 1 լիտր եռման ջրում, այնուհետև օգտագործել ստացված թուրմը մաշկը շփելու համար: Այս թուրմը նաև հիանալի միջոց է ոտքերի քրտնարտադրությունից ազատվելու համար:

«Սառնարանային» միջոցներ

Կան նաև սննդամթերքի որոշ տեսակներ, որոնք նույնպես հիանալի միջոց են առատ քրտնարտադրության ու տհաճ հոտի դեմ պայքարելու համար: Դրանց շարքին են դասվում խնձորի քացախը, կիտրոնի հյութն ու կերակրի սոդան:

·        Օրինակ՝ խնձորի քացախի ջրային լուծույթը (1:1 հարաբերակցությամբ) կարելի է օգտագործել թևատակերի ու ոտնաթաթերի քրտնարտադրությունը նվազեցնելու և տհաճ հոտից ազատվելու համար:

·        Կիտրոնի հյութը կօգնի չորացնել մաշկն ու կկանխի այն միկրոօրգանիզմների բազմացումը, որոնք նպաստում են տհաճ հոտի առաջացմանը: Այս հյութը խորհուրդ չի տրվում քսել թևատակերի զգայուն մաշկին, սակայն այն հիանալի միջոց է ոտնաթաթերի քրտնարտադրության դեմ պայքարելու համար:

·        Շատ արդյունավետ կարող է լինել նաև կերակրի սոդան: Հարկավոր է 1 թեյի գդալ սոդան լուծել 1 բաժակ ջրում և օգտագործել ստացված լուծույթը որպես բնական հակաքրտինքային միջոց:

Եթերային յուղեր

Տհաճ հոտից ազատվելու հիանալի միջոց է նաև եթերայուղերով մերսումը: Այս մերսումը չի կարելի իրականացնել թևատակերի հատվածում, սակայն այն շատ արդյունավետ կլինի ոտնաթաթերի քրտնարտադրությունը նվազեցնելու համար:

Մերսման համար կարելի է օգտագործել թեյի ծառի յուղը, էվկալիպտի կամ վարդի յուղերը, սակայն հարկ է հիշել, որ եթերային յուղերը չի կարելի օգտագործել մաքուր վիճակում, քանի որ դրանցում պարունակվող մեծ քանակությամբ ակտիվ բաղադրիչները կարող են ալերգիկ ռեակցիաներ առաջացնել: Այս դեպքում հարկավոր է օգտագործել որևէ բազային յուղ (օրինակ՝ դեղձի կամ ձիթապտղի յուղ)՝ եթերայուղը լուծելու համար:

Հարկավոր է 1 թեյի գդալ բազային յուղին ավելացնել 5-10 կաթիլ եթերայուղ, լավ խառնել, այնուհետև օգտագործել այս խառնուրդը ոտնաթաթերը 10 րոպե նուրբ ու սահուն շարժումներով մերսելու համար:

Այս պրոցեդուրայից հետո հարկավոր է ոտքերը նախ լվանալ գոլ ջրով, այնուհետև ցողել սառը ջրով: Ի դեպ՝ կոնտրաստային ցնցուղը նույնպես հիանալի միջոց է քրտինքի առատության և տհաճ հոտի դեմ պայքարելու համար:

Խորհուրդներ` քրտիքի տհաճ հոտից խուսափելու համար

Քրտինքի տհաճ հոտից խուսափելու համար հարկավոր է պարզապես հետևել մի քանի պարզ կանոնի: Առաջին հերթին անհրաժեշտ է անպայման օգտագործել հոտազերծիչ ու քրտնազերծիչ միջոցներ: Ընդ որում՝ հարկավոր է հասկանալ, թե որն է դրանց տարբերությունը: Հոտազերծիչները (дезодоранты) քողարկում են քրտինքի տհաճ հոտը, մինչդեռ քրտնազերծիչները (антиперспиранты) խոչընդոտում են քրտինքի արտազատմանը: Սակայն հարկ է հիշել, որ առողջությանը վնաս չհասցնելու համար հակաքրտինքային միջոցները հարկավոր է թողնել մաշկի վրա առավելագույնը 8 ժամ, որից հետո հարկավոր է անպայման լվացվել:

Տհաճ հոտից ազատվելու համար հարկավոր է կանխել նաև մաշկի ծալքերում քրտինքի լճացումը: Այս դեպքում շատ արդյունավետ կարող է լինել տալկը, որը հարկավոր է քսել մաքուր ու չոր մաշկին:

Ոչ մի դեպքում չի կարելի փորձել քողարկել քրտինքի տհաճ հոտն օծանելիքի միջոցով, քանի որ այդ դեպքում հոտն էլ ավելի տհաճ կլինի:

Նաև գոյություն ունեն սննդամթերքի որոշ տեսակներ, որոնցից խորհուրդ է տրվում խուսափել, քանի որ դրանց գործածության դեպքում քրտինքի հոտը հաճախ չափազանց տհաճ է լինում: Դրանց շարքին են դասվում.

·        որոշ համեմունքները. քրտիքի հոտը հատկապես տհաճ է լինում հնդկական քարի համեմունքի և քիմիոնի գործածության դեպքում,

·        միսը. ուսումնասիրությունները ցույց են տվել, որ մսամթերքի սիրահարների քրտինքն ավելի տհաճ հոտ է ունենում, քան բուսակերներինը,

·        սխտորը. այս օգտակար բանջարեղենը կարող է դառնալ ոչ միայն բերանի խոռոչի տհաճ հոտի պատճառ, այլև քրտինքի,

·        ալկոհոլը. ալկոհոլային ինտոքսիկացիայի դեպքում վնասակար նյութերն օրգանիզմից դուրս են գալիս տարբեր կերպ՝ այդ թվում նաև քրտնագեղձերի միջոցով,

·        սոյան և սոյայով պատրաստված մթերքը. նման մթերքի մարսման ընթացքում օրգանիզմում արտազատվում է մի յուրահատուկ ֆերմենտ, որի պատճառով քրտինքը չափազանց տհաճ հոտ է ունենում:

Առողջական ինչ խնդիրների մասին կարող է վկայել քրտինքի տհաճ հոտը

Հարկ է հիշել, որ հիգիենայի կանոններին ճիշտ հետևելու և բավարար քանակությամբ հեղուկ օգտագործելու դեպքում քրտինքը չպետք է սուր ու տհաճ հոտ ունենա, ուստի այս խնդիրը կարող է նաև որոշ հիվանդությունների մասին վկայող ախտանշան լինել: Տհաճ հոտի առկայության դեպքում հարկավոր է ավելի ուշադիր լինել, քանի որ այդ ախտանշանն անտեսելը կարող է լուրջ բարդությունների առաջացման պատճառ դառնալ: Օրինակ.

·        ոտքերի տհաճ հոտը կարող է վկայել ոտնաթաթերի սնկային վարակի մասին,

·        ամոնիակի հոտով քրտինքը կարող է վկայել վահանաձև գեղձի հետ կապված խնդիրների և արյան մեջ շաքարի մակարդակի տատանման մասին,

·        ացետոնի հոտը հաճախ պայմանավորված է լինում շաքարային դիաբետով և երիկամների հիվանդություններով,

·        քլորակրի (хлорка) հոտը վկայում է լյարդի կամ երիկամների աշխատանքի խանգարման մասին,

·        ձկան տհաճ հոտով քրիտինքը կարող է պայմանավորված լինել հակաբիոտիկների ընդունմամբ և աղեստամոքսային տրակտի հիվանդություններով:

Նյութի աղբյուրը՝ aif.ru