Որոնք են պոլիկիստոզային ձվարանների համախտանիշի հիմնական ախտանշաններն ու բուժման եղանակները

Պոլիկիստոզային ձվարանների համախտանիշը բավական լուրջ խնդիր է, որը չբուժելը կարող է հանգեցնել մի շարք այլ վտանգավոր հիվանդությունների՝ այդ թվում նաև սրտի հիվանդությունների ու շաքարային դիաբետի առաջացման: Բացի այդ, այս հիվանդությունը կարող է դառնալ դաշտանային ցիկլի խանգարումների և հղիության ընթացքում բարդությունների առաջացման պատճառ, ուտսի հարկավոր է հնարավորինս շուտ ազատվել դրանից:

Պոլիկիստոզային ձվարանների համախտանիշը, ինչպես և ցանկացած այլ հիվանդություն, դրսևորվում է մի շարք ախտանշաններով, որոնք իմանալը կօգնի ժամանակին ախտորոշել խնդիրն ու քայլեր ձեռնարկել՝ դրանից ազատվելու համար:

Ձեր ուշադրությանն ենք ներկայացնում 8 ախտանշան, որոնք կարող են պայմանավորված լինել պոլիկիստոզային ձվարանների համախտանիշով:

1.      Բեղմնավորման հետ կապված խնդիրներ

Այս հիվանդության ամենատհաճ հետևանքներից մեկը հղիանալու հետ կապված խնդիրներն են: Մասնագետները նախազգուշացնում են, որ պոլիկիստոզային ձվարանների համախտանիշը մի վիճակ է, որը հանգեցնում է անպտղության, ուստի հարկավոր է հնարավորինս շուտ ազատվել այս խնդրից:

2.      Դաշտանային ցիկլի խանգարումներ

Պոլիկիստոզային ձվարանների համախտանիշի ամենատարածված ախտանշանը համարվում է դաշտանային ցիկլի խանգարումը: Այս դեպքում կարող են նկատվել այնպիսի խնդիրներ, ինչպիսին են երկարատև դաշտանը, երկարատև դաշտանային ցիկլը (35 օրից ավել), դաշտանի բացակայությունը և այլն:

3.      Անցանկալի մազեր

Այս հիվանդության դեպքում անցանկալի մազերը կարող են ի հայտ գալ մարմնի տարբեր հատվածներում, ինչը պայմանավորված է լինում օրգանիզմում անդրոգեն հորմոնների մակարդակի փոփոխությամբ:  

4.      Ակնե

Պոլիկիստոզային ձվարանների համախտանիշի մասին կարող է վկայել նաև ակնեն, որը դրսևորվում է մաշկային այնպիսի խնդիրներով, ինչպիսին են բշտիկները, կորյակները և այլն: Առավել հաճախ ախտահարվում է կրծքի, դեմքի, մեջքի ու ուսերի մաշկը

5.      Քնի խանգարումներ

Անքնությունն ու քնի այլ խանգարումները նույնպես կարող են պայմանավորված լինել պոլիկիստոզային ձվարանների համախտանիշով: Բանն այն է, որ քնի որակի վրա կարող են ազդել տարբեր գործոններ, իսկ այս հիվանդությունից տառապողների մոտ հաճախ նկատվում է քնի օբստրուկտիվ ապնոէ, որն էլ դրսևորվում է քնի ժամանակ շնչառության խանգարումներով

6.      Հոգնածության զգացում

Պոլիկիստոզային ձվարանների համախտանիշի ամենատարածված ախտանշանների շարքին է դասվում նաև հոգնածությունը, որից չի հաջողվում ազատվել բավական երկար ժամանակ: Սա պայմանավորված է լինում օրգանիզմում ընթացող հորմոնալ բարդ տատանումներով, ուստի այս ախտանշանի առկայության դեպքում հարկավոր է անպայման բուժզննում անցնել:

7.      Փորափքանք

Փորափքանքն այս դեպքում հաճախ ուղեկցվում է գաստրոէնտերիտով ու որովայնի խոռոչում տհաճ զգացողություններով: Հարկ է հիշել, որ գոյություն ունեն սննդամթերքի որոշ տեսակներ, որոնք էլ ավելի են վատացնում վիճակը, ուստի դրանցից հարկավոր է հնարավորինս խուսափել: Փորափքանք առաջացնող սննդամթերքի շարքին են դասվում ծնեբեկը, լոբազգիները, բրոկոլին, կաղամբը, ծաղկակաղամբը, կաթնամթերքը, գազավորված ըմպելիքները, արհեստական քաղցրացուցիչները, ամբողջահատիկ մթերքը և այլն:

8.      Դեպրեսիա

Պոլիկիստոզային ձվարանների համախտանիշի ժամանակ առաջացած հորմոնալ դիսբալանսը հաճախ դառնում տրամադրության տատանումների պատճառ: Նման դեպքերում հաճախ ի հայտ է գալիս դեպրեսիա, որն անուշադրության մատնելու դեպքում կարող է պահպանվել մի քանի օր, ամիս և անգամ տարի:

Այսպիսով՝ պոլիկիստոզային ձվարանների համախտանիշը շատ լուրջ խնդիր է, որը ոչ մի դեպքում չի կարելի անտեսել, ուստի նշված ախտանշանների առկայության դեպքում հարկավոր է անմիջապես դիմել մասնագետին ու միջոցներ ձեռնարկել: Սակայն գոյություն ունեն պարզ քայլեր, որոնք կօգնեն զգալիորեն բարելավել առողջական վիճակը:

1.      Ֆիզիկական ակտիվություն

Ֆիզիկական ակտիվությունն ու մարզումները շատ կարևոր են պոլիկիստոզային ձվարանների համախտանիշից տառապողների ինքնազգացողության բարելավման համար, ուստի հարկավոր է պարբերաբար մարզվել: Բացի այդ, ֆիզիկական ակտիվությունն օգնում է վերահսկողության տակ պահել քաշն ու պայքարել դեպրեսիայի դեմ:

2.      Ճիշտ սննդակարգ

Առողջ սննդակարգը շատ կարևոր է՝ հատկապես պոլիկիստոզային ձվարանների համախտանիշից տառապողների համար, ուստի մասնագետները խորհուրդ են տալիս հարստացնել սննդակարգը մրգերով, բանջարեղեններով և բուսական ճարպերով և միևնույն ժամանակ հրաժարվել շաքար, վնասակար ճարպեր ու նատրիում պարունակող սննդամթերքից:

3.      Ծխախոտի բացառում

Գիտնականներն ապացուցել են , որ անդրոգեն հորմոնների ու ծխախոտի չարաշահման միջև կա ակնհայտ կապ, ուստի զարմանալի չէ, որ պոլիկիստոզային ձվարանների համախտանիշի տհաճ ախտանշանները մեղմելու համար հիվանդներին խորհուրդ է տրվում առաջին հերթին հրաժարվել ծխախոտից:

4.      Քաշի վերահսկում կամ նվազեցում

Պոլիկիստոզային ձվարանների համախտանիշի բուժման լավագույն մեթոդներից մեկն ավելորդ քաշից ազատվելն ու առողջ քաշը պահպանելն է: Օրգանիզմում մեծ քանակությամբ ճարպերի կուտակումը կարող է դառնալ անկանոն հորմոնային ակտիվության պատճառ, ուստի հարկավոր է անպայման վերահսկողության տակ պահել քաշը:

5.      Հորմոնալ թերապիա

Եթե բուժման նշված մեթոդներն անարդյունավետ են և հիվանդության ախտանշանները շարունակում են անհանգստացնել, ապա հարկավոր է դիմել մասնագետին և հորմոնալ թերապիա անցնել: Այս դեպքում հաճախ նշանակվում են հատուկ դեղամիջոցներ, որոնք օգնում են մեղմել պոլիկիստոզային ձվարանների համախտանիշի տհաճ ախտանշանները:

Նյութի աղբյուրը՝ powerofpositivity.com