Ինչպես պահպանել հոդերի առողջությունն ու կանխել հոդատապի առաջացումը

21:16 • 01.06.18

Հոդերի ամենատարածված հիվանդություններից մեկը հոդատապն է, որը բարդանալու դեպքում վերածվում է հոդատապային արթրիտի: Այս հիվանդության առաջացման հիմնական պատճառները նյութափոխանակության խանգարումն ու հոդերի հյուսվածքներում միզաթթվի կուտակումներն են:

Սակայն մասնագետները նկատել են, որ հոդատապն ու հոդերի այլ հիվանդությունները բավականին տարածված է նաև ճարպակալումից տառապողների շրջանում, ինչը բացատրվում է սխալ սննդակարգով, ալկոհոլի չարաշահմամբ, ինչպես նաև հեղուկի պակասով: Ընդ որում՝ նշված գործոնները կարող են դառնալ ինչպես հոդատապի, այնպես էլ դրա առաջացմանը նպաստող ճարպակալման զարգացման պատճառ:

Ինչպես պահպանել հոդերի առողջությունը

Ձեր ուշադրությանն ենք ներկայացնում պարզ խորհուրդներ, որոնց հետևելու դեպքում կարելի է խուսափել հոդատապից և պահպանել հոդերի առողջությունը:

· Օրական հարկավոր է առնվազն 9 բաժակ չգազավորված մաքուր ջուր խմել:

· Բացի այդ, անհրաժեշտ է ամեն օր խմել առնվազն մեկ բաժակ բուսական թուրմ, քանի որ նման ըմպելիքներն օգնում են բնական ճանապարհով դուրս բերել միզաթթուն օրգանիզմից:

· Աղանդերի փոխարեն ցանկալի է ուտել խնձոր, ուստի նախաճաշից, ճաշից ու ընթրիքից հետո խորհուրդ է տրվում մեկական խնձոր ուտել:

· Ելակն ու բալը արդյունավետ կերպով քայքայում են միզաթթվի աղերը, ուստի խորհուրդ է տրվում անպայման ներառել դրանք սննդակարգում:

· Շատ օգտակար են նաև ընկույզները, քանի որ դրանցում պարունակվող օմեգա-3 ճարպաթթուները բարելավում են արյան շրջանառությունը, ինչը շատ կարևոր է նաև հոդերի համար:

· Հոդատապի կանխարգելման համար մասնագետները խորհուրդ են տալիս ամեն օր խմել ճակնդեղի, գազարի, կոճապղպեղի և խնձորի թարմ քամած հյութեր (օրական մեկ բաժակ մրգային կամ բանջարեղենային հյութ):

Հարկ է հիշել, որ հոդատապի ախտանշանների ի հայտ գալու և քաշի ավելացման դեպքում անհրաժեշտ է անպայման դիմել մասնագետին և թույլ չտալ, որ հիվանդությունն էլ ավելի խորանա:

Նյութի աղբյուրը՝ med2.ru