6 թվացյալ «անվնաս» ախտանշան, որոնք կարող են պայմանավորված լինել մահացու ախտաբանությամբ

Հաճախ մարդիկ անտեսում են որոշ ախտանշաններ, որոնք թվում են անվնաս, սակայն կարող են պայմանավորված լինել, վտանգավոր և նույնիսկ մահացու հիվանդություններով։

Օրգանիզմը միշտ ազդանշաններ է տալիս այս կամ այն խնդրի դեպքում, սակայն երբեմն այդ ազդանշանները բավարար ինտենսիվությամբ չեն լինում։ Հաճախ դրանք կարող են դրսևորվել ծակծկոցով կամ աննշան ցավով, որից կարելի է ազատվել դեղահաբերի օգնությամբ։ Սակայն դա չի նշանակում, որ օրգանիզմը չունի օգնության կարիք։ Aif.ru կայքը ներկայացրել է ախտանշանների մի շարք, որոնց հարկավոր է առանձնահատուկ ուշադրություն դարձնել։

Ցավեր կրծքավանդակի հատվածում

Համարվում է, որ կրծքավանդակի ցավերն ու սեղմվածության զգացումը սրտային անբավարարության նշան են։ Հաճախ դա հենց այդպես էլ լինում է, և այդ զգացողություններն ուղեկցվում են արյան բարձր ճնշումով, շնչառության արագացմամբ ու սրտխառնոցով։ Նման ախտանշանների դեպքում հարկավոր է անմիջապես այցելել սրտաբանի։

Սակայն այս ցավը կարող է լինել նաև այլ՝ ոչ պակաս վտանգավոր ախտաբանությունների հետևանքով, ինչպիսիք են թոքաբորբը, թոքերի լորձաթաղանթի բորբոքումը կամ քաղցկեղը։ Ցավը կարող է լինել տարբեր տեսակի և ուժգնության և հաճախ կարող է մեղմանալ ցավազրկողների ազդեցությունից։ Սակայն այս կերպ հիվանդը միայն ժամանակ կկորցնի և կարող է էլ ավելի վատացնել իրավիճակը։ Սա է պատճառը, որ նման ախտանշանների դեպքում անհրաժեշտ է անմիջապես դիմել մասնագետի օգնությանը՝ ցավի պատճառը պարզելու համար։

Կտրուկ ուշագնացություն

Մարդիկ հաճախ ուշագնացությունները կապում են գերհոգնածության, շոգի ու տոթի, դեպրեսիաների ու սթրեսի հետ, սակայն դրանք կարող են լինել շատ ավելի լուրջ ախտաբանության՝ գլխուղեղի կաթվածի նշան։ Գլխուղեղի արյան շրջանառության խանգարման հետևանքով բջիջներն ու հյուսվածքները սկսում են մահանալ, ինչն էլ հանգեցնում է ուշագնացության։ Վերջինիս կարող են նախորդել ինքնազգացողության վատացումը, սրտխառնոցը, ականջներում լսվող աղմուկը և աչքերի առաջ «սև կետերի» ի հայտ գալը։ Նման ուշագնացությունները երկար չեն տևում (մի քանի վայրկյան), սակայն լինում են նաև բացառություններ։ Այս դեպքում անհրաժեշտ է բժշկի անհապաղ օգնություն։

Քաշի կտրուկ նվազում

Շատերն են երազում նիհարել, և շատերն էլ գիտեն, որ այդ գործընթացը պետք է լինի սահուն ու զգույշ։ Եթե մարմնի զանգվածը կտրուկ նվազում է, ապա անհրաժեշտ է խորհրդակցել բժշկի հետ։ Բժիշկների հավաստմամբ՝ խիստ վտանգավոր է համարվում կարճ ժամանակահատվածում մարմնի զանգվածի 5%-ի կորուստը։ Քաշի կտրուկ նվազելը կարող է պայմանավորված լինել քաղցկեղով, շաքարային դիաբետով, աղիների հիվանդություններով, վահանաձև գեղձի հիվանդություններով, թոքախտով, Ալցհեյմերի հիվանդությամբ, երիկամային անբավարարությամբ և այլն։ Նման խնդիրներն անհրաժեշտ է բուժել հնարավորինս շուտ, քանի որ դրանց հետևանքները նույնպես կարող են շատ լուրջ լինել։

Բարձր ջերմություն

Երկարատև բարձր ջերմությունը, նույնիսկ սովորականից շատ քիչ բարձր լինելու դեպքում, կարող է լինել բավական տհաճ, քանի որ ուղեկցվում է ուժասպառությամբ և տարբեր օրգանների գործունեության խանգարմամբ։  Այս ախտանշանի պատճառները կարող են լինել շատ տարբեր՝ մենինգիտ, աստիճանաբար քրոնիկի վերածվող վարակներ, քաղցկեղ (մասնավորապես՝ լիմֆոմա) և այլն, սակայն դրանք բոլորն էլ անչափ վտանգավոր են և անհրաժեշտ է հնարավորինս շուտ բուժել դրանք։

Մշտական հոգնածություն

Մարդկային օրգանիզմի համար հոգնածությունը սովորական երևույթ է, ինչի միջոցով մարմինը հաղորդում է, որ իր ուժերը գրեթե սպառվել են։ Սակայն եթե հոգնածությունը կրում է մշտական բնույթ, նույնիսկ լիարժեք հանգստի դեպքում, ապա այն կարող է լինել անեմիայի, դեպրեսիայի և նույնիսկ քաղցկեղի նշան։ Նման ախտաբանությունների հնարավոր զարգացումից խուսափելու համար հարկավոր է ժամանակին անցնել անհրաժեշտ բուժզննումը։

Ջղաձգման համախտանիշ

Ջղաձգումները շատերին են ծանոթ և բոլորն էլ գիտեն, որ այդ դեպքում հարկավոր է ծակել մաշկը որևէ սուր բանով, մերսել այն, վերականգնել օրգանիզմում կալիումի մակարդակը բանան ուտելով և այլն։ Սակայն իրականում ջղաձգումները կարող են պայմանավորված լինել սրտի հետ կապված լուրջ խնդիրներով։ Բացի այդ, դրանք կարող են առաջանալ նաև հորմոնների կամ անոթների խնդիրների կամ թրոմբի առաջացման հետևանքով։

Հարկավոր է ավելի ուշադիր լինել օրգանիզմի հանդեպ և չանտեսել նրա տված «հուշումները»։ Այս կերպ կհաջողվի խուսափել բարդություններից և բուժել հիվանդությունը դեռ վաղ փուլում։