Որոնք են սրտամկանի ինֆարկտի հիմնական ախտանշաններն ու դրա առաջացմանը նպաստող ռիսկային գործոնները

Սրտամկանի ինֆարկտը լուրջ խնդիր է, որին կարող են բախվել ինչպես կանայք, այնպես էլ տղամարդիկ: Սա բավական վտանգավոր խնդիր է, սակայն ճիշտ քայլեր ձեռնարկելը կօգնի փրկել մարդու կյանքը:

Սրտամկանի ինֆարկտը, ինչպես և ցանկացած այլ հիվանդություն, միշտ դրսևորվում է որոշ ախտանշաններով: Ձեր ուշադրությանն ենք ներկայացնում այդ ախտանշաններից մի քանիսը, որոնք իմանալը կօգնի ժամանակին միջոցներ ձեռնարկել և խուսափել լուրջ բարդություններից:

1.      Ցավ ու տհաճ զգացողություններ կրծքավանդակում

Սրտամկանի ինֆարկտի դեպքում կրծքավանդակում առաջացած ցավն ու տհաճ զգացողությունները տարածվում են նաև թևի, պարանոցի, ծնոտի և մեջքի հատվածում: Սովորաբար տհաճ զգացողություններն ի հայտ են գալիս կրծքավանդակի մեջտեղի հատվածում կամ ձախ կողմում, սակայն այն կարող է տարածվել ինչպես ձախ, այնպես էլ աջ թևի հատվածում:

Հաճախ մարդկանց շփոթության է մատնում ստամոքսի այրոցը կամ մարսելախանգարումը: Բանն այն է, որ այս խնդիրները նույնպես կարող են դրսևորվել կրծքավանդակի ցավով ու տհաճ զգացողություններով:

2.      Հևոց

Սրտամկանի ինֆարկտի դեպքում հիվանդը դժվարանում է շնչել, ինչը պայմանավորված է լինում կրծքավանդակի սեղմվածությամբ ու ճնշվածությամբ: Ընդ որում՝ հևոցը կարող է անհանգստացնել անգամ հանգստի ժամանակ կամ էլ ավելի ուժեղանալ ֆիզիկական ակտիվության դեպքում:

3.      Գլխապտույտ

Սրտամկանի ինֆարկտի մասին վկայող ամենատարածված ախտանշաններից մեկն է նաև կտրուկ գլխապտույտը, որը ոչ մի դեպքում չի կարելի անուշադրության մատնել:

4.      Սառը քրտինք

Բացի այդ, սրտամկանի ինֆարկտի ժամանակ հաճախ առատանում է հիվանդի քրտնարտադրությունն ու նկատվում է սառը քրտինք:

Սրտամկանի ինֆարկտի մասին վկայող մյուս ախտանշաններն են սրտխառնոցը, փսխումը, հոգնածությունն ու անհանգստությունը: Հաճախ սրտամկանի ինֆարկտի մասին վկայող ախտանշանները մարդիկ նկատում են այն ժամանակ, երբ արդեն բավական ուշ է լինում, ուստի լուրջ խնդիրներից խուսափելու համար հարկավոր է ավելի ուշադիր լինել:

Բացի այդ, հարկավոր է հիշել, որ խնդրի կանխարգելումը շատ ավելի հեշտ է, քան դրա բուժումը, ուստի անհրաժեշտ է հնարավորինս խուսափել կամ վերահսկողության տակ պահել այն ռիսկային գործոնները, որոնք կարող են դառնալ սրտամկանի կաթվածի պատճառ: Ձեր ուշադրությանն ենք ներկայացնում այդ գործոններից մի քանիսը:

·         Տարիքը

Սրտամկանի ինֆարկտի հավանականությունը տղամարդկանց մոտ կտրուկ բարձրանում է 45 տարեկանից հետո, իսկ կանանց մոտ 55 տարեկանից հետո, ուստի հարկավոր է ձեռնարկել կանխարգելիչ միջոցներ՝ առողջական նման լուրջ խնդրից խուսափելու համար:

·         Ծխախոտի չարաշահում

Երկար ժամանակ ծխող մարդկանց մոտ (անգամ «պասիվ ծխողների» մոտ) զգալիորեն բարձրանում է սրտամկանի ինֆարկտի հավանականությունը: Ծխախոտի չարաշահումը բացասաբար է ազդում զարկերակների հյուսվածքների վրա, ինչի հետևանքով ճարպաթթուները հեշտությամբ կուտակվում են անոթների պատերին:

·         Զարկերակային բարձր ճնշում

Զարկերակային ճնշման բարձրացումը կարող է պայմանավորված լինել տարբեր պատճառներով (օրինակ՝ ճարպակալումով, արյան մեջ խոլեստերինի բարձր մակարդակով, ծխախոտի չարաշահմամբ, շաքարային դիաբետով և այլն), սակայն այս խնդիրը կարող է դառնալ զարկերակների վնասման պատճառ՝ նպաստելով այդ հատվածներում ճարպաթթուների կուտակմանը:

·         Արյան մեջ խոլեստերինի բարձր մակարդակ

Գոյություն ունի խոլեստերինի մի քանի տեսակ, որոնք են տրիգլիցերիդները, ցածր խտության լիպոպրոտեինները (LDL), շատ ցածր խտության լիպոպրոտեինները (VLDL) և բարձր խտության լիպոպրոտեինները (HDL): Տրիգլիցերիդները, ինչպես նաև ցածր խտության և շատ ցածր խտության լիպոպրոտեինները համարվում են «վատ» խոլեստերին, որը կուտակվում է անոթներում՝ բարձրացնելով սրտամկանի ինֆարկտի հավանականությունը: Սակայն հարկ է հիշել, որ գոյություն ունի նաև «լավ» խոլեստերին՝ բարձր խտության լիպոպրոտեինները, ուստի խոլեստերինով հարուստ սննդամթերքի գործածությունից ոչ մի դեպքում չի կարելի խուսափել:

·         Շաքարային դիաբետ

Շաքարային դիաբետը պայմանավորված է լինում ինսուլինի հանդեպ զգայունության կորստով կամ ինսուլինի արտադրման նվազմամբ: Հարկ է հիշել, որ արյան մեջ շաքարի մամարդակի բարձրացումը կարող է կործանարար լինել օրգանիզմի համար, ուստի հարկավոր է միշտ վերահսկողության տակ պահել շաքարի մակարդակը:

·         Գենետիկական նախատրամադրվածություն

Այն մարդիկ, որոնց մոտ հարազատները (օրինակ՝ ծնողները, քույրերը կամ եղբայրները և այլն) վաղ տարիքում (տղամարդիկ 45 տարեկանից հետո, իսկ կանայք՝ 65 տարեկանից հետո) տառապել են սրտամկանի ինֆարկտից, նույնպես համարվում են ռիսկային խմբում, ուստի հարկավոր է ավելի ուշադիր լինել ընտանեկան անամնեզի հանդեպ:

·         Ճարպակալում

Սրտամկանի ինֆարկտի առաջացմանը նպաստող գործոնների շարքին է դասվում նաև ճարպակալումը, որը կարող է պայմանավորված լինել շաքարային դիաբետով, խոլեստերինի բարձր մակարդակով կամ անգամ զարկեակային ճնշման բարձրացմամբ: Սակայն մասնագետները նշում են, որ հիմնական քաշի 10%-ն էլ անգամ կորցնելու դեպքում կարելի է զգալիորեն բարելավել առողջական վիճակը:

Նյութի աղբյուրը՝ righthomeremedies.com