Ինչու են մարդիկ գիրանում 40 տարեկանից հետո և ինչպես պայքարել այս խնդրի դեմ

40 տարեկանից հետո շատերի քաշն ավելանում է՝ չնայած, որ սննդակարգն ու ֆիզիկական ակտիվության մակարդակը չեն փոխվում:

Հարկ է հիշել, որ անգամ նույն ակտիվության ու նույն սննդակարգի դեպքում այս տարիքում մարդիկ հաճախ գիրանում են, քանի որ օրգանիզմը սկսում է ծերանալ, ինչի հետևանքով դանդաղում են նյութափոխանակության գործընթացները, նվազում է մկանային զանգվածը և կազմվածքի պահպանման համար շատ կարևոր որոշ հորմոնների մակարդակը:

Մասնագետները ներկայացրել են այս տարիքում քաշի ավելացման հիմնական պատճառներն ու դրանց դեմ պայքարի արդյունավետ միջոցները:

Նյութափախանակության դանդաղում

Ուսումնասիրությունները ցույց են տվել, որ 40 տարեկանից հետո մարդկանց նյութափոխանակությունը դանդաղում է 3.1-3.3%-ով: Սա նշանակում է, որ մարդու օրգանիզմը հանգիստ վիճակում օրական 50-60 կալորիա պակաս է այրում: Առաջին հայացքից սա աննշան է թվում, սակայն սննդակարգում ու կենսակերպում փոփոխություններ չանելու դեպքում կարելի է տարեկան 3 կգ ավելորդ քաշ կուտակել:

Նման խնդրից խուսափելու համար հարկավոր է վերանայել սննդակարգն ու նվազեցնել օգտագործվող կալորիաների քանակը: Հարկ է հիշել, որ ավելորդ քաշից ազատվելու համար հարկավոր է առաջին հերթին նվազեցնել արագ յուրացվող ածխաջրերի քանակությունը և սկսել հաշվել օգտագործվող կալորիաները՝ օրական սահմանված նորման չգերազանցելու համար:

Մկանային զանգվածի նվազում

50 տարեկանից հետո մարդը սկսում է շատ արագ կորցնել մկանային զանգվածը (տարեկան 15%), սակայն հարկ է հիշել, որ մկանային զանգվածը արդեն իսկ սկսում է աստիճանաբար նվազել 30 տարեկանից հետո: Ուսումնասիրությունները ցույց են տվել, որ մկանային զանգվածի տարբերությունը 40 տարեկանից առաջ ու հետո կարող է լինել 16.6-40.9%:

Տարիքային փոփոխությունները, ֆիզիկական ակտիվության պակասն ու տեստոստերոնի մակարդակի նվազումը բացասաբար են ազդում մկանային զանգվածի վրա, մինչդեռ այդ հյուսվածքների կենսագործունեության ապահովման համար օրգանիզմը բավական շատ կալորիա է այրում: Սա նշանակում է, որ մկանային զանգվածի նվազման հետ մեկտեղ օրգանիզմը քիչ կալորիա է այրում և սկսում է ավելորդ քաշ կուտակել:

Այս խնդրից խուսափելու համար հարկավոր է պարզապես մարզվել: Ուժային վարժություններն ու սպիտակուցներով հարուստ սննդակարգը կօգնեն պահպանել ու ավելացնել մկանային զանգվածը:

Հորմոնալ ֆոնի փոփոխություններ

35 տարեկանից հետո կանանց օրգանիզմը սկսում է ավելի քիչ էստրոգեն արտադրել, ինչը ժամանակի ընթացքում հանգեցնում է դաշտանադադարի: Այս հորմոնի պակասը բացասաբար է ազդում մարդու քաշի ու կազմվածքի վրա և հենց սա է պատճառը, որ նախադաշտանադադարային շրջանը դրսևորվում է որովայնի հատվածում ճարպաշերտերի կուտակմամբ ու գլյուկոզայի և ինսուլինի մակարդակների բարձրացմամբ:

Տղամարդկանց մոտ տեստոստերոնի մակարդակը սկսում է նվազել 30 տարեկանից հետո, սակայն այս խնդիրն առավել ակնհայտ է դառնում 40 տարեկանից հետո: Ուսումնասիրությունները ցույց են տվել, որ 39 տարեկանից հետո տղամարդկանց օրգանիզմում ազատ տեստոստերոնի մակարդակը տարեկան նվազում է մոտ 1.2%-ով: Ընդ որում՝ այս գործընթացն ուղեցվում է դեպրեսիայով, լիբիդոյի նվազմամբ, մկանային զանգվածի նվազմամբ ու քաշի ավելացմամբ:

Նման խնդիրներից խուսափելու համար հարկավոր է առաջին հերթին ստուգել վահանաձև գեղձը, քանի որ հորմոնների արտադրությունն անմիջականորեն կապված է այս օրգանի հետ: 40 տարեկանից հետո կանանց 20%-ի մոտ ի հայտ են գալիս վահանաձև գեղձի հետ կապված խնդիրներ, ուստի հարկավոր է շատ ուշադիր լինել: Եթե կան հորմոնալ խանգարումներ, ապա քաշի ավելացումից հնարավոր կլինի խուսափել հորմոնալ թերապիայի միջոցով:

Բացի այդ, տղամարդկանց դեպքում կարել է բարձրացնել տեստոստերոնի մակարդակը նաև բնական միջոցներով (օրինակ՝ ուժային վարժությունների, սպիտակուցներով հարուստ սննդակարգի, շաքարի սահմանափակման և սթրեսներից խուսափելու միջոցով):

Նյութի աղբյուրը՝ lifehacker.ru