Որոնք են շաքարային դիաբետի զարգացման վաղ փուլերի մասին վկայող հիմնական ախտանշանները

Շաքարային դիաբետը դասվում է այն հիվանդությունների շարքին, որոնք կարող են տարիներ շարունակ «լուռ» զարգանալ՝ առանց որևէ դրսևորման:

Այս հիվանդության զարգացման պատճառն արյան մեջ գլյուկոզայի մակարդակի բարձրացումն է, որը կարող է պայմանավորված լինել ինսուլինի արտադրության նվազմամբ կամ ինսուլինակայունությամբ:

Հիվանդության ախտանշանները սովորաբար աստիճանաբար են ի հայտ գալիս: Շատ հաճախ հիվանդները շաքարային դիաբետի ախտանշանները շփոթում են այլ խնդիրների ախտանշանների հետ, ինչի հետևանքով էլ հիվանդությունը բավական ուշ է հայտնաբերվում:

Շաքարային դիաբետը շատ վտանգավոր հիվանդություն է, քանի որ այն շարունակում է զարգանալ և խիստ բացասաբար է ազդում մարդու կենսական նշանակություն ունեցող օրգանների (օրինակ՝ երիկամների, սրտամկանի և գլխուղեղի) աշխատանքի վրա: Սա է պատճառը, որ հարկավոր է շատ ուշադիր լինել և չանտեսել արտասովոր ախտանշանները՝ անգամ, եթե դրանք խիստ վտանգավոր չեն թվում:

Նման խնդիրներից խուսափելու համար հարկավոր է սովորել տարբերել շաքարային դիաբետին բնորոշ հիմնական ախտանշանները, ուստի մասնագետները ներկայացրել են այն 10 ախտանշանները, որոնցով դրսևորվում է շաքարային դիաբետը զարգացման վաղ փուլերում:

1.      Հոգնածություն ու թուլություն

Օրգանիզմում ինսուլինի դեֆիցիտն ու ինսուլինակայունությունը խանգարում են գլյուկոզայի յուրացման գործընթացը, ինչի հետևանքով բջիջները չեն կարողանում գլյուկոզան վերածել էներգիայի: Արդյունքում հիվանդի մոտ նկատվում է ֆիզիկական ու մտավոր հոգնածություն, որից հաճախ հնարավոր չի լինում ազատվել անգամ լիարժեք հանգստից հետո:

2.      Քնի հետ կապված խնդիրներ

Արյան մեջ գլյուկոզայի մակարդակի տատանումները կարող են դառնալ քնի խանգարումների պատճառ, ինչը հանգեցնում քրոնիկական հոգնածության: Սա է պատճառը, որ 2-րդ տիպի շաքարային դիաբետի դեպքում մարդիկ սովորաբար դժվարանում են քնել կամ հաճախ են արթնանում գիշերվա ընթացքում:

Ընդ որում՝ հարկ է նշել, որ շաքարային դիաբետի առաջացման հավանականությունը զգալիորեն բարձրանում է այն մարդկանց մոտ, որոնք քնում են օրական 6 ժամից պակաս, ուստի այս հիվանդությունից խուսափելու համար հարկավոր է նաև կարգի բերել քնի ռեժիմը:

3.      Բերանի խոռոչի չորություն ու ծարավի զգացում

Գլյուկոզան համարվում է օրգանիզմի հիմնական «վառելիքներից» մեկը, ուստի երբ այն ճիշտ չի յուրացվում ու օգտագործվում, նկատվում է օրգանիզմի ջրազրկում, ինչը խիստ բացասաբար է ազդում օրգանիզմի բոլոր բջիջների վրա: Հեղուկի պակասն ազդում է նաև թքի արտադրության վրա, ինչի հետևանքով էլ հիվանդի մոտ նկատվում է բերանի խոռոչի չորություն ու ծարավի զգացում:

4.      Հաճախամիզություն

Արյան մեջ գլյուկոզայի բարձր մակարդակի հետևանքով երիկամները սկսում են ավելի ակտիվ կերպով աշխատել, որպեսզի կարողանան դուրս բերել ավելորդ գլյուկոզան օրգանիզմից: Արդյունքում՝ երիկամները գերծանրաբեռնված են լինում և հիվանդի մոտ նկատվում է հաճախ միզելու ցանկություն:

Հարկ է հիշել, որ օրգանիզմում ավելորդ գլյուկոզայի առկայությունը խանգարում է արտազատական համակարգի աշխատանքը: Սա է պատճառը, որ շաքարային դիաբետից տառապողների մոտ հաճախ նկատվում է երիկամների աշխատանքի խանգարում, ինչի հետևանքով օրգանիզմը չի մաքրվում տոքսիններից ու այլ վնասակար նյութերից:

5.      Միզուղիների վարակներ

Շաքարային դիաբետի մասին վկայող ախտանշանների շարքին կարող են դասվել նաև միզուղիների երկարատև կամ քրոնիկական վարակումները, որոնք պայմանավորված են լինում արյան մեջ շաքարի բարձր մակարդակի հետևանքով իմունային համակարգի թուլացմամբ: Արդյունքում՝ օրգանիզմը սկսում է ավելի քիչ հակամարմիններ արտադրել և չի կարողանում արդյունավետ կերպով պայքարել վիրուսների, բակտերիաների և սնկերի դեմ:

6.      Վերքերի դանդաղ ապաքինում

Վերքերի և մաշկային հյուսվածքների այլ վնասվածքների դանդաղ ապաքինում նույնպես համարվում է շաքարային դիաբետին բնորոշ ամենատարածված ախտանշաններից մեկը: Սա է պատճառը, որ այս հիվանդությունից տառապողները պետք է շատ ուշադիր լինեն և ճիշտ խնամեն անգամ չնչին վնասվածքները՝ հետագայում լուրջ բարդություններից և անգամ վիրահատական միջամտության անհրաժեշտությունից խուսափելու համար:

7.      Ոտքերի հետ կապված խնդիրներ

Շաքարային դիաբետի դեպքում առաջին հերթին տուժում են հիվանդի ոտքերը: Բանն այն է, որ արյան շրջանառության հետ կապված խնդիրներն ու օրգանիզմում հեղուկի կուտակումը խիստ բացասաբար է ազդում ստորին վերջույթների վրա: Անուշադրության մատնելու դեպքում շաքարային դիաբետը կարող է դառնալ ոտքերի նյարդային վերջավորությունների վնասման պատճառ, ինչի հետևանքով ոտքերը հաճախ թմրում են:

8.      Աղոտ տեսողություն

Արյան մեջ գլյուկոզայի մակարդակի բարձրացման հետևանքով օրգանիզմը ջրազրկվում է, ինչն էլ խիստ բացասաբար է ազդում հիվանդի տեսողության վրա: Հեղուկի դեֆիցիտի պատճառով տուժում են աչքերի ոսպնյակները, ինչի հետևանքով մարդը դժվարանում է կենտրոնացնել հայացքը որևէ բանի վրա և նրա տեսողությունը սկսում է աղոտվել:

9.      Ախորժակի բարելավում

Երբ բջիջները չեն ստանում բավարար քանակությամբ գլյուկոզա և չեն վերածում այն էներգիայի, օրգանիզմը բախվում է կենսագործունեության համար անհրաժեշտ «վառելիքի» պակասի խնդրին: Այս ամենի հետևանքով հիվանդին սկսում է անհանգստացնել սաստիկ քաղցի զգացումը և բարելավվում է ախորժակը, քանի որ սննդի միջոցով օրգանիզմը փորձում է վերականգնել էներգիայի մակարդակը:

10.      Մաշկի չորություն

Մարդու մաշկը կարող է շատ բան պատմել նրա առողջական վիճակի մասին: Օրինակ՝ այն կարող է դառնալ շաքարային դիաբետի մասին վկայող ախտանշաններից մեկը: Բանն այն է, որ այս հիվանդությունից տառապողները հաճախ բախվում են մաշկի չորության խնդրին, ինչը պայմանավորված է լինում արյան շրջանառության խանգարմամբ ու օրգանիզմի ջրազրկմամբ:

Այս ախտանշանները, իհարկե, կարող են պայմանավորված լինել նաև առողջական մի շարքի այլ խնդիրներով, սակայն, այնուամենայնիվ, լուրջ բարդություններից խուսափելու և հիվանդությունը ժամանակին ախտորոշելու համար մասնագետները խորհուրդ են տալիս բուժզննում անցնել և ստուգել արյան մեջ շաքարի մակարդակը:

Հարկ է հիշել, որ հիվանդությունը կանխարգելելն ու զարգացման վաղ փուլերում բուժելը շատ ավելի հեշտ է, քան հետագայում դրա հետևանքով առաջացած մի շարք խնդիրների դեմ պայքարելը, ուստի հարկավոր է ավելի ուշադիր լինել և չանտեսել օրգանիզմի տված ազդանշանները:

Նյութի աղբյուրը՝ healthinfo.ua