8 արդյունավետ խորհուրդ, որոնք կօգնեն ազատվել թթվային ռեֆլյուքսից և կանխարգելել այն

Թթվային ռեֆլյուքը բավական տհաճ խնդիր է, որի դեպքում տեղի է ունենում ստամոքսի թթվային պարունակության հետհոսք դեպի կերակարփող: Հիվանդության հիմնական ախտանշանն է որովայնի վերին հատվածում այրոցի զգացողությունը, որն ուղեկցվում է կրծքավանդակի ցավով, կլման ակտի դժվարացմամբ ու ստամոքսի այրոցով:

Չնայած, որ ռեֆլյուքսը չի համարվում առանձին հիվանդություն և անհանգստացնում է բավական հազվադեպ, այնուամենայնիվ հարկավոր է կանխարգելիչ միջոցներ ձեռնարկել՝ հնարավոր բարդություններից խուսափելու համար: Սակայն միևնույն ժամանակ հարկավոր է նաև հաշվի առնել, որ ռեֆլյուքսի առաջացմանը նպաստող գործոնները տարբեր են լինում, ուստի դրանք ոչ մի դեպքում չի կարելի անտեսել

Ձեր ուշադրությանն ենք ներկայացնում 8 պարզ ու արդյունավետ խորհուրդ, որոնք կօգնեն ազատվել այս խնդրից ու կանխարգելել դրա առաջացումը:

1.      Խուսափել ստամոքսը գրգռող սննդամթերքից

Սխալ սննդակարգը թթվային ռեֆլյուքսի առաջացման հիմնական պատճառներից մեկն է, ուստի այդ խնդրից խուսափելու համար հարկավոր է բացառել սննդակարգից չափազանց դժվարամարս ուտեստները կամ սննդամթերքի սխալ համադրությունները, որոնք գրգռում են ստամոքսն ու դառնում այրոցի պատճառ:

Ռեֆլյուքսի կանխարգելման համար մասնագետները խորհուրդ են տալիս սահմանափակել այնպիսի սննդամթերքի գործածությունը, ինչպիսի են.

·         երշիկեղենն ու նրբերշիկները,

·         ռաֆինացված ալյուրը,

·         քաղցրավենիքն  ու թխվածքները,

·         կծու համեմունքները,

·         պահածոները,

·         աղի սնունդը:

2.      Վերահսկողության տակ պահել քաշը

Ավելորդ քաշից ու ճարպակալումից տառապողների մոտ ավելի հաճախ է առաջանում թթվային ռեֆլյուք, ինչը պայմանավորված է նրանով, որ ավելորդ քաշը մեծացնում է ստամոքսի վրա գործադրվող ճնշումը, ինչի հետևանքով դրա թթու պարունակությունը հայտնվում է կերակրափողում:

Սա է պատճառը, որ ռեֆլյուքսի կանխարգելման լավագույն միջոցներից մեկը համարվում է քաշի վերահսկողությունը:

3.      Հրաժարվել ծխախոտից

Թթվային ռեֆլյուքսից ազատվելու համար ծխող մարդիկ պետք է առաջին հերթին հրաժարվեն ծխախոտից, քանի որ միայն այդ դեպքում նրանց կհաջողվի կարգավորել ստամոքսի թթվայնությունը:

Ծխախոտի մեջ պարունակվող տոքսինները նվազեցնում են թքի արտադրությունը, իսկ այն օգնում է պաշտպանվել այրոցից ու պայքարել թթուների դեմ: Այսպիսով՝ այս վատ սովորությունը նպաստում է բերանի խոռոչի ու կոկորդի ջրազրկմանը, ինչը հետագայում կարող է դառնալ թթուների հետևանքով առաջացած լուրջ բարդությունների պատճառ:

4.      Կրել միայն հարմարավետ հագուստ

Ռեֆլյուքսի առաջացման պատճառ կարող է դառնալ նաև չափազանց կիպ հագուստը, որը սեղմում է որովայնի հատվածն ու նպաստում է ստամոքսահյութի հետհոսքին: Սա է պատճառը, որ հարկավոր է կրել ոչ կիպ, հարմարավետ հագուստ և արձակել գոտին կամ սեղմող կոճակները սննդի ընդունումից հետո՝ այդ կերպ նվազեցնելով ստամոքսի վրա գործադրվող ճնշումը:

5.      Հետևել կեցվածքին

Մարսողական համակարգի աշխատանքի վրա շատ մեծ ազդեցություն է ունենում նաև մարմնի դիրքը սննդի ընդունման ժամանակ և դրանից հետո: Ճիշտ կեցվածքի ու ձգողականության ուժի շնորհիվ սնունդը հեշտությամբ է հասնում ստամոքս, ինչն օգնում է խուսափել ռեֆլյուքսից և այլ տհաճ խնդիրներից:

Սա է պատճառը, որ ոչ մի դեպքում չի կարելի սնվել պառկած ժամանակ կամ որևէ այլ անհարմար դիրքով, քանի որ այդ դեպքում բարձրանում է ստամոքսի կծկումների առաջացման հավանականությունը:

6.      Խմել թուրմեր ու եփուկներ

Կան նաև մի շարք բնական բաղադրիչներ, որոնցից պատրաստված թուրմերն ու եփուկները կօգնեն պայքարել թթուների դեմ, բարելավել մարսողությունն ու ազատվել թթվային ռեֆլյուքսի ախտանշաններից: Նման դեպքերում շատ արդյունավետ կարող են լինել.

·         դաղձը,

·         հիլը,

·         ֆենխելը,

·         դարչինը,

·         կոճապղպեղը,

·         կիտրոնը,

·         մանանեխի սերմերը,

·         կտավատի սերմերը:

7.      Խուսափել սթրեսներից

Սթրեսը խիստ բացասաբար է ազդում օրգանիզմի վրա, սակայն քչերն են պատշաճ ուշադրություն դարձնում այս խնդրին: Սթրեսի պատճառով կարող է խանգարվել մարսողական համակարգի աշխատանքը, ինչի հետևանքով օրգանիզմը դժվարությամբ է յուրացնում սնունդը:

Բացի այդ, սթրեսի պատճառով օրգանիզմում ավելի շատ խթանող նյութեր են արտադրում (օրինակ՝ ադրենալին), որոնք նպաստում են ստամոքսում թթուների ավելացմանը:

8.      Հրաժարվել ալկոհոլային ըմպելիքներից

Ալկոհոլի չարաշահումը հանգեցնում է ստամոքսի լորձաթաղանթի գրգռման, ինչն էլ կարող է դառնալ թթվային ռեֆլյուքսի և այլ տհաճ ախտանշանների առաջացման պատճառ: Բացի այդ, ալկոհոլը պարունակում է տոքսիններ, որոնք դժվարացնում են մարսողության գործընթացն ու նպաստում ռեֆլյուքսի առաջացմանը:

Այսպիսով՝ թթվային ռեֆլյուքը բավական տհաճ խնդիր է, որի առկայության դեպքում հարկավոր է փորձել միջոցներ ձեռնարկել և ազատվել դրա առաջացմանը նպաստող գործոններից: Եթե անգամ նշված կանխարգելիչ միջոցները չեն օգնում ազատվել ռեֆլյուքսից, ապա հարկավոր է անպայման դիմել մասնագետին՝ առողջական էլ ավելի լուրջ խնդիրներից խուսափելու համար:

Նյութի աղբյուրը՝ steptohealth.ru