Պարզ խորհուրդներ, որոնք կօգնեն կանխարգելել խորանիստ երակների թրոմբոզի առաջացումը

Խորանիստ երակների թրոմբոզը ներկայում ամենատարածված հիվանդություններից է, որի առաջացմանը հաճախ նպաստում են մարդու կենսակերպը, սովորություններն ու գենետիկական նախատրամադրվածությունը: Սակայն այս խնդրից կարելի է խուսփել՝ պարզապես մասնագետների խորհուրդներին հետևելով:

Այս հիվանդության առաջացումից խուսափելու համար առաջին հերթին հարկավոր է լինել ֆիզիկապես ակտիվ: Այս դեպքում խոսքը ոչ թե ակտիվ մարզումների մասին է, այլ չափավոր ակտիվության:

Թրոմբոզի առաջացումից խուսափելու համար ամենաարդյունավետ վարժությունը քայլելն է, քանի որ քայլելիս ակտիվանում է արյան շրջանառությունը: Պետք չէ քայլել շատ արագ, սակայն զբոսանքը պետք է տևի առնվազն կես ժամ: Շատ օգտակար կարող են լինել նաև լողը, հեծանվազբոսանքը և աերոբային այլ վարժությունները:

Սակայն հաճախ մարդիկ անգամ մի քանի րոպե ժամանակ չեն ունենում վարժություններ կատարելու և զբոսնելու համար, ուստի նման դեպքերում մասնագետները խորհուրդ են տալիս պարզապես լինել հնարավորինս ակտիվ: Օրինակ՝ կարելի է հրաժարվել վերելակից և բարձրանալ աստիճաններով կամ աշխատանքից հետո մի փոքր քայլել:

Թրոմբոզի կանխարգելման հարցում շատ կարևոր է նաև քաշի վերահսկումը: Ավելորդ քաշն առհասարակ վնասակար է և կարող է խիստ բացասաբար ազդել նաև թրոմբոզից տառապողների առողջական վիճակի վրա:

Մասնագետները հաճախ են նշում, որ ճարպակալումը համարվում է թրոմբոզի առաջացմանը նպաստող հիմնական գործոններից մեկը, ուստի հարկավոր է անել հնարավոր ամեն ինչ այդ խնդրից ազատվելու համար: Բանն այն է, որ ճարպերը կարող են դառնալ զարկերակների խցանման պատճառ, ինչն էլ նպաստում է թրոմբների առաջացմանը:

Բացի այդ, թրոմբոզի կանխարգելման հարցում շատ մեծ նշանակություն ունի սննդակարգը: Հարկ է հիշել, որ կան սննդամթերքի տեսակներ, որոնք շատ օգտակար են արյունատար համակարգի համար, ուստի սննդակարգում ներառելու դեպքում օգնում են խուսափել թրոմբոզից: Առաջին հերթին նման սննդամթերքի շարքին է դասվում վիտամին C-ով հարուստ մթերքը, քանի որ նպաստում է էլաստինի և կոլագենի արտադրմանը, ինչն օգնում է պահպանել զարկերակների պատերի առաձգականությունը: Սա է պատճառը, որ մասնագետները խորհուրդ են տալիս օգտագործել հնարավորինս շատ նարինջ, կիտրոն, կիվի և այս վիտամինով հարուստ այլ մթերք:

Բացի այդ, շատ կարևոր է նաև վիտամին E-ով հարուստ սննդամթերքը, որն օժտված է հզոր հակաօքսիդանտային հատկություններով և օգնում է կանխել արյան մակարդման գործընթացը: Վիտամին E-ով հարուստ սննդամթերքի շարքին է դասվում բանջարեղենը (հատկապես՝ կանաչ տերևավոր բանջարեղենը), արևածաղկի սերմերը և կարմիր մրգերը:

Նյութի աղբյուրը՝ awarenessremedies.com