8 ախտանշան, որոնք կարող են պայմանավորված լինել ենթաստամոքսային գեղձի քաղցկեղով

Քաղցկեղն ամենավտանգավոր հիվանդություններից մեկն է, որը տարեկան միլիոնավոր մարդկանց կյանք է խլում: Այս հիվանդության ամենատարածված տեսակներից մեկը ենթաստամոքսային գեղձի քաղցկեղն է, որը ոչ միշտ է հաջողվում հայտնաբերել վաղ փուլերում:

Ենթաստամոքսային գեղձը մարսողական համակարգի մասը կազմող գեղձ է, որն արտադրում է ֆերմենտներ սննդի քայքայման համար: Այս գեղձի հետ կապված խնդիրները, որպես կանոն, բավական ուշ են հայտնաբերվում, ինչի հետևանքով հիվանդությունը խորանում է, իսկ բուժումը՝ բարդանում: Ընդ որում՝ այս դեպքում բացառություն չեն կազմում նաև չարորակ ուռուցքները:

Ենթաստամոքսային գեղձի քաղցկեղը, ինչպես և ցանկացած այլ հիվանդություն, դրսևորվում է որոշ ախտանշաններով, սակայն խնդիրն այն է, որ մարդիկ հաճախ անտեսում են այդ ախտանշանները կամ վերագրում են դրանք ոչ շատ լուրջ խնդիրներին: Սա է պատճառը, որ հիվանդությունը հաճախ հայտնաբերվում է այն ժամանակ, երբ բուժումն արդեն բավական արդյունավետ չի լինում:

Նման խնդիրներից խուսափելու համար հարկավոր է սովորել տարբերել ենթաստամոքսային գեղձի քաղցկեղի մասին վկայող հիմնական ախտանշաններն ու դրանց առկայության դեպքում անմիջապես բուժզննում անցնել և միջոցներ ձեռնարկել:

8 ախտանշան, որոնք կարող են պայմանավորված լինել ենթաստամոքսային գեղձի քաղցկեղով

1.      Շաքարային դիաբետ

Շաքարային դիաբետը բավական տարածված հիվանդություն է, սակայն եթե այն կտրուկ է ախտորոշվում և նախապես չի ուղեկցվում արյան մեջ շաքարի մակարդակի բարձրացման մասին վկայող ախտանշաններով, ապա հարկավոր է անհապաղ դիմել բժշկին: Բանն այն է, որ այս դեպքում շաքարային դիաբետը կարող է լինել ենթաստամոքսային գեղձի քաղցկեղի մասին վկայող ախտանշան, քանի որ այս օրգանի հետ կապված խնդիրներն առաջացնում են նաև խնդիրներ՝ կապված ինսուլինի հետ:

2.      Մաշկային քոր

Ենթաստամոքսային գեղձը շատ կարևոր օրգան է, որի աշխատանքի խանգարումը կարող է հանգեցնել օրգանիզմում մեծ քանակությամբ տոքսինների կուտակման: Ընդ որում՝ այս վնասակար նյութերի կուտակման պատճառ կարող է դառնալ անգամ շատ փոքր ուռուցքը, ինչի հետևանքով էլ կարող է ի հայտ գալ այնպիսի տհաճ ախտանշան, ինչպիսին է ոտնաթաթերի, ձեռքերի ու ոտքերի քորը: Սա է պատճառը, որ անգամ նման արտասովոր ախտանշանը ոչ մի դեպքում չի կարելի անուշադրության մատնել:

3.      Աչքերի դեղնավուն երանգ

Այս հիվանդության մասին վկայող արտասովոր ախտանշանների շարքին կարող է դասվել նաև աչքերի դեղնավուն երանգը, ինչը պայմանավորված է արյան մեջ լեղու կուտակումով: Այս դեպքում հարկավոր է շատ ուշադիր լինել, քանի որ ենթաստամոքսային գեղձի աշխատանքի խանգարման պատճառ կարող է դառնալ զարգացող ուռուցքը:

4.      Որովայնի մղկտուն ցավ

Ենթաստամոքսային գեղձի հետ կապված խնդիրների մասին վկայող ախտանշաններից մեկը որովայնի մղկտուն ցավն է, որը նման է քաղցի հետևանքով առաջացող ցավին: Սակայն այս դեպքում տհաճ զգացողությունները մեղմելու համար պարզապես հարկավոր է մի փոքր կռանալ:

5.      Կղանքի արտասովոր գույն ու կազմություն

Ենթաստամոքսային գեղձի հետ կապված խնդիրների դեպքում առաջին ախտանշանը կարող է լինել հիվանդի արտաթորանքի փոփոխությունը: Նման խնդրի դեպքում կղանքը, որպես կանոն, լինում է բաց գույնի կամ իր կազմությամբ ու գույնով կավի է նմանվում:

6.      Քաշի կտրուկ կորուստ

Ենթաստամոքսային գեղձում առաջացած ուռուցքը խանգարում է սննդի յուրացման գործընթացը, ինչի հետևանքով մարդի չի ստանում անհրաժեշտ սննդարար տարերն ու քաշ է կորցնում: Բացի այդ, քաշի կորուստը համարվում է այն ախտանշաններից մեկը, որը բնորոշ է քաղցկեղի բոլոր տեսակներին:

7.      Համային զգացողությունների փոփոխություն

Ենթաստամոքսային գեղձը պատասխանատու է մարսողական ֆերմենտների արտադրման համար, ուստի դրա աշխատանքի խանգարման դեպքում կարող են փոխվել հիվանդի համային նախասիրությունները: Օրինակ՝ նա կարող է ուտել այն, ինչը նախկինում չէր սիրում, և հրաժարվել սիրելի ուտեստներից:

8.      Հագեցածության զգացողություն

Ենթաստամոքսային գեղձի քաղցկեղի դեպքում մարդը ոչ միայն սկսում է հրաժարվել իր սիրելի ուտեստներից, այլև առհասարակ սովորականից շատ ավելի շուտ է հագենում և քիչ է սնվում:

Նման ախտանշանների դեպքում հարկավոր է անհապաղ դիմել բժշկին, քանի որ քաղցկեղը կանխարգելելն ու վաղ փուլերում բուժելը շատ ավելի հեշտ է, քան հետագայում մի շարք բարդությունների դեմ պայքարելը:

Նաև հարկ է հիշել, որ ոչ մի դեպքում չի կարելի զբաղվել ինքնաբուժությամբ, քանի որ դա կարող է խիստ վտանգավոր լինել և էլ ավելի վատացնել հիվանդի վիճակը: Բացի այդ, միայն փորձառու մասնագետը կարող է ճիշտ ախտորոշել հիվանդությունն ու նշանակել անհրաժեշտ բուժումը:

Նյութի աղբյուրը՝ budetezdorovy.ru