Օնիխոմիկոզի առաջացման պատճառները, ախտանշաններն ու բուժման լավագույն բնական միջոցները

Եղունգների սնկային հիվանդությունը, որը կոչվում է օնիխոմիկոզ, բավական տարածված խնդիր է, և այն չբուժելը կարող է լուրջ բարդությունների առաջացման պատճառ դառնալ: Այս հիվանդությունը զարգանում է սնկային միկրոօրգանիզմների ինտենսիվ բազմացման հետևանքով և կարող է ախտահարել ինչպես ձեռքերի, այնպես էլ ոտքերի եղունգները:

Չնայած, որ օնիխոմիկոզը կարող է ախտորոշվել յուրաքանչյուրի մոտ, այն առավել հաճախ ախտահարում է տարեցներին, քանի որ տարիքի հետ եղունգները դառնում են շատ ավելի փխրուն ու խոցելի: Միևնույն ժամանակ կան գործոններ, որոնք բարձրացնում են օնիխոմիկոզի առաջացման հավանականությունը, ուստի խնդրից խուսափելու համար հարկավոր է խուսափել նաև այդ անբարենպաստ գործոններից: Դրանց շարքին են դասվում.

·        արյան շրջանառության վատացումը,

·        իմունային համակարգի թուլացումը,

·        խոնավությունն այնպիսի վայրերում, ինչպիսին են լողավազանը, մարզասրահը, լոգարանը և այլն,

·        անհամապատասխան կոշիկը,

·        առատ քրտնարտադրությունը,

·        շաքարային դիաբետը,

·        եղունգների կառուցվածքային անոմալիաները,

·        նրբամաշկի վնասվածքները,

·        սինթետիկ կտորներից կարված գուլպաները:

Առավել հաճախ սնկերն ախտահարում են ոտքերի մատների եղունգները, ինչը պայմանավորված է նրանով, որ կոշիկների որոշ տեսակներ ստեղծում են բարենպաստ պայմաններ դրանց բազմացման համար: Նման խնդիրներից խուսափելու համար հարկավոր է ավելի ուշադիր լինել և սովորել տարբերել հիվանդության ախտանշանները, ինչը կօգնի ժամանակին հայտնաբերել խնդիրն ու համապատասխան միջոցները ձեռնարկել:

Սնկային հիվանդության մասին վկայող հիմնական ախտանշանների շարքին են դասվում.

·        եղունգների հաստացումը,

·        եղունգների գույնի փոփոխությունը,

·        եղունգների փխրունությունը,

·        եղունգների անհարթությունը,

·        ոտքերի տհաճ հոտը:

Ինչպես բուժել օնիխոմիկոզը տան պայմաններում

Օնիխոմիկոզը բավական տհաճ խնդիր է, որից հարկավոր է հնարավորինս շուտ ազատվել, քանի որ այն կարող է հանգեցնել բավական լուրջ հետևանքների (անգամ եղունգների կորստի): Գոյություն ունեն բազմաթիվ հակասնկային դեղամիջոցներ, որոնք նախատեսված են սնկերի ոչնչացման ու եղունգների բուժման համար, սակայն դրանք ոչ միշտ են բավական արդյունավետ լինում, իսկ դրանցում պարունակվող վնասակար բաղադրիչները հաճախ դառնում են կողմնակի բարդությունների առաջացման պատճառ:

Սակայն կան նաև որոշ բնական միջոցներ, որոնք կօգնեն ամրապնդել եղունգներն ու կանխել սնկերի բազմացումը: Ընդ որում՝ դրանք չեն պարունակում քիմիական բաղադրիչներ, ուստի ոչ միայն արդյունավետ են, այլև չեն առաջացնում կողմնակի բարդություններ ու ալերգիկ ռեակցիաներ:

Ձեր ուշադրությանն ենք ներկայացնում հակասնկային ազդեցությամբ օժտված 5 արդյունավետ բնական միջոց, որոնք կօգնեն ազատվել օնիխոմիկոզից և բուժել եղունգները:

1.      Խնձորի քացախ

Խնձորի քացախը համարվում է սնկային միկրոօրգանիզմների դեմ պայքարի ամենաարդյունավետ միջոցներից մեկը: Այն պարունակում է օրգանական թթուներ, որոնք զրկում են սնկերին բազմացման համար բարենպաստ միջավայրից: Արդյունքում ախտածին միկրոօրգանիզմները չեն բազմանում և չեն վնասում եղունգները:

Նման արդյունքի հասնելու համար պարզապես հարկավոր է ամեն երեկո խնձորի քացախով թրջած բամբակյա սկավառակը դնել ախտահարված եղունգին, ամրացնել այն վիրակապի միջոցով և թողնել ամբողջ գիշեր: Այս պրոցեդուրան հարկավոր է կրկնել ամեն օր մինչև հիվանդությունն անհետանա:

2.      Թեյի ծառի եթերայուղ

Թեյի ծառի յուղը հայտնի է իր հզոր հակաբակտերիալ ու հակասնկային հատկություններով, ինչը նշանակում է, որ այն հիանալի միջոց է օնիխոմիկոզից ազատվելու համար: Ընդ որում՝ այս յուղի օգնությամբ կարելի է հասնել զգալի արդյունքի ընդամենը մի քանի օրում:

Պարզապես հարկավոր է 2-3 կաթիլ յուղ կաթեցնել ախտահարված եղունգին, մի փոքր մերսել և թողնել այն ներծծվի: Այս միջոցը հարկավոր է օգտագործել օրական գոնե 2 անգամ մինչև եղունգը բուժվի:

3.      Սխտոր

Սնկային հիվանդության դեմ պայքարի հիանալի միջոց է նաև սխտորը, որը ոչ միայն ոչնչացնում է սնկերը, այլև գունաբացում է եղունգն ու ազատում է տհաճ ախտանշաններից:

Սխտորի միջոցով եղունգը բուժելու համար հարկավոր է այն մանրացնել ու խյուս դարձնել, ստացված մածուկը քսել ախտահարված եղունգին, այնուհետև ամրացնել այն վիրակապի միջոցով և թողնել առնվազն 45 րոպե: Այս պրոդեդուրան հարկավոր է կրկնել ամեն օր, այնուհետև լվանալ ոտքերը սառը ջրով:

4.      Կիտրոնի հյութ

Կիտրոնի հյութը պարունակում է մեծ քանակությամբ սննդարար նյութեր ու թթուներ, որոնք ամրապնդում են եղունգներն ու պաշտպանում քայքայումից:

Պարզապես հարկավոր է օրական երկու անգամ մշակել ախտահարված եղունգները կիտրոնի թարմ հյութով և թողնել այն ներծծվի:

5.      Խնկածաղկի (орегано) եթերայուղ

Խնկածաղկի եթերայուղը պարունակում է հակասնկային հատկություններով օժտված բաղադրիչներ, ինչի շնորհիվ օգնում է արգելակել օնիխոմիկոզի զարգացումը:

Այս միջոցով եղունգները բուժելու համար հարկավոր է 3 կաթիլ խնկածաղկի յուղը քսել ախտահարված եղունգներին, մի փոքր մերսել և թողնել այն ներծծվի ու չորանա: Այս պրոցեդուրան հարկավոր է կրկնել օրական գոնե երկու անգամ:

Նյութի աղբյուրը՝ steptohealth.ru