Սխալներ, որոնք հաճախ թույլ են տալիս ծնողները երեխաների հետ վիճելիս

Երեխայի դաստիարակությունը շատ մեծ պատասխանատվություն է և բարդ աշխատանք, որին ծնողները պետք ամենայն լրջությամբ մոտենան: Հաճախ երիտասարդ ծնողները պատրաստ չեն լինում նման պատասխանատվության, ինչի հետևանքով էլ երբեմն լուրջ սխալներ են գործում: Հատկապես հաճախ են ծնողները սխալվում երեխաների հետ վիճելիս՝ անելով կամ ասելով բաներ, որոնք էլ ավելի են վատացնում իրավիճակը:

Ihappymama.ru կայքը ներկայացրել է 6 տարածված սխալ, որոնցից խուսափելը կօգնի հեշտությամբ հարթել վեճը և էլ ավելի չսրել իրավիճակը:

1. Գնահատել երեխային, այլ ոչ թե նրա արարքը

Չի կարելի երեխային ասել «Ի՜նչ վատ երեխա է» կամ «Դու վատ տղա ես», քանի որ նա միշտ էլ շատ լավն է, պարզապես երբեմն նրա արարքներն են վատը լինում: Խոսել կամ գնահատել հարկավոր է հենց երեխայի արարքը, այլապես նա չսկսի կարծել, թե սիրված չէ:

2. Օգտվել մեծահասակ լինելու առավելությունից

Երբեմն ծնողները վերցնում են երեխայից որևէ արգելված իր և դնում են այնպիսի տեղ, որտեղից նա չի կարողանա վերցնել դա: Նման դեպքերում երեխայի մոտ ի հայտ է գալիս թերարժեքության զգացում, նա զայրանում է ու վիրավորվում, իսկ ծնողներն, օգնելու փոխարեն, միայնակ են թողնում ու խնդրում են մտածել իր պահվածքի մասին:

3. Ճնշում գործադրել՝ սպառնալով զրկել որևէ նյութական բանից

Հաճախ կոնֆլիկտային իրավիճակում ծնողները սպառնում են չգնել խոստացված խաղալիքը կամ քաղցրավենիքը, ինչով շատ արագ արդյունքի են հասնում և երեխան սկսում է իրեն ավելի լավ պահել: Սակայն այդ կերպ նա կսկսի մտածել միայն օգուտ ստանալու մասին, այլ ոչ թե իր վատ պահվածքի կամ ծնողների զգացմունքների: Երբ երեխան մեծանա, նա կսկսի հասկանալ, թե երբ է պետք լավ պահվածք ցուցաբերել (որպեսզի խաղալիք ստանա), իսկ իր չարությունը կկուտակի ներսում:

4. Ագրեսիա, ֆիզիկական պատիժ, բղավոցներ ու հայհոյանքներ

Նման պահվածքը շատ վատ օրինակ է երեխայի համար, քանի որ նա կսկսի իրեն նույն կերպ պահել: Նա կսկսի մտածել՝ ճիշտ է նա, ով ավելի ուժեղ է ու ագրեսիվ: Բացի այդ, երեխան կարող է նաև վախենալ ծնողների այդ պահվածքից և հետագայում հարաբերությունները կկառուցվեն վախի հիման վրա:

5. Ստիպել երեխային ներողություն խնդրել ամեն մանրուքի համար, մինչդեռ ծնողները նույն կերպ չեն վարվում

Որպեսզի երեխան սովորի ներողություն խնդրել ու ընդունել իր սխալը, ծնողները պետք է օրինակ ծառայեն նրա համար: Միայն սեփական օրինակով կարելի է սովորեցնել երեխային անկեղծ ներողություն խնդրել, այլ ոչ թե մեխանիկորեն:

6. Պատժել երեխային ուրիշների աչքի առաջ

Երեխային ոչ մի դեպքում չի կարելի պատժել կամ դաստիարակել հանրային վայրում և օտարների աչքի առաջ, քանի որ նման վերաբերմունքը ստորացնում է երեխային: Հարկ է հիշել, որ նման խնդիրները հարկավոր է լուծել առանձին՝ բացատրելով երեխային իր սխալը: