Ձվարանի ապոպլեքսիայի(ձվարանի հյուսվածքի պատռում) առաջացման պատճառները, ախտանշանները և բուժման ու կանխարգելման միջոցները

19:56 • 19.06.18

Ապոպլեքսիան (ձվարանի հյուսվածքի պատռում) ձվարանի հյուսվածքի վնասվածքն է, որն ուղեկցվում է սաստիկ ցավով և արյունահոսությամբ դեպի որովայնի խոռոչ: Տարբերվում է հիվանդության երեք տեսակ.

· ցավային, որը բնորոշվում է միայն սուր ցավով,

· հեմոռագիկ, որն ուղեկցվում է զգալի արյունահոսությամբ,

· խառը, որը համատեղում է նախորդ երկուսի ախտանշանները:

Բացի այդ, հիվանդությունը դասակարգվում է նաև ըստ ծանրության աստիճանի՝ թեթև, միջին կամ ծանր: Ընդ որում՝ ցանկացած դեպքում հարկավոր է շտապ բժշկական օգնություն:

Ձվարանի ապոպլեքսիայի ախտանշանները

Ձվարանի ապոպլեքսիայի առաջացման պատճառ կարող են դառնալ բորբոքումներն ու անոթների ախտաբանական փոփոխությունները, ձվարանների պոլիկիստոզային համախտանիշը և խանգարումները, որոնք պայմանավորված են դեղորայքային միջամտությամբ: Այս հիվանդության ախտանշաններն են.

· որովայնի ստորին հատվածի ցավը (կարող է ի հայտ գալ դաշտանային ցիկլի մեջտեղում կամ դաշտանի ուշացումից հետո),

· մարմնի ջերմաստիճանի բարձրացումը,

· բերանի խոռոչում չորության զգացողությունը,

· զարկերակային ցածր ճնշումը,

· գլխապտույտը (որոշ դեպքերում նաև գիտակցության կորուստը),

· անոթազարկի արագացումը սրտի թույլ զարկերի դեպքում,

· փսխումը:

Աննշան ախտանշանների դեպքում հարկավոր է հնարավորինս շուտ գնալ հիվանդանոց, իսկ սուր ցավի դեպքում ընդունել հորիզոնական դիրք և անմիջապես շտապ օգնություն կանչել:

Ովքեր են ռիսկային խմբում

Ձվարանի ապոպլեքսիան կարող է ի հայտ գալ ցանկացած տարիքում, ուստի հիվանդի տարիքն այս հիվանդության դեպքում նշանակություն չունի: Ռիսկային գործոնների շարքի են դասվում.

· չափազանց բուռն սեռական ակտը,

· ֆիզիկական ծանրաբեռնվածությունը,

· որովայնի տարատեսակ վնասվածքները,

· ձիավարությունը:

Թվարկված գործոնները հանգեցնում է ձվարաններում արյան հոսքի ուժեղացման, ինչը կարող է դառնալ դրանց պատռվածքի պատճառ, ուստի գինեկոլոգները խորհուրդ են տալիս պարբերաբար անցնել բուժզննում, որը թույլ կտա ժամանակին ազատվել խնդիրներից և խուսափել ապոպլեքսիայից:

Հիվանդության ախտորոշումը

Հստակ ախտորոշման հարկավոր է հաշվի առնել.

· հիվանդի գանգատները,

· արյան մեջ հեմոգլոբինի մակարդակը (ցածր մակարդակը կարող է հիվանդության ախտանշան լինել),

· որովայնի խոռոչի ասեղնածակումը (պունկցիա) հեշտոցի հետին կամարի միջով (կուլդոցենտեզ),

· փոքր կոնքի օրգանների ուլտրաձայինային հետազոտությունը,

· լապարոսկոպիան:

Հետազոտման նշված մեթոդները թույլ են տալիս բացառել արտարգանդային հղիության ու որդանման ելունի բորբոքման հնարավորությունը և հստակ ախտորոշել ինքնազգացողության վատացման պատճառը:

Հիվանդության բուժումը

Պահպանողական թերապիան ներառում է.

· սպազմոլիտիկ միջոցների կիրառում,

· անոթների ամրապնդմանը նպաստող դեղամիջոցների կիրառում,

· վիտամինների կիրառում,

· էլեկտրոֆորեզ,

· միկրոալիքային թերապիա:

Սակայն հարկավոր է նկատի ունենալ, որ պահպանողական բուժման դեպքում շատ բարձր է կպումների առաջացման ու հիվանդի անպտղության հավանականությունը, ուստի նման բուժում նշանակում են այն կանանց, որոնք հետագայում այլևս մտադիր չեն ծննդաբերել: Բացի այդ, բացառված չի նաև հիվանդության կրկնության հավանականությունը, ինչը նույնպես հարկավոր է հաշվի առնել:

Վիրահատական միջամտությունների շարքին է դասվում լապարոսկոպիկ վիրահատությունը, որը թույլ է տալիս պահպանել ձվարանը: Այն նշանակվում է վերատադրողական տարիքի կանանց դեպքում և իրականացվում է առանձնահատուկ զգուշությամբ:

Ձվարանի ապոպլեքսիայի կանխարգելումը

Ձվարանի ապոպլեքսիայի կանխարգելման համար առաջին հերթին հարկավոր է բուժել այն հիվանդությունները, որոնք կարող են հանգեցնել ապոպլեքսիայի: Բացի այդ, անհրաժեշտ է խուսափել ֆիզիկական ու հուզական ծանրաբեռնվածությունից:

Անչափ կարևոր գործոն է նաև պրոֆիլակտիկ բուժզննումը: Հարկ է հիշել, որ միայն ժամանակին նշանակված համալիր թերապիան թույլ կտա խուսափել այնպիսի բարդ ու վտանգավոր հիվանդությունից, ինչպիսին է ձվարանի ապոպլեքսիան:

Նյութի աղբյուրը՝ chh.ru